3 Junni Oseas Israel tobi miya josa, asíriolabe quera quicaano patinue. Asiria to miya Salmanasar israelítalabe quera quicaachun soldadolaca erenue. Junto asíriolari fe lolainue. Fe loto, Oséaca Asiria miyabe mantaisa carica jominlanue. Junto inpuesto cala eresa carica jominlanue.

4 Tsan josanan, Oséari asíriolabe nantari mantaituchique tenfenue. Junto yabe pemantaminlaca Egipto toca erenue Egipto miya Isobe soldadolaca panhalaquisa yape yalaca ayudailaisa. Junsi wata cura inpuesto calaca asíriolachi ereno jotonan eretunue. Junni Asiria miya Salmanasar junca tenhito, miya Oséaca dosa carinue. 5 Junsi Oséaca doquetobi, yachi soldadolabe manaman jalainue; junto Samaria pueblobi chuminlabe peman wata fecári quicaalaquinue. 6 Oseas nue wata tsansi miya jonunbi, Asiria soldadola Samáriabi chuminlaca fe lolainue. Junto asíriola Israel tobi chuminlaca bare toca tanjilainue. Uyanchi nuwiri toca tanjito, Halah tinun pueblobi chusa carilaquinue Habor tinun postote, Gozán pi quelote. Junsi jun quelole médolachi pueblolabi israelítalaca chusa carilaquinue.

7 Israelítalari Miya Diosica merátuto jutsa quicala jonun tenchi jera tsanque patilainue. Matu mate Faraón tinun Egipto miya yalaca mantanasa, Diosi yalaca jun tobi nechi larica jominue. Tsan josanan, yalari Diosica purato, uyan epe diosie tinunlabe mantailainue. 8 Miya Diosiri israelítalachi to cuwachun, duque uyan tsachi bolonlaca sularica jominue yape israelítala junte chularasa. Ya tsachilaca, seiton cosa quiminla jonan jera sularinue. Juntonan israelítalanan jun seiton cosalacanan quimin jominlanue. Jun tsanquenan Israel to miyalanan uyan seiton jutsaca quimiyalaquinue.

9 Junto israelítalanan Miya Diosica nosasa seiton quilaquinue. Dubi epe diosie tinun moldelaca se tinun posto quilaquinue. Wa pueblolabi, junsi na pueblolabi quilaquinue. 10 Junsi dulabi wa sulaca wirucarilaquinue diosi molde quito. Junsi jun dulabi Asera diosie tinun moldecanan wirucarilaquinue. Duque dulabi, junsi wa chide pele tenpe quilaquinue. 11 Junto duque seiton cosa quilaquinue. Miya Diosi seiton tsachilaca yalachi tote nechi larica jominue; aman israelítalanan jun cuwentanan quito, epe diosie tinun moldelachi cate insienso lucuca nin polaquinue. Seiton animali cosa quilaquinan, Miya Diosi yalaca duque painue. 12 Miya Diosi tuca paca jominue epe diosie tinun moldelaca se tilatitusa; juntonan yalari merátuto, tsanquinilaquinue.

18 Jun tenchi Miya Diosi Israel tobi chumin israelítalaca duque paito yalachi tobi nechi larito, yachite nechi joque suwanue. Yalaca jera larito, Judá tobi chumin israelítalacari yalachi tobi puranue.

24 Junni Israel tobi chuminlaca uyan tobi chusa eretobi, Asiria to miya uyan tsachilaca Israel tobi chularasa erenue. Babilóniabi chumin jominlaca erenue. Cútabi chumin jominlaca, Avabi chumin jominlaca, Hamátibi chumin jominlaca, junsi Sefarvaimbi chumin jominlaca erenue. Junto israelítalachi pueblolabi chularasa erenue Samaria tote. (Jun mate Israel tinun jomin toca Samaria tinun ica jominue.) Junni yalari Samaria toca jera tsacumin ito jun pueblobi chudilainue. 25 Juntonan ya tsachilari junte chularato, Miya Diosica se tilatitunue; junnan Miya Diosiri luquelaca erenue. Junnan luquelalari yala weyanlaca totelaquinue. 26 Junnan Asiria to miyabe itsantibi jilainue: Nu Samaria tobi chusa ereca jun tsachila duque padeseilainae. Yalari israelítalachi Diosica se tino miitolajoe. Junnan jun tobi chumin Diosi paito, luquelaca erenae tinue. Junni jun to Diosica se tino miitolajonan, luquela yalaca totenae tinue.

27 Junni Asiria to miya yaca meráto, itsantinue: Israelita patele mancaca Asíriabi neyalaquede! yape Samáriabi chumin tsachilaca micarisa. Israelítalaca chiquilachi toca tanjato, patelelacanan petanjaca jominlanue. Junto israelita patele Samáriabi manchubi jino joe tinue israelita itonlaca niyaque jun to Diosica se tino jonunca micarichun. 28 Junni israelita patele manca, matu Samáriabi chumin, Betélibi chubi jinue; junto Miya Diosica se tino micarinue. 29 Tsanque micarinasanan, ya israelita itonla, yala bolon cura yalachi mite diosi tinun moldelaca quilaquinue. Matu israelítala, Samáriate chumin jominla, dulabi ya nacá quica jominlanue yalachi epe diosie tinun moldelaca se tichun. Junto israelita itonlanan yalachi epe diosie tinun moldelacanan quito, jun ya nacálabi polaquinue jerale pueblolabi.

33 Junto ya israelita itonlari Miya Diosica se tinatonan, epe diosie tinun moldelacanan pe se tinaminlanue. Yala nuwiri nechi jato, yalachi mite quinaminlanue.