2 Jaun₂ juɨ₁liaꞌ₂ jme₂dsa₂ le₂ꞌéi₂, ján₃ bá₄ lɨ́in₅ dsa₂ mɨ₂güɨ́g₃ a₂ꞌuain₅₄; lé₂ bá₄ jme₃ꞌua₁ dsɨ́₅ ja₁con₂ juɨ₁liaꞌ₂ dsa₂ i₂tsá₃ ŋi₅, juɨ₁liaꞌ₂ dsa₂ i₂ma₂i₂nio₄ cau₅ juɨ₅ në́₃.

3 ꞌUɨg₅₄ ia₁ a₂lɨ́in₅ dsa₂ mɨ₂güɨ́g₃ ꞌuain₅₄, tion₅₄ ꞌnióꞌ₅ jénꞌ₃ ne₄ Diú₄, liaꞌ₂ o₄quióꞌ₄ dsáu₁ ꞌŋiog₅ liaꞌ₂ o₄quióꞌ₄ dsáu₁ dsa₂ juɨg₂ táng₃.

4 ꞌI₁jan₂ tsá₃ lé₂ le₃lén₂ ta₁ juëꞌ₂ jaun₂ juaꞌ₅₄ a₂le₃ꞌɨin₃ ꞌŋiog₅; tion₅₄ bá₄ ꞌnióꞌ₅ ꞌag₃ Diú₄ juɨ₁liaꞌ₂ ca₂ꞌɨin₃ Aarón.^a

5 Ján₃ bá₄ le₂në₅ lë́₅ quianꞌ₅₄ Cristo. Tsá₃ ca₂jme₃juɨinꞌ₂ ꞌŋiog₅ juaꞌ₅₄ ca₂ꞌɨin₃ ꞌŋiog₅ a₂léin₂ jme₂dsa₂ dsen₅₄; Diú₄ bá₄ ca₂ꞌag₃ ta₁ juëꞌ₂ jaun₂. Jaun₂ ca₂juáꞌ₂ Diú₄:

6 Ján₃ bá₄ le₂në₅ juáꞌ₂ ja₁siáꞌ₂ táng₃:

7 Liaꞌ₂ conꞌ₂ jme₁chan₂ Jesús mɨ₂güɨ́g₃ la₂, ca₂mɨ₃ tiá₂ ne₄ Diú₄ Jmei₂, ca₂ꞌo₃ a₂jme₁mɨ₂₃ tion₅₄ ne₄ ꞌéi₂ i₂ꞌio₅ bí₂ a₂jme₁lió₂ ne₄ ꞌmú₃. Jaun₂ Diú₄ në́₃ ca₂nág₂ bá₄ quióꞌ₅, ꞌuɨg₅₄ ia₁ a₂ca₂nág₂ gau₂ jág₁ quióꞌ₅ ꞌéi₂.

8 O₁jŋiaꞌ₅₄ jme₁lɨ́in₄ Ja₁ŋiꞌ₅₄ Diú₄, ca₂rë₃tɨ́in₃ a₂nag₃ gau₂ të₂le₃ quianꞌ₅₄ uɨg₅ a₂ca₂i₃ŋɨ́i₂.

9 Jaun₂ jme₁ca₂rë₃ꞌŋia₅ quióꞌ₅, jaun₂ guë́₄ ca₂lɨin₃ ꞌuɨg₅₄ ja₁lión₂ co₂tan₅₄ ca₂le₃jɨ́n₃ i₂nag₅ gau₂ jág₁ quióꞌ₅,

10 ia₁ Diú₄ bá₄ ca₂ꞌag₃ a₂léin₂ jme₂dsa₂ dsen₅₄ ca₂ne₅₄ liaꞌ₂ jme₁lɨ́n₄ Melquisedec.

11 ꞌLióng₂ bá₄ jág₁ le₂në₅ cha₂ a₂ꞌnióꞌ₅ juaꞌ₅₄ jniaꞌ₅₄, la₁ia₁ quian₅ ta₁ juaꞌ₅₄ a₂jme₁tɨn₅ jniaꞌ₅₄ ꞌniaꞌ₂ jág₁ në₅, ia₁ a₂ca₂lɨnꞌ₃ ꞌniaꞌ₂ cang₄ dseiꞌ₂.

12 Ma₂lɨ́gꞌ₂ bá₄ ca₂rë₃ꞌénꞌ₂ ꞌniaꞌ₂ jág₁; rë₂në́₃ le₃juaꞌ₅₄ a₂ma₂ca₂tɨ́ngꞌ₂ ꞌniaꞌ₂ léngꞌ₂ të₅. La₁ tion₅₄ bá₄ ꞌnióꞌ₅ jme₃tag₅ táng₃ dsa₂ quianꞌ₅₄ ꞌniaꞌ₂ jág₁ ꞌua₁ le₂ꞌuɨg₅₄ quióꞌ₅ Diú₄, në₂jag₄ bá₄ a₂ꞌnióꞌ₅ ꞌagꞌ₅₄ ꞌniaꞌ₂ jmáꞌ₃ dsiꞌ₅₄, ꞌnióꞌ₄ a₂jme₁quɨ́gꞌ₂ ꞌniaꞌ₂ ŋɨ́₅.

13 Jaun₂ juɨ₁liaꞌ₂ dsa₂ i₂ꞌɨ́nꞌ₂ jmáꞌ₃ dsiꞌ₅₄, lɨ́in₅ juɨ₁liaꞌ₂ lɨ́n₅ guein₂ i₂tsá₃ lɨn₄ tɨn₂ jág₁ quióꞌ₅ juɨ₅ co₂dsau₅.

14 Juɨ₁liaꞌ₂ má₃ quióꞌ₅ dsa₂ canꞌ₅₄ në́₃, lë́₅ jmáꞌ₃ quióꞌ₅ dsa₂ ma₂ron₂, quióꞌ₅ dsa₂ i₂ma₂ꞌen₅₄ dsɨ́₅ i₂ca₂rë₃tɨ́n₃ i₂ca₂rë₃ŋi₅ na₂ juɨ₅ dse₃, na₂ juɨ₅ ꞌlɨgꞌ₅₄ ꞌe₂.