4
ꞌUɨg₅₄ jaun₂, të₁liaꞌ₂ ron₅ guë́₄ jág₁ a₂ma₂cuë₃ Diú₄ a₂dsi₁no₃ jniog₄ ja₁dsɨ₁jŋia₁ ja₁coin₂, ꞌnióꞌ₅ jmó₁ jniog₄ ꞌí₁ conꞌ₂ tsá₃ ŋó₅ në₁juaꞌ₂ ꞌein₂ ꞌniaꞌ₂ tsá₃ ca₂tɨ́ngꞌ₂ ja₁jaun₂.
2 Ia₁ ján₃ bá₄ le₂jaun₂ ma₂ca₂rë₃ꞌë́₂ jág₁ a₂lió₂ ja₁con₂ jniog₄ juɨ₁liaꞌ₂ ma₂ca₂rë₃ꞌë́₂ ja₁con₂ ꞌéi₂; la₁ia₁ tsá₃ ta₁ ca₂jmo₃ co₂ŋɨ́₂ a₂ca₂nág₂ jág₁, ꞌuɨg₅₄ ia₁ a₂tsá₃ ca₂ꞌan₂ dsɨ́₅ jág₁ jaun₂ juaꞌ₅₄ a₂ca₂rë₃ꞌéin₂.
3 La₁ jniog₄ i₂ma₂ca₂rë₃ꞌéin₂ në́₃, dsi₁no₃ bá₄ jniog₄ dsɨ₁jŋia₁₂ ja₁jaun₂ juɨ₁liaꞌ₂ a₂ma₂juáꞌ₂ Diú₄:
ꞌUɨg₅₄ jaun₂ ca₂ꞌɨ́n₃ jniá₂ ꞌŋió₃,
jme₁ca₂ꞌí₃ ꞌnei₂ dsɨ₃,
a₂tsá₃ dsi₁len₃ ꞌéi₂
juaꞌ₅₄ jŋia₃ ja₁con₂ jniá₂.a
La₁ia₁ ma₂ca₂ꞌióꞌ₃ ta₁ quióꞌ₅ Diú₄ ca₂le₃ ca₂ꞌnio₃ mɨ₂güɨ́g₃.
4 Ia₁ cha₂ ja₁juáꞌ₂ ne₄ Si₂ le₂la₂, a₂ꞌë₂₃ jë₁ca₂të́₂ guio₃ jmɨg₄: “Ca₂jŋia₃ Diú₄ jë₁ca₂të́₂ guio₃ jmɨg₄, jme₁ca₂lë₃ ca₂le₃jë́₃ ta₁ quióꞌ₅.”b
5 Conꞌ₂ siáꞌ₂ táng₃ juáꞌ₂ ne₄ Si₂: “Tsá₃ dsi₁lein₃ juaꞌ₅₄ a₂jŋia₃ ja₁con₂ jniá₂.”
6 La₁ juɨ₁liaꞌ₂ chan₂ i₂lɨn₅₄ i₂ꞌnióꞌ₅ tónꞌ₃ ja₁jaun₂, i₂siánꞌ₂ guëꞌ₂ tsá₃ ca₂i₁tionꞌ₅₄ le₂jŋiá₅ jme₁ca₂nág₂ jág₁, ꞌuɨg₅₄ ia₁ a₂tsá₃ ca₂rë₃ꞌéin₂,
7 conꞌ₂ siáꞌ₂ ca₂tióng₃ Diú₄ caun₂ jmɨg₄ ca₂juáꞌ₂ të₂le₃ quianꞌ₅₄ David ꞌlióng₂ ŋi₂ cang₂ jaun₂ ca₂të́ꞌ₃ “jmɨg₄ në₃” jme₁ca₂juáꞌ₂ ne₄ Si₂ jág₁ a₂ma₂ca₂juáꞌ₂ le₂jŋiá₅:
Jmɨg₄ në₃ në₁juaꞌ₂ ca₂neiꞌ₂ ꞌniaꞌ₂ jág₁ quióꞌ₅ Diú₄,
tsá₃ lë₁jme₂ꞌuáꞌ₂ ꞌniaꞌ₂ ꞌauꞌ₂.c
8 Ia₁ juaꞌ₅₄ meiꞌ₂ guë́₃ Josué ca₂cuë₃ caun₂ ja₁jŋia₃ dsa₂, tsá₃ jaun₂ jme₁juáꞌ₂ Diú₄ cang₂ jaun₂ jme₁ꞌë₃ jmɨg₄ siáꞌ₂.
9 Jaun₂ lë₃, liaꞌ₂ ma₂cha₂ jaun₂ bá₄ jmɨg₄ sa₅₄* ja₁jŋia₅ dsa₂ juɨg₂ quián₅ Diú₄.
10 Ia₁ juɨ₁liaꞌ₂ ca₂jŋia₃ Diú₄ ta₁ quióꞌ₅ a₂ca₂jmo₃, ján₃ bá₄ le₂jaun₂ juɨ₁liaꞌ₂ i₂dsɨ₃tonꞌ₅₄ dsɨ₃jŋia₅₄ ja₁con₂ Diú₄, tí₂ ta₁ quióꞌ₅, jŋia₃.
11 ꞌUɨg₅₄ jaun₂ ꞌnióꞌ₅ ꞌniogꞌ₅₄ jniog₄ juɨ₅ a₂quenꞌ₂ bí₂ a₂dsi₁no₃ ja₁jaun₂, ia₁jaun₂ ꞌi₁jan₂ tsá₃ ꞌein₂ tiánꞌ₃ a₂cán₂ juɨ₅ a₂ca₂i₁nio₄ ꞌéi₂ a₂tsá₃ ca₂nág₂ gau₂ jág₁ quióꞌ₅ Diú₄.
12 Ia₁ jénꞌ₃ bá₄ jág₁ quióꞌ₅ Diú₄, ꞌio₅ bí₂ në́₃, ꞌŋio₅ chenꞌ₂ conꞌ₂ guë́₄ caun₂ ŋi₁tág₂ ꞌmu₃ le₃tɨn₃ ton₂, dsɨ₂tia₃ ca₂të₂ néꞌ₃ jmo₅ le₁dsoꞌ₅₄ të₂dsɨ́₅ dsa₂ quianꞌ₅₄ jme₂dsí₂, jmo₅ le₁dsoꞌ₅₄ ja₁jónꞌ₅ quianꞌ₅₄ dsɨ́₅ nɨ₁mu₅ në́₃, jme₂jnia₅ ca₂le₃jë́₃ ꞌe₂ dsɨ₂jiog₅ dsɨ́₅ dsa₂, ca₂le₃jë́₃ ꞌa₂ liaꞌ₂ lɨ́n₂ dsa₂ në́₃.
13 Ca₂liaꞌ₂ ꞌi₁caun₂ a₂ca₂jmo₃ Diú₄ tsá₃ lé₂ le₃ꞌmá₂ ne₄ ꞌéi₂; ca₂le₃jë́₃ bá₄ rë₂jniá₂ rë₂na₄ ne₄ i₂dsɨ₁jangꞌ₅₄ jniog₄ cuenta quián₂.
Lɨ́n₅ Jesús Jme₂dsa₂ Dsen₅₄ i₂juɨnꞌ₂
14 Jaun₂ në́₃, jme₂dsa₂ dsen₅₄ i₂juɨnꞌ₂ quián₂ jniog₄ lɨ́n₅ Jesús, Ja₁ŋiꞌ₅₄ Diú₄, i₂ca₂uɨ́g₂ gueiꞌ₅₄ i₂juɨ́g₃. ꞌUɨg₅₄ jaun₂ ꞌnióꞌ₅ caun₂ chanꞌ₅₄ jniog₄ tiá₂ jág₁ a₂ꞌéin₂ jniog₄.
15 On₃juaꞌ₅₄ a₂tsá₃ lé₂ dsia₃ ŋéi₂ dsɨ́₅ jme₂dsa₂ dsen₅₄ quián₂ jniog₄ jë₁ma₂ca₂ꞌuáu₂ jniog₄. Ia₁ ma₂ca₂caun₃ dsa₂ ca₂le₃jë́₃ táu₂ quióꞌ₅, juɨ₁liaꞌ₂ cáun₂ dsa₂ táu₂ jniog₄, la₁ia₁ tsá₃ dso₄ ca₂ꞌnáu₂ ꞌéi₂.
16 Jaun₂ në́₃ ma₃ jme₁quián₄ jniog₄ caun₂ bá₄ ꞌei₅ dsɨ₅ ca₂të₂ ne₄ta₁ ja₁guá₄ Diú₄ i₂ꞌua₁ dsɨ́₅, ia₁jaun₂ dsia₃ ꞌéi₂ ŋéi₂ dsɨ́₅, a₂jme₃ꞌo₅₄ a₂ꞌua₁ dsɨ́₅ jë₁ma₂ca₂rë₃ꞌnióꞌ₅ quián₂ jniog₄.