Atimas Jerusalén achinibukiaki, na janchadan
(2 R 24.20–25.21; 2 Cr 36.17-21; Jer 52.3-30)
39
Judán enabu mai pakea anu Sedequías xanen ibujaida ikunkaini uxe 10 inun año 9 kaitian Jerusalén ana achikin jatu dete keyunun ika Nabucodonosorin jawen detenamenikabu dasibi iwei kematan Jerusalén jidabi kebauntan mae benanta jatun tadi jiwe puntebaunshinxun unanxubida jatu achikubainun, iwanan, mishki kenebaunibu anu mapuxun jatu detekin jatiditun pia ichapa bishku bishku akubainaibun uxe ichapa kaya 2 Sedequías xanen ibujaidatun jatu yunukubainaya xaba 9 inun, uxe 4 inun, año 11 kaitian janu Caldea nawa detenamenikabu atimas Jerusalén maewan anu jiki taebidan 3 Jehová kenwanti jiwe dapi janu jikiti kene xui namakis anu Babilonia xanen ibujaidatun jawen xanen ibu bexmasbu dasibi janu manitan xanen ibui tsauxun jatu yunukin taewabaini jati inibukiaki, jatun xanen ibu tibidan, Nergal-sarézer inun, Samgar-nebó inun, Sarsequim xanen ibujaidabe tsaumis inun, xanen ibu yununika betsa Nergal-sarézer betsadan.4 Ja Caldea nawabu jaskai jiki taeaibu uintan Sedequías inun jawen detenamenikabu dasibi paxai meshu medan kene dabe namakis beputi xui betsa beputiya bepentan xanen ibun bai anu janu jua pepa jawendua banamisbu baiwen Caldea nawabu jatu june dunkebaini Jene Jordán napanpakidi bai kanwen kushibaini paxaibun 5-6 jakia Sedequías june kainai Caldea nawabun bechitan chibain kushidiabaini Jericó napanpa anu jaki nukutan Sedequías achitan mai pakea Hamat anu mae betsa Riblá anu Babilonia xanen ibujaida anu iyuabu januxun jawen kupiti Nabucodonosorin Sedequías yuitan jabianuxundi Sedequíasin bedubi jawen juni bakebu inun Judán enabu xanen ibubun enabu dasibi jau tesen keyununbun Nabucodonosorin jatu yunua jatu tesen keyutan 7 Sedequíasdi jawen bedu tsekaxun mane dispi chiwetameyawen menextan Babilonia anu jau iyununbun jatu yunua jawen bedu tsekaxun mane dispi chiwetameyawen menex dabetan Babilonia anu Sedequías iyuaibun
8 januxun Caldea nawabun Sedequías xanen ibujaidatun jiwe jawendua inun jatun jiwe dasibi Caldea nawabun chiwen kuakin keyutan, Jerusalén mishki kenebaunibu bedan keyui dayajaidakubainkin atimas bedankin keyuabun 9 januxun Babilonia xanen ibujaida mekenikabu yununika jawen kena Nebuzaradánen jawen detenamenikabu yunua ma ichapa jatu iyubiaimabun jatidi jatu texewabainimabu jawen jenekin jatundi jatu iyukin jabun Jerusalén anuxun Caldea nawabu jatun yuda jatu inainmabudi Jerusalén anu jiweabudi jidabi Babilonia anu jau jatu iyununbun jatu yunua jawen detenamenikabun jatu iyuaibun 10 Judán enabun mai pakea anu jatidi jawa jayamajaida nuitapaibu bashitan uva nishi bai inun yunu bai jau dayakin mekekubainxanunbun ibuwamakin Nebuzaradánen jatu yunubainikiaki.
Nabucodonosorin Jeremías pe duawanikiaki, na janchadan
11 Jawen mae anu kai chintundiama Jeremíaskidi pe shinankin Babilonia xanen ibujaida Nabucodonosorin jawen mekenikabu yununika Nebuzaradán yunukin yuikin:
12 “Ja Jeremíasdan, jawa ichakawama mekekin duawakin jaskada ikatsis ikin mia yukai keska axunxanwen”, abaini kaya 13 januxun Nebuzaradán inun, Babilonia xanen ibujaidabe tsauxun yununika dabe Nebusazbán inun Nergal-sarézer inun, betsa xanen ibu bexmas betsa betsapabun 14 xanen ibun jiwe mekenikabun jemaintin kenebaunibu anua Jeremías jau taxnimanunbun jatu yunuabu buxun Jeremías kainmatan iweabu jawen jiwe anu iyuxun jau mekekubainxanun Safánen baba Ahicamnen juni bake Guedalías yunuabu jawen jiwe anu Guedalíasin Jeremías iyuimaxun mekekubainaya yudan kaian jawauma nuitapaibube Jeremías jiweyunikaki.
***************