2 Junni man nete Siria soldadola Israel to soldadolabe quicaato, síriolari israelita sona na mancaca mantato tachun tanjica jominlanue. Junni ya sona nari Naamanchi sonachi peyun sona na jominue. 3 Junni man nete ya nari yachi patronabe itsantinue:

—Samaria pueblote Diosichi mantate pamin tsachi manca chue tinue Israel tobi. Junni chiquechi patronni yaca quirabi jinari, yachi lepra bichica mansechunae tinue.

4 Junni Naamanni yaca meráto, Siria miyachica jito, ya sona na paca junca cuenta quinue. 5 Junnan miyari se joe tito, itsantinue:

—Israel toca jide! Lari ya to miyachi pila quisa carito erechinayoe tinue yape yari nuca ayudaisa.

Junnan Naamanni Israel toca jinue. Jinato, man quintali medio oro, siete quintali medio cala, junsi chunca neca canbiyaquin tsansi tsanpa tanjinue. Ya jeraca epe cuwano jominue yaca janpequinan. 6 Junni Naamán yachi miya ereca jun pilacanan tanjinue Israel to miyachi cuwachun. Junni ya pilabiri itsantinaminue: In pilaca Naamanbe erenayoe lachi soldadolaca mantaminbe. Naamanca erenayoe yape nu yachi lepra quiyanca mansesa.

7 Junni Israel to miya ya pilaca quirato, duque wepananue. Junni yalachi mite yachi tsanpaca chilenue duque wepanaca joeque tenhilaisa. Junto itsantinue:

—¿Diosi joinhin? Numasitiya Diosisiri sonnasa carin, puyasa carin, quichunae tinue. ¿Niyaito Siria to miyari lepra quiyan tan tsachica manse suwachunaeque tenca can quinan? tinue. Quiralaquede! Laca paisa carino munarae quera quicaachun.

8 Junni Eliseo Diosichi mantate pamin joto, jun fiquica meráto, miyachica itsanque fiqui erenue: ¿Ti quichun nuchi tsanpaca chileyun? Epenan wepanaca joe. Ya quiyanpun tsachica lachica jasa tide! tinue. Junnan yari Israel tobi Diosichi mantate pamin tsachi chueque miichunae tinue.

9 Junni Israel to miyari Naamanca Eliséochica erenue. Junnan Naamanni yachi calu muricanun carobi manwito jito, Eliséochi ya tamolan fecári jinue. Weyan calu, titiya pejilainue. 10 Junni Eliséori yachi yabi nechi lotuminnan, yabi mantaimincari Naamanbe itsantisa erenue: Jordán pica jito, siete neca pibi wide! Junnan nuchi lepra bichi manseichunae tisa erenue.

11 Junnan Naamanni ya fiquica meráto, duque painue. Junto itsantide jinue:

—Lari Diosichi mantate pamin tsachiri yabi nechi lato, laca facaricabi jachunaeque tenca canamanyoe. Junto yari lachi cate wiruito, quiyanpun postole tedechi taquirato, yachi Miya Diosibe rocaito, lepra bichica mansechunaeque tenca canamanyoe. 12 Síriabi Damasco pueblote Abana pi joe, junsi Farfar pi joe. Ya paluca pílari jerale Israel to pílaca duque fe sen pi jolajoe. ¿Niyaito jun pílabi pipiyato manseituno joinhin? tinue.

Junni Naamanni junte nechi duque pa manjinue. 13 Junnan yachi peyunlari quelo féto, yabe itsantilatinue:

—Miya Naamán, ya Diosichi mantate pamin tsachiri duque tenfeca quisa tica jomanpari, nu quino jomin jonhoe tilatinue. ¿Tsan iton? ¿Junni nu manseichun ti quichun Jordán pibi pipiyanoca munaratiyun? tilatinue.

14 Junni yalaca meráto, Naamanni yaca se joe tito, Eliseo mantaca junca quito siete neca Jordán pibi tenpe winue. Tsan ito tsa manseica inue. Yachi quidori nachi quido cuwenta manhinue. 15 Junni yari, jerale yabe penenaminlabe, manaman Eliséochica jilainue. Junni Naamán Eliséochi cate itsantinue:

—Amana mirayoe tinue inte Israel tobi tsa Diosi patsa chueque. Uyanchiri itoe tinue.