Unpax pukin kini keyatapa pupus medan Jeremías dispiwen butebiashinabun ana mapemanibukiaki, na janchadan
38
1-3 Jeremíasin yudan kaian yuikin: “Eska Jehován matukidi yuikiki: ‘Na maewan anu bashikuaibu machatu chaipa kenujaidawen kasmai, buni paepawen kasmai, isin paepawen jaska tibiwen man mawatidubuki. Jamen matun yuda mekei Caldea nawabube man jatube kaidan, man jabun matun jiwea meketidubuki. Ja inun, na maewan Jerusalén Babilonia xanen ibujaidatun detenamenikabun matu binui bexankanikiki, tsuan jawa matu nemaxuntidumadan’ ”, jatu akai Matánen juni bake Sefatías inun, Pashurin juni bake Guedalías inun, Selemíasin juni bake Jucal inun, Malquíasin juni bake Pashur betsan Jeremíasin jancha jabun ninkabain4 janua jabu xanen ibu bexmasbu jatun xanen ibujaida anu buxun yuikin:
—Nukun detenamenikabu inun nukunabu nenu jiweyuabun Jeremíasin jancha ninkai datemisbuwen taexun ja juni jau tenanunbunwen. Nukunabu jancha pewama jatu jancha chakabu besti yuikin mesewakubainmiski— akabu
5 kemakin Sedequíasin jatu yuikin:
—Peki. Jaska man akatsis ikai ja juni akanwen, matunakidan— jatu wa
6 jaska jatu shinanmaiwen taexun Jeremías achixun xanen ibujaidatun jiwe mekenikabun jemaintin kenekauna anu xanen ibun juni bake Malquíasin unpax wakin mai kini keyatapa wanibu unpax jayama anu mistukin dispiwen buteabu uke medan pupusjaida anu Jeremías pukuabu seukua niken
7 Etiopía nawa betsa jawen kena Ébed-mélecdan, xanen ibujaida Sedequíasin jiwe jawendua anuxun dasibibun bechipaimisbu unpax aduti kini keyatapa anu Jeremías ma mistukin bichiabu ninkatan jabiatiandi Benjamínen enabun mai pakeakidi jikiti xui beputikidi xanen ibujaida Sedequías junibube icha tsauken 8 xanen ibujaidatun jiwe jawendua anua Ébed-mélec kainkaini Sedequías anu kaxun june baxexen yuikin:
9 —En xanen ibuun, ¿mibe janchapa?— aka
—Peki. Jaskadamenkain, ea yuiwe— aka
Ébed-mélecin unanxubida yuikin:
—Jaska Jeremías ja junibun ashianbudan, chakabujaidaki. Unpax aduti kini keyatapa pupus besti anu nichinshinabu jadia buni mawaya nukun mae ewapa anu ana misi jayamaki— aka
10 jaska wa shinantan Sedequíasin yunukin:
—Chanima chakabuki. Jawaida 30 juni iyuxun ja unpax kini keyatapa anua Jeremías janun mawanun jatu mapemamatanwen— aka 11 Ébed-mélecin 30 junibu katuxun xanen ibujaidatun jiwe anu tadi aduti dintu anu jikixun janua tadi xeni katubain ja unpax kini keyatapa anu kaxun dispiwen tadi bunexkin mestenwantan Jeremías anu paninwanxuntan 12 yuikin:
—Dispiwen besti min nexea min isintiduki. Tadiwen besti pishkanwemetan dispi tsumawe, nun mia mapemaidan— akabu
jaska yunuabu Jeremías jaskaya 13 januxun juni kushipabun ninibidankin Jeremías mapemabu janua xanen ibujaidatun jiwe jawendua mekenikabun jemaintin kenekauna anu Jeremías nichianbu janu jiweyuken
Sedequías Jeremíasbe june janchanikiaki, na janchadan
14 Diosun jancha yuixunika Jeremías jau ea anu iwenunbun, iwanan, jatu yunua Jehová kenwanti Templo jemaintin mishkiwen kenebaunibu inun jikiti xui tibi betsa 3 anu dintu pishta manaundi iyuxun Sedequías bebun nichintan buaibun tsuan ninkama xanen ibujaidatun Jeremías yuikin:
—Jawadakidi en mia yuka juneama xabakabi chanimajaida jancha besti ea yuiwe, jawa ea padanmadan— aka
15 Jeremíasin kemakin yuikin:
—Min jaskakidi ea yukai xabakabi en mia yuiayadan, eki sinatakin jau ea tenanunbun min ea jatu yunuxanaii. Ja inun, Diosun jancha xabakabi en mia yusinbia jawa ea ninkakin min shinan betsa wama ixanaii— aka
16 jakia june yubakin Sedequíasin Jeremías jancha wakin yuikin:
—Jehován nuku jiwea inanmiswen taexun en mia yubaii. Min ea xabakabi yuibiaya jau mia tenanunbun en mia jatu yunu taskama ixanaii. Ja dikabi jabun mia tenankatsis ikaibu anu en mia yunuama ixanaii— aka
17 jaska yubai ninkatan Jeremíasin yuikin:
—Israelin enabu mekenika Dios Jehová kushipajaida dasibi binuatun jancha en mia yuai ninkawe. Babilonia xanen ibujaidatun detenamenikabu xanen ibubu anu mia inun minabun yuda jawaida dateama min jatu inanainan, man mawama ixankanaii. Ja inun, na maewan jawa kuabuma ixankanikiki. 18 Jamen min yuda min jatu inanmaken ja maewan Caldea nawabun jatun kushipawen achitan chiwen kuakin keyuxankanikiki. Miadan, min jaskatan paxatidumajaidaki— aka
19 Sedequíasin kemakin yuikin:
—Enabu Judá jatidi Caldea nawabube jusiyamabuwen taea jatuwen en datejaidaii. Jabun ea achitan ea ichakawachakayamatidubuki— aka
20 Jeremíasin kemakin yuikin:
—Jaskamaki. Caldea nawabun mia jatu yunuabumaki. Jehován jancha en dama mia banabimaxu ja besti ninkakin chibanwen. Jaskatan pe jiwekaini min jawa mawama ixanaii. 21 Jamen min yuda min jatu inankatsi ikamaken min jaskaxanaikidi Jehován ma ea uinmakin unanmashinaki. 22 Caldea nawabu na maewan anu jikixun Judán enabu xanen ibujaidatun jiwe jawendua anua ainbuaibu detenamenikabun jatu dasibibu achixun kainmatan Babilonia xanen ibujaidatun detenamenikabu xanen ibubu jatu inankin yunuabu ja ainbuaibun yuikin:
“Jawen jaibujaidatun padankubainkin
nukun xanen ibujaida maemamakanxuki.
Jawen tae pupus anu seukua keska
jaska katimaken jaki pechibainkin ma jenebainabuki”,
akin mikidi yuixankanikiki— atan
23 Jeremíasin xanen ibu jancha jenediama yuikubainkin:
—Min ainbuaibu dasibi inun min bakebu dasibi Caldea nawabu jabu jatu inankin yunuxankanikiki. Jakia min xanen ibujaidabia min jawa paxama ixanaii. Mia achitan Babilonia xanen ibujaida anu mia nichintan min maewan chiwen kuakin keyuxankanikiki— aka
24 januxun Sedequíasin kemakin Jeremías yuikin:
—Min jiwea min mekekatsis ikaidan, na jaska shadabu jancha min ea yuixu tsua yuiyamaxanwen. 25 En mibe janchaxu en xanen ibu bexmasbun ninkabidan mia yukai bexankanikiki. Jabun mia akin: “¿Jaskada xanen ibujaida Sedequías min yuishinamen? Jamen jatunan, ¿jawa mia yuishinamen?” iwanan, “Man jaskada yubakashina dasibi nuku yuiwe. Nun mia yubaiwen taexun nun mia tenanmaki”, akin mia yukaxankanikiki. 26 Mia jaska wabiabu jatu kemakin eska jatu yuixanwen: “Jadia en mawayamanun Jonatánen jiwe anu ea ana yunuyamawe”, akin, “Jaska besti xanen ibujaida en ea ashianki”, akin jatu yuixanwen— abaini kashinken
27 Sedequías Jeremíasbe janchashina ninkatan xanen ibubu bexmasbu dasibibun uintanun ika Jeremías anu buxun yukati betsa betsapa yukabiakubainabu, jaska Sedequíasin ma yunushina besti Jeremíasin jatu yuia jatun jancha tsuan ninkama ishianwen taexun Jeremías jawa wama unanuma jenebainabu 28 xanen ibujaidatun jiwe jawendua mekenikabun jemaintin kenebauni anu jabianus Jeremías jiweyuken jabiatiandi Caldea nawabu detenamenikabu bexun Jerusalén achinibukiaki.