6
Jaun₂ në́₃, juɨ₁dsiá₁ jniog₄ cau₅ jág₁ le₂ꞌuɨg₅₄ quióꞌ₅ Cristo a₂ma₂ca₂jme₁tag₅ jniog₄. Ma₃dsau₅₄ jniog₄ ne₄ juɨ₅ ia₁jaun₂ lén₂ jniog₄ dsa₂ ma₂ron₂. Tsá₃ ma₂ꞌnióꞌ₅ juaꞌ₅₄ a₂quián₂ táng₃ jniog₄ ꞌuɨg₅₄ jág₁ juɨ₁liaꞌ₂ jë₁jme₂tsɨ́n₃ dsa₂ dsɨ́₅ a₂tsá₃ ma₂jmo₂₃ juɨ₁liaꞌ₂ a₂jiog₂₃ juɨ₅ ꞌmú₃, juɨ₁liaꞌ₂ ꞌa₂ liaꞌ₂ rë₂ꞌén₂ dsa₂ jág₁ quióꞌ₅ Diú₄ në́₃;
2 tsá₃ ma₃ꞌnióꞌ₅ juaꞌ₅₄ caun₂ jme₁tag₅ jniog₄ juɨ₁liaꞌ₂ a₂chon₅ dsa₂ jmɨg₂, juɨ₁liaꞌ₂ a₂quiog₂ dsa₂ gu₂ ne₄ quióꞌ₅ dsa₂, juɨ₁liaꞌ₂ a₂jenꞌ₅₄ dsa₂ jɨn₄ ꞌlag₄, on₃ guë́₄ juɨ₁liaꞌ₂ a₂qui₃dsɨ₅ Diú₄ ꞌéiꞌ₃ co₂tan₅₄ në́₃.
3 Le₂jaun₂ jmó₁ bá₄ jniog₄, a₂dsau₅₄ ne₄ juɨ₅, chi₂juaꞌ₂ jme₃ꞌo₅₄ Diú₄.
4 Ia₁ juɨ₁liaꞌ₂ dsa₂ i₂ma₂ca₂rë₃ŋɨ́ꞌ₂ dsɨ́₅, dsa₂ i₂ma₂ca₂rë₃cuɨ́ꞌ₅ ꞌa₂ liaꞌ₂ ꞌua₁ dsɨ́₅ Diú₄, dsa₂ i₂ca₂tɨ́n₂ jma₂meꞌ₂ quióꞌ₅ Jme₂dsí₂ Jŋió₅,
5 dsa₂ i₂ma₂ca₂rë₃cuɨ́ꞌ₅ a₂dse₃ jág₁ quióꞌ₅ Diú₄, dsa₂ i₂ma₂ca₂rë₃cuɨ́ꞌ₅ bí₂ quióꞌ₅ mɨ₂güɨ́g₃ a₂jiá₃;
6 në₁juaꞌ₂ ca₂i₃léin₂ táng₃ cau₅ juɨ₅,a tsá₃ ma₃lé₂ dsɨ₁te₁ jniog₄ jaun₂ jéinꞌ₃ táng₃ dsɨ́₅, ia₁ në₂jag₄ bá₄ a₂tioin₂₃ táng₃ cróg₄ Ja₁ŋiꞌ₅₄ Diú₄ le₃quióꞌ₅ guioin₅₄, jaun₂ cheiꞌ₂₃ të₃jɨn₄ dsa₂ ia₁jaun₂ cán₂ ꞌéi₂ o₂guíꞌ₃.
7 A₂lɨ́n₅ dsa₂ ꞌéi₂ liaꞌ₂ lë́₅ guaꞌ₅₄ ꞌuë₃ a₂ꞌɨ́nꞌ₅ jmɨ́₅ liaꞌ₂ co₂ráun₂ téin₃ ne₄ quióꞌ₅. Në₁juaꞌ₂ ca₂rau₂ dse₃ guaꞌ₅₄ ꞌuë₃ jaun₂ quióꞌ₅ dsa₂ i₂ca₂jmo₃ ta₁ ja₁jaun₂, jaun₂ lé₂ le₃jmóꞌ₂ ta₁ ꞌa₂ conꞌ₂ ca₂rau₂, jaun₂ jme₃guꞌ₅₄ bá₄ Diú₄.
8 La₁ në₁juaꞌ₂ ca₂ꞌia₂ nɨ₁taun₅ quianꞌ₅₄ nɨ₁nau₂, jaun₂ tsá₃ ma₃ta₁ tí₄ ꞌuë₃ jaun₂; goꞌ₂ a₂ꞌë́₂ Diú₄ uɨg₅. Jë₁ca₂tóꞌ₂ jaun₂, dsɨ́ꞌ₂ bá₄ dsa₂.
A₂ꞌéin₂ bá₄ jniog₄ jmo₅ a₂tióng₂ tiá₂
9 Rɨnꞌ₅₄ jniog₄, o₁jŋiaꞌ₅₄ ma₂në₂juaꞌ₅₄ jniaꞌ₅₄ le₂në₅, caun₂ bá₄ ꞌei₅ dsɨ₅ jniaꞌ₅₄ a₂jmoꞌ₂ ꞌniaꞌ₂ dse₃ guë́₄ conꞌ₂ guë́₄ a₂jaun₂, a₂chanꞌ₅₄ ꞌniaꞌ₂ tiá₂ jág₁ a₂liónꞌ₂ ꞌniaꞌ₂.
10 Ia₁ dse₃ bá₄ dsɨ́₅ Diú₄, tsá₃ juaꞌ₅₄ a₂dsɨ₃ꞌén₂ dsɨ́₅ ca₂le₃jë́₃ a₂ma₂jmoꞌ₅₄ ꞌniaꞌ₂, quianꞌ₅₄ ca₂le₃jë́₃ ꞌa₂ liaꞌ₂ lë́₅ a₂ꞌnióiꞌ₃, a₂rë₂jniá₂ ia₁ a₂ma₂jme₂ꞌonꞌ₅₄ ꞌniaꞌ₂ dsa₂ rɨnꞌ₅₄ jniog₄ i₂ꞌén₂, juɨ₁liaꞌ₂ caun₂ jmoꞌ₂ ꞌniaꞌ₂ rë₂në́₃.
11 ꞌƗ́n₅ bá₄ dsɨ₅ jniaꞌ₅₄ a₂jmóꞌ₂ ꞌniaꞌ₂ le₂jaun₂ a₂dsen₅₄ ꞌauꞌ₂ le₂jangꞌ₂ le₂jangꞌ₂ ca₂të₂ jë₁ca₂tóꞌ₂, ia₁jaun₂ lénꞌ₄ ꞌniaꞌ₂ co₂ŋeiꞌ₅₄ ca₂le₃jë́₃ a₂ꞌɨ́n₂ ꞌauꞌ₂ ꞌniaꞌ₂.
12 Tsá₃ ꞌniog₂ jniaꞌ₅₄ juaꞌ₅₄ a₂le₃juɨnꞌ₃ ꞌniaꞌ₂, la₁ të₂le₃ o₁nóꞌ₅ ꞌniaꞌ₂ ne₄ juɨ₅ quióꞌ₅ dsa₂ i₂ma₂ꞌén₂ i₂ma₂juɨnꞌ₂ dsɨ́₅ në́₃ jaun₂ ca₂tɨ́in₂ a₂dse₃ liaꞌ₂ conꞌ₂ lë́₅ jág₁ quióꞌ₅ Diú₄ a₂ma₂cuë₃.
13 Liaꞌ₂ conꞌ₂ jme₁ca₂cuë₃ Diú₄ jág₁ quióꞌ₅ ca₂cuë́ꞌ₃ Abraham, ca₂ꞌɨin₃ ꞌŋiog₅, ia₁ ca₂liaꞌ₂ ꞌi₁jan₂ i₂siánꞌ₂ tsá₃ jme₁chan₂ i₂juɨnꞌ₂ guë́₄ juaꞌ₅₄ i₂ꞌɨin₃.
14 Jaun₂ ca₂juáꞌ₂: “Të₃dsónꞌ₂ bá₄ jme₁guꞌ₅₄ jniá₂ ꞌne₂ ꞌŋio₅ lɨn₃, jaun₂ cuɨ́n₄ jniá₂ ꞌne₂ juɨn₅ tsɨ₁jon₂.”b
15 Juɨnꞌ₂ bá₄ dsɨ́₅ Abraham ca₂jŋia₃, jaun₂ ca₂gue₃ bá₄ liaꞌ₂ conꞌ₂ lë́₅ jág₁ a₂jme₁ma₂cuë₃ Diú₄.
16 Juɨ₁liaꞌ₂ jë₁ꞌɨn₅ dsa₂ mɨ₂güɨ́g₃ Diú₄, ꞌɨin₂₃ juɨ₁liaꞌ₂ i₂lɨ́n₅ i₂juɨnꞌ₂ conꞌ₂ guë́₄ guioin₅₄, a₂jángꞌ₅ jág₁ dsau₅ a₂dsónꞌ₂ bá₄ tí₅ jág₁, jaun₂ co₂në₅ bá₄ dsan₂ mɨꞌ₅₄ a₂nióiꞌ₅ quianꞌ₅₄ rɨinꞌ₅₄.
17 Ján₃ bá₄ le₂në₅ ca₂jmo₃ Diú₄ ia₁ a₂jme₁ꞌnio₃ jme₃jnia₅ ja₁con₂ dsa₂ i₂ca₂tɨ́n₂ gue₃ liaꞌ₂ conꞌ₂ lë́₅ jág₁ a₂ca₂cuë₃, a₂tsá₃ jme₂tsɨ́in₃ ꞌa₂ liaꞌ₂ dsɨ₂jiog₅ dsɨ́₅ jmo₃ ja₁coin₂. Ca₂ꞌɨin₃ ꞌŋiog₅ ca₂jángꞌ₃ jág₁ dsau₅ a₂dsónꞌ₂ bá₄ tí₅ jág₁ quióꞌ₅ a₂ma₂cuë₃.
18 Jaun₂ në́₃, të₂le₃ quianꞌ₅₄ tɨn₃ ne₅₄ jág₁ në₅ a₂tsá₃ lé₂ le₃tsɨ́n₃ a₂tsá₃ lé₂ le₃jmo₃ Diú₄ të₂jɨ́in₁, (co₂ꞌnióꞌ₄ le₃juaꞌ₅₄ jág₁ a₂ca₂cuë₃ Diú₄, quianꞌ₅₄ jág₁ a₂ca₂ꞌɨin₃ ꞌŋiog₅), jaun₂ guéi₁ bá₄ jniog₄ liánꞌ₂ bén₂ juɨ₁liaꞌ₂ jniog₄ i₂ma₂cuɨng₅₄ a₂dsɨ₁lion₅₄ ja₁coin₂, ia₁jaun₂ chanꞌ₅₄ jniog₄ tiá₂ jág₁ a₂ꞌɨ́n₂ dsɨ₅ jniog₄.
19 A₂bén₂ bá₄ jág₁ jaun₂ a₂jmo₅ a₂tióng₂ tiá₂ të₂dsɨ₅ jniog₄, juɨ₁liaꞌ₂ bén₂ nɨ₁ꞌláꞌ₂ quióꞌ₅ nɨ₁barco jë₁ma₂ca₂quian₃ tiá₂ ca₂të₂ ꞌuɨg₅₄ jmɨ₁ŋíꞌ₄. Jág₁ a₂ꞌɨ́n₂ dsɨ₅ jniog₄ jaun₂, a₂ꞌí₂ bá₄ ca₂të₂ ja₁jŋió₅ guë́₄ ca₂të₂ ꞌŋióꞌ₃ ꞌmɨꞌ₂ jŋió₅,
20 ja₁ca₂ꞌí₃ Jesús o₄quián₂ jniog₄, ca₂dsiáinꞌ₃ ne₄ juɨ₅ quián₂ jniog₄, ia₁ a₂ca₂lɨin₃ jme₂dsa₂ dsen₅₄ co₂tan₅₄, ca₂ne₅₄ liaꞌ₂ jme₁lɨ́n₄ Melquisedec.