Lɨ́n₅ Jesús jme₂dsa₂ ca₂ne₅₄ liaꞌ₂ jme₁lɨ́n₄ Melquisedec
7
Melquisedec ꞌéi₂ në́₃ jme₁lɨ́n₄ rag₅₄ quián₅ juɨg₂ Salem, jme₁lɨ́in₄ jme₂dsa₂ në́₃ quián₅ Diú₄ i₂juɨnꞌ₂ guë́₄ lɨn₃. Liaꞌ₂ conꞌ₂ jme₁ca₂jónꞌ₃ Abraham jme₁ca₂lɨ́ꞌ₃ ꞌnei₂ a₂ca₂jmo₃ quianꞌ₅₄ rag₅₄ siánꞌ₂, jaun₂ ca₂o₃ꞌɨ́n₃ Melquisedec ca₂jme₃quiongꞌ₅₄ ca₂jme₃guꞌ₅₄ quióꞌ₅.
2 Ca₂cuë₃ Abraham ca₂cuë́ꞌ₃ Melquisedec caun₂ quiꞌ₅₄ a₂guia₃ conꞌ₂ tí₅ a₂ca₂lɨ́ꞌ₃ jë₄ ꞌnei₂. Le₂ne₁, jág₁ liaꞌ₂ chen₂ Melquisedec co₂ꞌnióꞌ₄ le₃juaꞌ₅₄, Rag₅₄ Dsen₃; jaun₂ táng₃, ia₁ a₂jme₁lɨ́in₄ rag₅₄ quián₅ juɨg₂ Salem, ja₁ꞌnióꞌ₄ le₃juaꞌ₅₄, ja₁ꞌei₅ tei₄, ján₃ bá₄ le₂jaun₂ jein₅ jág₁, rag₅₄ ja₁ꞌei₅ tei₄.
3 Tsá₃ jág₁ cha₂ juaꞌ₅₄ chan₂ jmei₂ on₃ guëꞌ₂ chog₅₄, on₃ guëꞌ₂ dsa₂ canꞌ₅₄ quiáin₅; ján₃ bá₄ tsá₃ jág₁ cha₂ ꞌe₂ jmɨg₄ ca₂rë₃cháin₃, on₃ guë́₄ ꞌe₂ jmɨg₄ ca₂join₃ në́₃. Jaun₂ caun₂ lɨ́in₅ jme₂dsa₂ co₂tan₅₄ liaꞌ₂ lɨ́n₅ Ja₁ŋiꞌ₅₄ Diú₄.
4 Në₃ në́₃, quion₂ ꞌniaꞌ₂ ꞌí₁, ꞌŋio₅ lɨn₃ jme₁juɨnꞌ₂ Melquisedec, ca₂liaꞌ₂ jŋia₅ ꞌŋiog₅ Abraham, dsa₂ juɨnꞌ₂ quián₂ jniog₄, ca₂cuë́ꞌ₃ ꞌéi₂ caun₂ quiꞌ₅₄ a₂guia₃ conꞌ₂ tí₅ a₂ca₂lɨ́ꞌ₃ quióꞌ₅ rag₅₄ jë₄ ꞌnei₂.
5 Dsau₅ bá₄, liaꞌ₂ conꞌ₂ lë́₅ ꞌÉiꞌ₃ quióꞌ₅ Moisés në́₃, juɨ₁liaꞌ₂ dsa₂ tsɨ₁jon₂ Leví i₂ca₂lɨn₃ ta₁ quióꞌ₅ jme₂dsa₂, ca₂tɨ́in₂ cán₂ caun₂ quiꞌ₅₄ a₂guia₃ quióꞌ₅ dsa₂ juɨg₂ ca₂le₃jë́₃ a₂jme₁cha₂ quióꞌ₅, o₁jŋiaꞌ₅₄ jme₁lɨ́in₄ dsa₂ tsɨ₁jon₂ Abraham rɨinꞌ₅₄, juɨ₁liaꞌ₂ lɨ́in₅ guioin₅₄ táng₃.
6 La₁ia₁ Melquisedec në́₃, o₁jŋiaꞌ₅₄ guë́₄ tsá₃ jme₁lɨ́in₄ tsɨ₁jon₂ Leví, ca₂gue₃ caun₂ quiꞌ₅₄ a₂guia₃ quióꞌ₅ Abraham, ca₂jme₃guꞌ₅₄ në́₃ quióꞌ₅ i₂jme₁ma₂ca₂gue₃ jág₁ a₂ma₂cuë₃ Diú₄.
7 Tsá₃ ꞌein₂ lé₂ le₃juáꞌ₂ a₂tsá₃ tí₅ jág₁ la₂: A₂juɨnꞌ₂ guë́₄ dsa₂ i₂jme₂guꞌ₅₄ conꞌ₂ guë́₄ dsa₂ i₂gue₅ a₂jme₂guꞌ₅₄ jaun₂.
8 Jaun₂ jɨn₄ jniog₄, juɨ₁liaꞌ₂ i₂gue₅ caun₂ quiꞌ₅₄ a₂guia₃ lɨ́n₅ dsa₂ i₂dsan₂; la₁ia₁ të₂le₃ quióꞌ₅ Melquisedec juáꞌ₂ ne₄ Si₂ ꞌɨin₂₃ ꞌéi₂ në₂jag₄ bá₄ jan₂ dsa₂ i₂caun₂ chan₂.
9 Meiꞌ₂ tsá₃ lé₂ le₃juaꞌ₅₄, juɨ₁liaꞌ₂ Leví quianꞌ₅₄ le₃jɨ́n₃ jme₂dsa₂ tsɨ₁jon₂ ꞌéi₂, juɨ₁liaꞌ₂ i₂gue₅ quiꞌ₅₄ a₂guia₃ rë₂në́₃, ján₃ bá₄ ca₂quí₃ caun₂ quiꞌ₅₄ a₂guia₃ ja₁con₂ Melquisedec jme₁ca₂quí₃ Abraham,
10 ia₁ co₂ꞌnióꞌ₄ a₂jme₁ma₂lɨ́n₅ bá₄ Leví tsɨ₁jon₂ Abraham o₁jŋiaꞌ₅₄ guë́₄ tsá₃ jme₁ma₂chain₂, liaꞌ₂ conꞌ₂ jme₁ca₂cuë₃ Abraham quiꞌ₅₄ a₂guia₃ ca₂cuë́ꞌ₃ Melquisedec.
11 Ca₂gue₃ dsa₂ juɨg₂ Israel ꞌÉiꞌ₃ të₂le₃ quianꞌ₅₄ jme₂dsa₂ levitas, i₂lɨ́n₅ tsɨ₁jon₂ Aarón. Jaun₂ në́₃, juaꞌ₅₄ meiꞌ₂ guë́₃ ꞌéi₂ ca₂tióꞌ₃ jmo₃ a₂ma₂ron₂ dsa₂ të₂le₃ quianꞌ₅₄ ꞌÉiꞌ₃ jaun₂, jaun₂ tsá₃ jme₁ma₃ꞌnióꞌ₅ juaꞌ₅₄ a₂jme₁rë₃jniá₂ táng₃ jan₂ jme₂dsa₂ siánꞌ₂ i₂ca₂ne₅₄ juɨ₁liaꞌ₂ Melquisedec, on₃juaꞌ₅₄ juɨ₁liaꞌ₂ Aarón.
12 Ia₁ jë₁rë₂tsɨ́n₃ ta₁ quióꞌ₅ jme₂dsa₂, ján₃ bá₄ le₂jaun₂ ꞌnióꞌ₅ le₃tsɨ́n₃ ꞌÉiꞌ₃ ján₃.
13 Te₁guiꞌ₅₄ quián₂ jniog₄ në́₃, juɨ₁liaꞌ₂ juáꞌ₂ Si₂ le₂në₅ ꞌɨin₂₃ ꞌéi₂, a₂téin₅ tsɨ₁jon₂ siánꞌ₂, jaun₂ ꞌi₁jan₂ i₂tén₅ tsɨ₁jon₂ ꞌéi₂ tsá₃ ma₂lɨin₅ ta₁ quióꞌ₅ ne₄chei₂.
14 Ia₁ ne₄ bá₄ jniog₄, a₂ca₂rë₃chán₃ Te₁guiꞌ₅₄ quián₂ jniog₄ a₂lɨ́in₅ jan₂ tsɨ₁jon₂ quián₅ Judá. La₁ tsá₃ ꞌe₂ ca₂juáꞌ₂ Moisés ꞌɨin₂₃ tsɨ₁jon₂ ꞌéi₂ jme₁ca₂dsia₃ a₂ꞌë₂₃ juɨ₁liaꞌ₂ ta₁ quióꞌ₅ jme₂dsa₂.
15 ꞌŊio₅ guë́₄ rë₂ léi₄ táng₃ jme₁ca₂rë₃jniá₂ jan₂ jme₂dsa₂ siánꞌ₂ i₂lɨ́n₅ juɨ₁liaꞌ₂ Melquisedec,
16 tsá₃ ca₂lɨin₃ jme₂dsa₂ ꞌuɨg₅₄ ia₁ a₂quíꞌ₅ ꞌÉiꞌ₃ a₂juáꞌ₂ ꞌein₂ tsɨ₁jon₂ ꞌnióꞌ₅ jiá₃, jŋiaꞌ₅₄ liaꞌ₂ a₂lɨ́in₅ jme₂dsa₂ ꞌuɨg₅₄ bí₂ quióꞌ₅ jme₂dsí₂ a₂tsá₃ lé₂ dsɨ₃ꞌén₂.
17 Ia₁ le₂la₂ bá₄ juáꞌ₂ Diú₄ ꞌɨin₂₃ ꞌéi₂:
lɨ́nꞌ₅ ꞌne₂ jme₂dsa₂ conꞌ₂ tan₅₄,
ca₂ne₅₄ liaꞌ₂ jme₁lɨ́n₄ Melquisedec.a
18 Jaun₂ në́₃, co₂ŋeiꞌ₅₄ ca₂ꞌná₂ ꞌÉiꞌ₃ a₂jme₁lë́₄ le₂jŋiá₅, ia₁ a₂tsá₃ jme₁bén₂, a₂tsá₃ ta₁ tí₄ në́₃.
19 Ia₁ tsá₃ ca₂tióꞌ₃ ꞌÉiꞌ₃ juaꞌ₅₄ a₂jme₃ꞌŋiai₂₃ ta₁. Të₂le₃ ca₂rë₃chá₃ quián₂ jniog₄ caun₂ jág₁ a₂dse₃ guë́₄ a₂ꞌɨ́n₂ dsɨ₅ jniog₄, të₂le₃ quianꞌ₅₄ a₂lé₂ jme₁quián₄ jniog₄ ja₁con₂ Diú₄.
20 Tsá₃ ca₂cuë₃ Diú₄ jág₁ jaun₂ quióꞌ₅ a₂ꞌɨ́n₂ dsɨ₅ jniog₄ juaꞌ₅₄ tsá₃ ca₂ꞌɨin₃ ꞌŋiog₅. Juɨ₁liaꞌ₂ jme₂dsa₂ le₂jŋiá₅ në́₃, ca₂lɨin₃ ta₁ jaun₂ la₁ia₁ on₃juaꞌ₅₄ chan₂ ꞌein₂ ca₂ꞌɨn₃ Diú₄ jme₁ca₂ꞌag₃.
21 La₁ të₂le₃ quióꞌ₅ Te₁guiꞌ₅₄ quián₂ jniog₄ në́₃, chan₂ jan₂ i₂ca₂ꞌɨn₃ Diú₄ jme₁ca₂lɨin₃ jme₂dsa₂. Ia₁ ne₄ Si₂ juáꞌ₂ tsɨ́ꞌ₅ ꞌéi₂:
Ca₂ꞌɨn₃ Diú₄ ꞌŋiog₅,
jaun₂ tsá₃ lé₂ jme₃tsɨ́in₃ dsɨ́₅:
“Lɨ́nꞌ₅ ꞌne₂ jme₂dsa₂ conꞌ₂ tan₅₄,
[ca₂ne₅₄ liaꞌ₂ jme₁lɨ́n₄ Melquisedec].”a
22 ꞌUɨg₅₄ jaun₂, Jesús bá₄ i₂jmo₅ ꞌí₁ jág₁ a₂ma₂lɨꞌ₅₄ a₂dse₃ guë́₄ jaun₂.
23 Juɨ₁liaꞌ₂ jme₂dsa₂ i₂ca₂rë₃chán₃ guaꞌ₅₄ ꞌuë₃ në́₃, juɨin₅ ca₂lɨin₃, ia₁ tsá₃ ca₂cuë₃ ꞌmú₃ jmɨg₄ juaꞌ₅₄ caun₂ lɨ́in₅ ta₁ jaun₂.
24 La₁ ꞌuɨg₅₄ ia₁ a₂chan₂ Jesús co₂tan₅₄ në́₃, jaun₂ conꞌ₂ tan₅₄ bá₄ lɨ́in₅ ta₁ jme₂dsa₂.
25 ꞌUɨg₅₄ jaun₂ lé₂ le₃lióin₂ co₂ŋeiꞌ₅₄ le₃jɨ́n₃ i₂jme₂quián₃ ja₁con₂ Diú₄ të₂le₃ quianꞌ₅₄ ꞌéi₂, ia₁ chain₂ co₂tan₅₄ a₂qui₃mɨ₃ ne₄ Diú₄ o₄quióꞌ₄ le₃jɨ́n₃ ꞌéi₂.
26 Jaun₂ në́₃, dsi₂ten₅₄ bá₄ a₂lɨ́n₅ Jesús jme₂dsa₂ dsen₅₄ i₂jme₁ꞌnióꞌ₅ quián₂ jniog₄. ꞌÉi₂ bá₄ i₂jŋió₅, ꞌi₁caun₂ a₂ꞌlɨgꞌ₅₄ tsá₃ ꞌe₂ cha₂ ja₁coin₂, on₃ guëꞌ₂ dso₄ rë₂cáinꞌ₄, i₂rë₂jŋiaꞌ₅₄ cau₅ tsá₃ quiainꞌ₅₄ dsa₂ i₂ꞌno₅ dso₄, i₂ca₂ronꞌ₂ guë́₄ ŋei₅ conꞌ₂ guë́₄ gueiꞌ₅₄ mɨ₂güɨ́g₃.
27 Tsá₃ lɨ́in₅ liaꞌ₂ lɨ́n₅ jme₂dsa₂ dsen₅₄ siánꞌ₂. Tion₅₄ ꞌnióꞌ₅ qui₂jme₃dsiain₂₃ jáꞌ₂ a₂jénꞌ₅ ne₄ Diú₄ liaꞌ₂ caun₂ jmɨg₄, o₄quióꞌ₄ dsáu₁ guioin₅₄ le₂jŋiá₅, jaun₂ guë́₄ o₄quióꞌ₄ dsáu₁ dsa₂ juɨg₂. La₁ia₁ Jesús në́₃ co₂ráun₂ tan₅₄ bá₄ ca₂jmo₃ jme₁ca₂jéinꞌ₂ ꞌŋiog₅.
28 Jaun₂ Si₂ ꞌÉiꞌ₃ quióꞌ₅ Moisés në́₃, ꞌɨin₂₃ dsa₂ mɨ₂güɨ́g₃ ꞌuan₅₄ a₂léin₂ jme₂dsa₂ dsen₅₄. La₁ cang₂ guë́₄ jaun₂, ca₂cuë₃ Diú₄ jág₁ quióꞌ₅ ca₂ꞌɨin₃ ꞌŋiog₅ jme₁ca₂ꞌɨin₃ Ja₁ŋiꞌ₅₄ a₂lén₂ ꞌéi₂ jme₂dsa₂ dsen₅₄ conꞌ₂ tan₅₄ ia₁ ca₂jme₃ꞌŋiai₂₃ co₂ŋeiꞌ₅₄.