Jehová kenwanti jiwe anua jawen mabu bitan jiwe kuanibukiaki, na janchadan
(2 R 25.8-21; 2 Cr 36.17-21; Jer 39.8-10)
52
12 Nabucodonosor Babilonia xanen ibujaidakunkaini ja xaba 10 inun, uxe 5 inun, año 19 kaitian Babilonia xanen ibu bexmas jatun xanen ibujaida mekenikabu yununika Nebuzaradán jawen detenamenikabu ichapabube Jerusalén anu ana bei jikitushitan 13 Jehová kenwanti jiwe inun, xanen ibujaidatun jiwe jawendua inun, dasibi yununikabun jiwe ewapa jawendua tibi inun, dasibi mae anu jawen jiwemisbu tibi chiwen kuakin keyukin 14 januxun jabiabundi Jerusalén mishki kenebaunibu bedankin di aki dayajaidakunkainkin atimas di akin keyuaibun 15 Jerusalén anu jabu nuitapaibu bashikuimabu inun, jabun Babilonia xanen ibujaidatun yunua chibainmabu inun, mabu wanikabu texeimabu Nebuzaradánen jatu ichawaxun Babilonia anu jau jatu ana iyununbun jawen detenamenikabu ichapabu yunua Babilonia anu main jatu iyuaibun 16 januxun jau jabun uva bai inun yunu bai dayakin jau mekekubainxanunbun nuitapajaidaibu besti jatun mae anu Nebuzaradánen jatu ana bashinikiaki.17 Jatu jaska wadiamadan, Caldea nawabu detenamenikabun Jehová kenwanti Templo anua jawen mabu Babilonia anu bukatsi ichawaxun jawen bronce mane chibu keyatapa dabe inun, jaki chibu tsaundabenibu inun, jawen bronce mane unpax aduti ewapajaida teke teke atan 18 januxun jabu bukatsi jaki chi mapu beamisbu inun, jatun pala inun, jatun bin paji mexteti tsisuda inun, kencha ewapa inun, beati ewapa, dasibi bronce mane mabu betsa betsapa jawen Dios kenwanti jiwe Templo anua jaya ichawakin keyuabun 19 januxun jatu yunubiakin jawen xanen ibujaida mekenikabu yununika Nebuzaradánen jatubetan oro mane mabu inun, plata mane mabu dasibi, jaki mepanuti inun, kenti inun, kencha ewapa inun, jaki chi mapu beati inun, bin jaki tsaunti inun, beati betsa inun, kencha pishta jawen Dios kenwankin vino jaki juxketan amisbu ichawaxun bunikiaki.
20 Ja Jehová kenwanti jiwe anu jawen bronce mane chibu dabe inun, ja bronce chibu jaki mistuti dabe watan jaki tsaunibu inun, jaki unpax manekin mata wati bronce tuduakea ewapajaida inun 12 ina awa bene bronce dami kekunbaunibuki unpax matawati jau anunbun xanen ibujaida Salomónen jatu yunua anibu jawen xankama jaska waxun tsuan tanatiduma 21 ja bronce mane chibu tibi jawen keyatapa 8 metro binua inun, jawen ewapa iakea 5 metro ana namakis inun, uke medan jawen naxui inun jawen kextu 7 centímetro jaska jatu amani chakabuwanibukiaki. 22-23 Ja chibu masua tibiki mane bronce maiti jawendua jawen keyatapa 2 metro binua machudamea jawen kesukauna anu 100 mane bronce ji bimi dami wakin jawendua waxun keduntanbaunibu jakia 96 ji bimi dami xabakabi uintidubu wanibukiaki, ja dabe jaska dabes wakinan.
Babilonia anu Judán enabu ana jatu iyukin keyunibukiaki, na janchadan
24 Xanen ibujaida mekenikabu jatun yununika Nebuzaradánen jatundi jawen detenamenikabu yunukin Jerusalén anu yudabu bashikunibu jatu iyukatsi jatu ichawamakin jawenabu Diosbe janchaxunika xanen ibu Seraías inun, betsa jawenabu Diosbe janchaxunika xanen ibu ja kachu Sofonías inun, Jehová kenwanti jiwe jikiti xui beputi mekenikabu dabe inun besti inun, 25 detenamenikabu yununika xanen ibu bexmas inun, Judán enabu xanen ibujaida dayaxunmisbu 7bu bashikunibu inun, ja junin detenamenikabu wakin jatu katumis xanen ibu bexmas inun, 70 junibu medabenanmisbu dasibibun ja mae anuxun unainbu Jerusalén anu jabu bashikuni jiweabu bechitan 26-27 achikin jatu ichawaxun mai pakea Hamat anu mae betsa Riblá anuxun Babilonia xanen ibujaidatun jatu manai anu janu Nebuzaradánen jatu iyuxun jawen xanen ibujaida bebun jatu nichintushia mapuabu jau jatu detekin tenanunbun Babilonia xanen ibujaidatun jatu yunua jawen detenamenikabun ja junibu dasibi tenan keyunibukiaki.
Jaska wakin Judán enabu achixun jatun mai pakea anua chaijaida jatu iyunibukiaki. 28 Babilonia anu Nabucodonosor xanen ibujaidakunkaini ma 7 año kainkin ja yudabu Judán enabu jatun mai pakea anua jatu iyukin tananibudan, 3,023 yudabu inibukiaki. 29 Janua jawen xanen ibu ana ewakaini Nabucodonosor 18 año kaitian Jerusalén anua ana jatu iyukin 832 yudabu jatu iyumadianikiaki. 30 Janua Nabucodonosor xanen ibujaidakunkaini ma 23 año kainkin jatu yunua Judán enabun mai pakea anua ana jatu achitankin 745 yudabu Babilonia anu Nebuzaradánen jatu iyunikiaki. Jati jaki dasi wakin jatu tananibudan, dasibidan, 4,600 yudabu jatu iyunibukiaki.
Bichiti jiwe Babilonia anua Joaquín taxnimatan duawanikiaki, na janchadan
(2 R 25.27-30)
31 Judán enabun mai pakea anua xanen ibu Joaquín iyunibu ma xaba 25 inun, uxe 12 inun, año 37 kainaitian Babilonia anua xanen ibujaida bena jawen kena Evil-merodacin jatu yunukin taewai Joaquínwen nuikin duawakin bichiti jiwe anua taxnimaxun 32 bechipaiai uinmakin Babilonia anu xanen ibubu Nabucodonosorin jatu iwemabidanbidankin jatu ichawani Evil-merodacbe ja dapi tsaubiabaunabun janu xanen ibun tsauti dapi jabe ketaxamekatsi betsa xekatan jatu binumakin ja dapijaida Joaquín tsauntan 33 bichiti jiwe anuxun tadi sawemis pekamatan jawen xanen ibun tadi Joaquín ana sawemakin duawakin jatixun jiweaitian jiwemaxun xaba tibi xanen ibujaida Evil-merodacbetan pikubainikiaki. 34 Ja dikabi jatixun mawadiama jiweaitian pe jiwemakin xaba tibi Babilonia xanen ibujaidatun duawai jawen jamapai tibi Joaquínen bikubainikiaki.