3 jaskabiakin: “Jeremías uin butankanwen, jau nukukidi nukun mekenika Dios Jehová nukukidi janchaxununan”, iwanan, jau yuixuntanunbun Selemíasin juni bake Jucal inun Maaseíasin juni bake jawenabu Diosbe janchaxunika Sofonías xanen ibujaida Sedequíasin jatu yunua buabu 4 jabiatiandi Jeremías achitan bichidiabuma jawa wabuma yudabu mapuabu anu nashui ika niaki jaki nukutan 5 janua jabiatiandi Egipto anua Faraónen detenamenikabu ichapa taxnibidankin Jerusalén medabewanun ika beaibu Caldea nawabu detenamenika ichapabun Jerusalén kebauni nati ixun jatu tsaka tsaka akaibun Egipto nawabu beaibu bana ninkatan jatube detenamakatsi ikama jatu jenebainaibun

6 janua Diosun jancha yuixunika Jeremías Jehován yunukin ana yuikin: 7 “Ea Israelin enabu mekenika Dios Jehován eska en mia yuiaii. Jau ea yukanunbun Judán enabu xanen ibujaidatun jatu yunua beabu Sedequías eska ea yuixunwen: ‘Matu medabewanun ika Faraónen detenamenikabu ichapa taxnibiabidani beshianbu jatun mai pakea Egipto anu ma ana chintuanbuki. 8 Jakia Jerusalén achixun jatu detenun ika Caldea nawabu bebiashina ana bushianbudan, ja Caldea nawabu ana Jerusalén anu bexankanikiki. Jaskabidan ja maewan achi keyutan chiwen kuaxankanikiki. 9 Ea en Jehován bebunkidi en matu yuiai ea ninkakanwen. Caldea nawa detenamenikabu ma bushianbu ana beabuamaki, iwanan, ikunwankin jaska shinanyamakanwen. Chanima ana bexankanikiki. 10 Matu detenun ika Caldea nawa detenamenikabu dasibi ana beabu man jatu detekin keyutiduki. Jakia man jatidi jatu detechaka jabu mawama isin tenei maniabu xuxai shinan mestenwantan benibaun ana bei jikixun matun maewan kuakin keyuxankanikiki’, akin na jaska jancha ea jatu yuixunwen”, aka

11 Faraónen detenamenika ichapabu beaibu Caldea nawabun ninkatan Jerusalén dapikea Caldea nawabun jatu jenebaini ma bushianbun 12 Benjamínen enabun mai pakea anuxun jawen betsabun mai paxkaimabu jawenadi ibu watan janu paketan jiwenun ika Jerusalén anua Jeremías taxninun ika kaya 13 janu jikiti xui jawen kena “Benjamín” anu kematanaya Hananíasin baba, Selemíasin bake jawen kena “Irías” jikiti xui mekenikabu jatun xanen ibun Jeremías niti atan ja akin yuikin:

—¡Caldea nawabuki min jatuki dasi kaii!— aka

14 Jeremíasin kemakin yuikin:

—¡En jadi jaska kainamaki, Caldea nawabu anu kaidan!— aka

jaska wabia ninkamas Jeremías achitan xanen ibu bexmasbu anu iyuxun jatu yuikin: 15 “Taxnikainun ikaya en iwexuki”, jatu wa jabu Jeremíaski sinatajaidakin jau bichinunbun xanen ibu bexmasbun jatu yunua kusha kusha atan kenexunika Jonatánen jiwebiaken ma bichiti jiwe washianbu anu iyuxun bichiabu 16 jiwe naman mai medan dintu pishta meshu ten ikai anu nichinxun mekeabu xaba ichapa jadi Jeremías ikunkainaya

17 januxun jau bichiti jiwe anua Jeremías kainmabainkin jawen jiwe ewapa jawendua anu jau iwenunbun xanen ibujaida Sedequíasin jatu yunua bichiti jiwe anua iweabu Sedequíasin Jeremías june yukakin:

—¿Jehován jancha kaka bena min ana jayamen?— aka

Jeremíasin kemakin yuikin:

—Jaa. Min eskakiaki, en mia yuiai ninkawe. Min pemaki. Babilonia xanen ibujaidatun mia achixanikiki— atan

18 Jeremíasin jatundi yukakin:

—¿Ja bichiti jiwe anu jawawen dabanan ea bichimabumen? ¿Mikidi jawa chakabujaida en akimamen? ¿Min yununika bexmasbukidi jawa chakabujaida en adiaimamen? ¿Tsua nukunabu en chakabuwaimamen? Jawa matukidi chakabu en jayamaki. 19 Ja dikabi Diosun jancha yuixunikabu chanichakakin matu yuikin: “Babilonia xanen ibujaidatun jawen detenikabu iwexun matu inun matun mai pakea matu detei nenu beama ixankanikiki”, akin matu yuikubainaibudan, ¿jania jabudan? 20 Xanen ibuun, en mia medabe yukaii. ¿Min ea axuntidumen? Jadia en mawayamanun Jonatánen jiwe anu ea ana jatu yunuyamawe— abia

21 ninkatan xanen ibun jiwe jawendua mekenikabun jemaintin kenekauna anu mekexun xaba tibi misi ewapa bestichai jau inankubainunbun xanen ibujaida Sedequíasin jatu yunua jadixun mekekubainkin misi jayayuken Misi Wanikabun Bai anua xaba tibi misi ewapa bestichai bexunbidanbidanabu xanen ibun jiwe jawendua mekenikabun jemaintin kenekauna anu Jeremías jiweyuken,