3-4 junibu jawa chakabu jayamabiaken Jerusalén anuxun xanen ibujaida Manasésin jamen jatu detekin midima tenankubainkin Jehová danankin chakabu betsa betsapa akubainiwen taexun jawen bedubi Jehován jatu putakin nichinkatsis ikaiwen taexun Judán enabu ichakawakin yumetsukubainaibun jatian jatun chakabu Jehován ana jatu buaxunkatsi ikama inikiaki.

5 Judán enabu xanen ibujaidabu ikubainaibukidi una betsa medan jatu kenemisbu jawen daya betsa betsapa Joaquim jiwexun akubainikidi jakidi kenenibu jayaki. 6 Joaquim mawa maiwabu jawen epan xantukun Joaquimnen juni bake Joaquín Judán enabu xanen ibujaida taeaya

7 Jene Éufrates anuxun Egipto nawa detenamenikabu maemakin taewakin janida jatun mai pakea Egipto xanen ibujaidatun jatu achinibu Babilonia xanen ibujaidatundi ana jatu mebinkin achibidankin Egipto mai pakea kexa anu paxku napaku jawen kena Egipto paxku anu achinkin Babilonia xanen ibujaidatun jeneimawen taea mai pakea betsa ana jawen xanen ibu jayamawen taea Egipto nawa xanen ibujaida ana jawen mae anua taxniama ikunkainikiaki.

8 Joaquín ma 18 año jaya xanen ibujaidai taeshinxun Jerusalén anu jatu yunui uxe dabe inun besti jatun xanen ibu inikiaki. Jawen ewan kena Nehustá inikiaki, Elnatán ainbu bakedan, Jerusalén anua kainidan. 9 Jakia jawen xenipabun apaunibu keska chibankin Joaquínen yunuchakakin chakabuwadianikiaki, jaska Jehován bechipaiamajaida akinan.

10-12 Joaquín xanen ibuaitian Nabucodonosor Babilonia xanen ibujaidakin jatu yunukubaini ma 8 año kainkin Nabucodonosorin detenamenikabu ichapabu jau Jerusalén achinunbun jatu yunua beshinxun Jerusalén kebauni nati itan achi taewakin pia bishku bishku akin maxax tunku puta puta akin jashi uden uden akin jatun mae mishki kenebaunibuki mai manchinkin taewaibun jatun xanen ibujaida Nabucodonosor jui jatuki nukutushiaya Joaquínen jawa jatu maematiduma unainwen taea Judán enabu xanen ibujaida Joaquín inun, jawen ewa inun, jawen dayadu xanen ibu bexmasbu inun, jawenabu xanen ibu bexmasbu inun, juni unanepabu jatube june janchamisbu Jerusalén anua taxnibaini Babilonia xanen ibujaida bebun mapuabun jau jatu achinunbun jawen detenamenikabu yunua jatu achixun jawa jatu ichakawakin meama mekekubainaibun

13 Jerusalén medan jikixun Jehová kenwanti jiwe anuxun pei jexe inun mabu kadujaida dasibi bixun xanen ibujaidatun jiwe anuadi jikixun pei jexe inun mabu kadujaida dasibi bidiaxun Jehován kenwanti jiwe jawenduajaida wakin xanen ibujaida Salomónen jatu yunua orowen jiwe uke medan dasibi napuxbaunibu inun jawen kenwanti mabu dasibi jatu bepux keyumani jau babekin keyununbun xanen ibu Nabucodonosorin jatu yunua janu jikixun oro dasibi babe babe akin keyuxun jatun xanen ibujaida inanibukiaki, jaska Jehován bebunkidi jatu yuini keska wakinan. 14-16 Jerusalén anua jatu achikanxu jau Babilonia anu jatu iyununbun jawen detenamenikabu Joaquín inun, jawen ewa inun, jawen ainbuaibu inun, jawen xanen ibu bexmasbu jabun mae yunumisbu dasibi Nabucodonosor jatu yunua jatu iyuaibun,

chipu ja kachu Jerusalén anu jiweabu midima yudabu xanen ibubu dasibi inun, detenamenika pepabu inun, mabu wanikabu dasibi inun, mane dayamisbu dasibi jatu achikin ichawaxun 10,000 tana keyuxun 7,000 xanen ibu bexmasbu inun 1,000 mabu wanikabu inun, mane dayamisbu ja dikabi juni kushipabu detenameti tapintidubu Babilonia anu jau jatu iyununbun Nabucodonosorin jatu yunua jatu iyuaibun yudabu jabu jawauma nuitapajaidaibu besti jatu jenebainibukiaki. 17 Januxun jawen juchin betsan bake maxku Matanías Babilonia xanen ibujaida Nabucodonosorin katuxun Judán enabun mai pakea xanen ibujaida watan jawen kena betsa wakin kenakin: “Sedequíaski”, atan janua jawen mae anu kanikiaki.

18 Sedequías 21 año jaya xanen ibujaidai taeima Jerusalén anu 11 año jatun xanen ibu inikiaki. Jawen ewan kena Hamutal inikiaki, Jeremíasin ainbu bakedan, Libná anua kainidan. 19 Jakia jawen betsa Joaquínen akubaini keska Sedequíasin chakabuwadiakubainaya Jehován bechipaiama 20 jatuki sinatakin Jerusalén inun Judán enabun mai pakea anua mekekin Jehován ana jabukidi shinanma jatu putanikiaki.

Chipu ana Sedequíasin enabu pai ichakubaini: “En ana kushipaki”, ikin shinanyan Babilonia xanen ibujaida Nabucodonosorin jatu ichakawani ja shinankin jawen yunuti jancha dananikiaki.