4 Jeremíasin jawen kenexunika Neríasin juni bake Baruc kenatan yuikin: “Jaki keneti sebi bibidan jawada Jehován ea yuikubidanima en mia yuiai ea kenexundiwe”, aka jabiatiandi Barucin Jeremíasin yuikubaina kenexunkubainkin atimas keyuxuna 5 januxun Jeremíasin Baruc yunukin yuikin: “Uinwen. Jehová kenwanti jiwe jemaintin anu ka en jikipanan ea nemamisbuki. 6 Jaskawen taea ja xaba betsatian Jerusalén anu jiweabu inun Judán enabun mai pakea anu mae betsa betsapa anu jiweabu jabu samakei ichaibutian Templo jemaintin anu kaxun janu ichai beshianbu dasibibun Jehován jancha jau ninkanunbun ja en mia yuia una sebiki min kenekubainshina jui kushipawen jatu ea yuixunxanwen. 7 Jehován jatu kupikatsi jatuki sinatajaidakin jatu datekin mesejaidawaiwen taexun ja yudabu chakabujaidabiakin jatun shinan betsa watan jatun chakabu jenei: ‘Jau ewen nuinun’, ixun Jehovákidi shinankin yukaxankanimenkain. Min jaska jatu yuixuntiduki”, aka 8 jaska Diosun jancha yuixunika Jeremíasin yunushina Jehován jancha una sebiki kene keyushinxun Barucin jatu yuixunun ika kaxun

9 Judán enabu mai pakea anuxun jatu yunui Josíasin juni bake Joaquim xanen ibujaidai ma 5 año inun 9 uxe kaitian Jerusalén anua inun mae betsa betsapa anua Templo jemaintin anu icha Jehová bebunua samekeaibun 10 Templo jemaintin jikiti xui jawen kena “Beputi Bena” ukedia anu kenenika Safánen juni bake Guemaríasin dintu manaundi Baruc mapeketan janu uinti xui anu nixun Jeremíasin jancha una sebiki kenamashina dasibi yudabu janu ichai keyuxun ninkaibu anu jui kushipawen Barucin jatu yuixunkubainkin jeneaya

11 Jehován jancha Barucin jatu yuiai Safánen baba Guemaríasin juni bake Micaíasin ninka keyubain 12 xanen ibujaidatun jiwe anu kai kenexunika xanen ibun dintu janu xanen ibun yununikabu inun, kenexunika Elisamá inun, Semaíasin juni bake Delaías inun, Acborin juni bake Elnatán inun, Safánen juni bake Guemarías inun, Hananíasin juni bake Sedequías inun, yununika betsabu janu ichabu anu jikixun 13 dasibi yudan kaian Barucin jatu yuixunai ninka keyutanxu Micaíasin jatu yuikin keyua 14 ja una sebi yudabu bebunxun jatu yuixu jau jatu anudi bexun jau jabudi yuixundiayunun Baruc iwemakin xanen ibu betsan Cusín juni bake Selemíasin baba Netaníasin juni bake Jehudí yunuabu kaxun Baruc yuia una sebi bixun tsumabaini jatu bebun Baruc ni tushiaya 15 jabun yuikin:

—Tsautan ja una sebi anua ja jancha nukudi yuixunwen— akabu

januxun Barucin jatu yuixunai 16 ninkai jawen datejaidai beisinan akeaketan Baruc ana yuikin:

—Na jaska jancha dasibi nun ninkaidan, nukun xanen ibujaida Joaquim yuinun kawe— iwanan,

17 jabun Baruc yukakin:

—Na jaska jancha kenekinan, jaska watan min kene keyushina nuku yuiwe— akabu

18 Barucin jatu kemakin:

—Na jancha dasibi ibubis Jeremíasin ea yuikubaina na una sebiki tintawen kenexunkubainkin atimas en keyushinaki— jatu wa

19 januxun jabun Baruc yuikin:

—Na jaskawen taeadan, idui mia inun Jeremías janida butankanwen, jau tsuan matu unanyamanunbun juneidan— akabu, junetanun ika Baruc kaken

20 xanen ibu kenexunika Elisamán dintu anu Jeremíasin jancha una sebi xanen ibu bexmasbun janabain xanen ibujaidaki chanitanun ika Joaquim anu bui jikixun jaska ninkakanxu dasibi yuiabu 21 ninkatan kenexunika Elisamán dintu anua jau ja una sebi bitanun xanen ibujaida Joaquimnen Jehudí yunua kaxun bitanxun xanen ibujaida inun xanen ibu yununika bexmasbu mapubaunabu anuxun Jeremíasin jancha Jehudín jatu yuixunkubainaya 22 ma matsitian ja uxe 9 kaya dintu uke medan mai xantu anu janu chi deken kuaxunkubainmisbu dapi jadi xanen ibujaida Joaquim tsauken 23 Jehudín jatu yuixunkubainkin 3 pakea kasmai 4 pakea yui keyuaya Joaquimnen jawen nupewen mextexun chi anu napua menuaya Jehudín ana yuixunkubaina jabiaskas wakin nupewen ana mextexun chi anu napukin menukubainkin Jeremíasin jancha una sebi atimas Joaquimnen menukin yamawakin keyuaya 24 xanen ibujaida inun xanen ibu yununika bexmasbun Jeremíasin jancha dasibi ninka keyubiatan jaska jawen janchawen dateabuma inun jawa bika teneamawen taexun jatun tadi jawa ushniama inibukiaki. 25 Una sebi jau mextetan kuakin jaska wayamanun Elnatán inun, Delaías inun, Guemaríasin nemabiabu Joaquimnen jawa jatu ninkamajaida kuakubainkin keyunikiaki. 26 Jakia Diosun jancha yuixunika Jeremías inun jawen kenexunika Baruc jau achitanunbun jawen bake Jerahmeel inun, Azrielin juni bake Seraías inun, Abdeelin juni bake Selemías xanen ibujaida Joaquimnen jatu yunua buxun benajaidabiabaunabu Jeremías inun Baruc medabewakin Jehován jatu junenikiaki.

27 Xanen ibu Joaquimnen Jeremíasin jancha Barucin una sebiki kenexunshina kua keyushinken Jehován Jeremías ana yunukin yuikin: 28 “Una sebi betsa bitan ana jaki kene bena wawe, jaska ja dukun bebunkidi mia kenexunshina Judán enabu xanen ibujaida Joaquimnen kua keyushina keskadi wakinan. 29 Eska jakidi yuikinan: ‘Eska Jehován mia ana yuikiki: Na mai pakea anu yudabu inun inabu yamawakin chakabuwanun ika Babilonia xanen ibujaida jawa teama juxanikiki, mia medabewakin Jeremíasin mia kenexunbia jawen jancha ninkakatsi ikama min jaki ja ikin nemakin jawen jancha una sebi min kuanshinaki. 30 Min jaska washinawen taexun mia Judán enabu xanen ibujaida Joaquim ea Jehován mia yuikin: Jaska min xenipabu David xanen ibujaidai tsauni anu minabu ana tsauama ikubainxankanikiki. Ja dikabi min mawa mia maiwama min yuda mia udenkin putabu badin mia kua inun meshu medan min yuda matsiwen min chapui keyuxanaii. 31 Min chakabuwen taexun mia inun minabu inun min dayadubu en mia jatube kupixanaii. Jaska bebunkidi en matu banabimabia man jawa ninkama ikubidanaibu keska matu inun Jerusalén anu jiweabu inun Judán enabu mai pakea anu jiweabuki jamapai chakabu atimapa betsa betsapa en yunukubainxanaii’ ”, atan Jehován Jeremías ma jaska yunuawen taexun

32 una sebi betsa Jeremíasin bixun jawen kenexunika Baruc inantan Jeremíasin ana yuikubaina jawen jancha Barucin ana kenexunkubainkin una sebiki ja dukun keneshina xanen ibujaida Joaquimnen kuashina keska jabias jancha kenekin keyua ja dikabi jancha betsa jabias keskadi Jeremíasin ana yuikin chichimakubaina Barucin kenekin keyuxunikiaki.