Elíaca jamochi tanlonunca
2
Junni Miya Diosi Elíaca wu soritinanunchi jamochi tanjino ma fenue. Junnasa Elíari, yabe ayudaimin Eliséobe, Gilgal pueblobi nechi jilainue.6 Junto minute jilainato, Elías Eliséobe itsantinue:
—Nuri inte puraino munaratori, puraide! Miya Diosiri laca Jordán pica jisa tie tinue.
Junnan Eliséori beco pato, itsantinue:
—La Miya Diosichi cate, nuchi cate, nuca mancari puratuanaeque juraquinayoe tinue.
Junto palunan Jordán pica jilainue. 7 Jun jilainasari, mante chunca Diosichi mantate pano miimin tsachila jabile wiruichun jalainue Elíachi caquele. Junni Elíabe Eliséobe Jordán pi fiquile wiruilainue. 8 Junsi Elías yachi panu nannunca tepato, pibi quechutenue. Jun tsanquinan, piri man nanchi man nanchi joqueinue. Junnan palunan pi fuicase polelainue. 9 Jun pica polelaitobi, Elías Eliséobe itsantinue:
—La nube capenenasanan, nuchi tenchi ti quino jonunca pade! tinue.
Junnan Eliseo itsanque beco panue:
—Nuri Diosichi sonba duque tae; junni lari palu tsansi tano munarayoe tinue.
10 Junni Elías manpato, itsantinue:
—Nuri duque tenfeca panhaca joe. Junni la nuchile nechi jamochi jinaminca quiratori, Diosi nu panhaca junca cuwachunaeque mirachunae. La jamochi jinaminca quiratunari, Diosi cuwatuchunae tinue.
11 Junni minute tsanque cuenta quede jilainasa, pansile nechi ninca caro quica jun quirainue; junsi muricamin calunan ninca quica jun quirainue. Junni Elíabe Eliséobechi quitsale janasa, Elíaca wu soritinanun jato jamochi tanjinue. 12 Junni Eliséori yaca quirato, itsanque otinue:
—Elías, nuri lachi apa cuwenta jominhe. Junsi jerale israelítalachi sonban soldado bolon cuwenta jominhe tinue.
Juntele nechi Eliséori Elíaca wari manquiratunue.
Eliseo Diosichi mantate paminla tala fe jonunca
Junnunbi Eliséori yachi tsanpaca cato, quitsale chilenue. 13 Junni Elíachi panu quepoica junca cato, Jordán pica manjanue. Pi fiquile wiruito, 14 pica jun panuchi quechuteto, otito itsantinue:
—Elíachi Miya Diosi, lachinan sen quito quirawode! tinue.
Jun tsantinunsile, piri man nanchi, man nanchi joqueinue. Junnan Eliséori pi fu inan, pi fu icase manpolajanue. 15 Junni mante chunca Diosichi mantate pano miiminlari Eliséoca quiranaminlanue. (Yala Jericobi nechi jominlanue.) Junni yalari junca quirato itsanlatinue:
—Matu Elías sonba tanunca, amana Eliseo tae latinue.
Junni yaca tulaibi jilaito, yachi cale telenhilainue.