Janu Jehován jatu ibuwamani anu Israelin enabu chintunbidanxankanikiaki, na janchadan
31
10-11 “Nawa betsa betsa xukuabu tibibuun,Jehován jancha ninkakanwen.
Ja inun, ianenwan kexa chaijaidabiaken
janu jiweabu jatu banabimakubainxankanwen.
Nawa kushipajaidabu anua
Jacobun enabu taxnimakin
Jehován jatu iwekubidanxanaiwen taexun
Israelin enabu chaijaida jatu nichinkin sa abianixun
jatu ana ichawaxun Jehován jatu mekekubainxanikiki,
chaxuwan mekenikatun jawen chaxuwan mekemis keska wakinan.
12 Mati Sión anu bei benimai
Israelin enabu kantakubidanxankanikiki.
Jehován jatu medabewa xekiwan trigo ichapa inun,
uva vino inun, piti xeni ichapa inun,
chaxuwan nami ichapa inun,
ina awa nami ichapa jayawen taea benimajaidakubidanxankanikiki.
Bai miban bana uian cha amis keska
Israelin enabu jatun kushipa
jawa ana benuama ikubainxankanikiki.
13 Chipashbu inun, bedunanbu inun,
anibubu benimai besi nawakubidanxankanikiki.
Nui kaxabiaibun jatu benimawakin
isin tenenbiaibun benima pae inankin
nuitapabiaibun en jatu daewakubainxanaii.
14 Jawenabu Diosbe janchaxunikabun
piti pepa pikubainxankanikiki.
En jatu duawaya piti jamen ikai
enabun yaniwakubainxankanikiki.
Ea en Jehován en janchawen en matu mestenwaiin”, iwanan,
15 ana Jehován yuikin:
“Nuijaidai kaxai bis bis ikaibu
ja mae Ramá anuxun ninkaxankanikiki.
Jacobun ain Raquelin enabu ainbuaibu
jatun bakebuwen taea kaxa neseama
jatun bakebu dasibi jayabumawen taea
jawenabun jatu daewabiabu
ninkama ixankanikiki”, iwanan,
16 januxun Jehován ana yuikin:
“Raquelin enabu ainbuaibuun,
ana jamen kaxayamakanwen,
matun beun jene jamen chakawaidan.
Matuki sinataibun jatun mai pakea anua
matun bakebu ana chintunxanaiwen taexun
jatuwen nuijaidai inun man jatuwen isin tenejaidabiakunkainaidan,
chipu matun manakuti man jayakunkainxanaii.
Jaska ea en Jehován en janchawen en matu mestenwaiin.
17 Jaskaxanai manakubainxankanwen,
matun bakebu jatun mae anu ana chintunbidanxankanikikidan.
Ea en Jehován en janchawen en matu mestenwaiin”, itan,
Jaska taxnimaxanai yuba bena Jehován Israelin enabukidi yuinikiaki, na janchadan
27 Jehován ana jatu mestenwankin: “Uatian Israel mai pakea anu inun Judán mai pakea anu yudabu inun jatun inabu ichapa pakubainxankanikiki. 28 Ean jatu uinjaidakubainkin jatunabu en betseni inun, en jatu bedani inun, jatu putakin ichakawakin en jatu yamawaniki. Ean jatu jaska wabianixun en jatu uinkubainmiski. Natian jatu uindiakin en jatu medabewaxanaii, benikin ana jatu kushipawakin jatun mae ana inankin jatu bana bena wakin en akawaxanaii. Ea en Jehován en mestenwaiin.
29 ‘Uva bimi bunkash pia keska wakin jatun ibubun chakabuwanibu jatun xeta isin maxexkunkaini keskai jatun bakebu nuitapai bika tenekubainmisbuki’, akin ana jaska yuiama ixankanikiki. 30 Jakia tsuanda uva bimi bunkash pia jatun xeta maxexmis keskai ibubis jatun chakabuwen taea mawaxankanikiki”, iwanan,
31 Jehován ana jatu mestenwankin: “Jawatianda Israelbu inun Judán enabube en jatube ana yubakai benaxanaii. 32 Egipto anua jatun xenipabu iwekin en jatu metsunxun akawabidani en jatube yubakani keska en ana akama ixanaii. En yubakati jancha jabun ea chakabuwanibuki, en jatun ibu kayabibiakenan. Jaskawen taea en jatube ana yubakai en benaxanaii. Ea en Jehován en jancha en mestenwaiin. 33 Jawatianda Israelin enabube eska ana yubakai en benaxanaii. En yusinti jancha jatun juinti anu mistua keska wakin jatun shinan medan en kenea keska waxanaii. Jatun mekenika Dios en ikunkainxanaii. Jabudan, enabu ikubainxankanikiki. Ea en Jehován en jancha en mestenwaiin. 34 En jatu jaska waiwen taexun jatun jaibuaibu inun jatunabu inun yuda betsabun ma ea unainbuwen taexun: ‘Ikunwankin Jehová unanwen’, iwanan, jatu ana yusianma ixankanikiki. Ma yununika xanen ibubu inun, yununika bexmasbu inun, dasibibun ea unainbuwen taexun ean jatun chakabu ana shinanma jatu buaxuntan en ana jatukidi yuiama ikunkainxanaii. Ea en Jehován en jancha en mestenwaiin”, akin jatu yuinikiaki.
***************