Babilónialari Judá toca yucapiyarilaquinunca
24
Joacim Judá tobi miya jono mate, Babilonia to miya Nabucodonosor, soldadolaca erenue quera quichun. Junto yalari quera quito, Judá tobi chuminlaca fe lolainue. Junni Joacim peman wata fecári miya Nabucodonosóribe mantainue. Jun polenunbi Joacinni miya Nabucodonosórica paito, yabe nantari mantaitiyoe tinue babilónialachi mantabi nechi se lochun.2-4 Tsan josanan Miya Diosi Judá toca se laritunue. Diosichi mantate paminlari numa paca jominlanue Diosi Judá toca casticaquichunaeque. Manasés Judá tobi miya joto duque jutsa quimin jominue. Jerusalenbi duque senlaca totesa carica jominue. Jun tenchi Miya Diosi ya jutsaca perdonaituto, Judá toca casticaqueyanae tica jominue yalachi tobi nechi larito, yachi cale nechi joque suwachun. Junnan Joacinni babilónialachi mantabi nechi se lono podeitunue. Miya Diosi babilonia soldadolaca erenue. (Babilónialari “caldéola” tinunnan jolajoe.) Junsi Asiria soldadolaca, moabita soldadolaca, amonita soldadolacanan erenue Judá toca casticaquichun. Yalari Judá toca duque seiton quilaquinue.
5 Junni Joacim uyan titiya jera quicaca jera pila chuteca joe. Judá to miyala niyan quinunca chutenun pilabi jera chuteca joe. 6 Junni Joacim puyanunbi, yachi nao Joaquín miya inue.
9 Aman Joaquín Diosichi cale seiton miya jominue yachi apa cuwenta. 10 Aman jun malate Babilonia to miya Nabucodonosórichi soldadola Jerusalenca mannan jato, awinta chudilainue israelítalabe quicaachun. Monantiya win, nin lon, ino podeilaitunue. 11 Tsantin chularasanan, Nabucodonosor patsa janue. 12 Miya Joaquinni junca quirato, yachi ayanbe, yabe pemantaminlabe, junte nechi yabe ayudaiminlabe jeralela Nabucodonosórichi cuwapoilainue. Junnan yari yalaca bare toca tanjinue. Miya Nabucodonosor ochu wata Babilóniabi mantanasa tsanhinue.
13 Junni miyaca bare toca tanjitobi, Nabucodonosor Diosichi yabi, junsi miya Joaquinchi yabi, titiya mica cosalaca jera larito, Babilóniaca tanjisa carinue. Junsi Salomón Diosichi yabi chutechun duque cosalaca óroca quisa carica jominue. Junni tsan cosalacanan Nabucodonosor jera piti talulu bolesa carito tanjisa carinue. Miya Diosi yachi mantate pasa carica jominue tsanhichunaeque. 14 Junto Nabucodonosor duque israelítalaca Judá tobi nechi do tanjisa carinue. Tsachilaca mantaminlaca, fe min soldadolaca, suca ya quiminlaca, chideca ya quiminlaca, fieroca trabajaquiminlaca, junsi uyan cosa quino minlaca jera tanjinue. Jerale nechi chunca mili tsachilaca tanjilainue. Junto Judá tobi fe poperelacasiri puralaquinue.
17 Junto aman Joaquínlaca Babilónia toca tanjitobi, Nabucodonosor Mataníaca Jerusalenbi miya suwanue. Aman Matanías Joaquinchi manpi jominue. Juntonan Mataníachi mumunca canbiyaquito, Sedequías mumun ponue. 18 Sedequías palu chunca man wata tato miya ito, chunca man wata fecári Jerusalenbi mantanue. Yachi ayan Hamutal mumun jominue. Junsi yachi tatari Líbnabi nechi joto, Jeremías mumun jominue.
19 Juntonan Sedequíari Miya Diosichi cate duque seiton quinaminue Joacim cuwentanan. 20 Jun tenchi Miya Diosi Jerusalenbi chuminlaca, junsi jerale Judá tobi chuminlacanan paito, casticaquito, yachi cate nechi suerenue.
Diosichi yaca yucapiyarilaquinunca
Miya Diosi israelítalaca itsanque casticaquinue: Sedequíari Babilonia miyabe mantaito chuminnan, inale yaca paito nantari mantaitiyoe tinue. Junni Sedequía tsantinan, Nabucodonosórinan beconan paito yachi soldadolaca jera ereto, Jerusalén pueblote awinta chudilainue yape monantiya win, nin lon, ino podeilaitusa. Junto man wata quitsa tsansite Jerusalenca tsacumin ito, Sedequíachi cacaca larilaquito, Sedequíacanan Babilóniaca petanjilainue. Junsi Nabucodonosori soldadolaca mantamin mancaca, Nabuzaradán mumunca, Jerusalén puebloca erenue.