25
Sedequías xanen ibujaidani ma xaba 10 inun, uxe 10 inun, 9 año kainaitian Jerusalén ana achi keyukin yamawanun ika Nabucodonosorin jawen detenamenikabu dasibi iwei Jerusalén anu kematan mae jidabi kebaunxun benanta jatun tadi jiwe puntebaunimaxun unanxubida jatu achikubainun, iwanan, mishki kenebaunibu anu mapuabu jatu detekin jatiditun pia ichapa bishku bishku akubainaibun uxe ichapa kaya janu mapekebain jatu tenanxanun, iwanan, xaba tibi inun meshu tibi mai bebidan bebidankin maewan mishki kenebaunibu anu mai damanchinbaunkin maspuwabaunaibun 2-3 ja maewan achinun ika jaskabidanimabutian ma Sedequías xanen ibui xaba 9 inun, uxe 4 inun, 11 año kainaitian Jerusalén medan jawa ana piti jayama dasibibu buni pae tenejaidai pikukubaini ma mawakatsis ikaibun 4 Caldea nawa detenamenikabun jatu detekatsi ikin jatiditun jatu kexebaunabun jatiditun mae mishki kenebaunibu anu jikinun ixun kini wakin xui watan jikiaibun jabiatiandi Sedequías inun jawen detenamenikabu dasibi paxai kene dabe namakis anu xui betsa beputiya bepentan meshu medan xanen ibun bai janu jua pepa jawendua banamisbu baiwen Caldea nawabun uinbiaibun june jatu dunkebaini Jene Jordán napanpakidi bai kanwen kushibaini paxaibun 5 jakia Caldea nawabu detenamenikabun xanen ibujaida Sedequías junei kai bechitan chibain kushidiabain Sedequíasin detenamenikabu dasibibun jatun xanen ibu jene keyubaini paxaibun Jericó napanpa anu jaki nukutan 6 Caldea nawabun Sedequías achitan mai pakea Hamat anu mae betsa Riblá anu Babilonia xanen ibujaida anu iyuabu januxun jawen kupiti Nabucodonosorin Sedequías yuitan 7 januxun Sedequíasin bedubi jawen juni bakebu jau jatu tesen keyununbun Nabucodonosorin jatu yunua jatu tesen keyutan Sedequíasdi jawen bedu tsekaxun mane dispi chiwetameyawen menextan Babilonia anu jau iyununbun Nabucodonosorin jatu yunua Babilonia anu Sedequías iyuxunibukiaki.Jehová kenwanti jiwe mabu bitan jawen jiwe kuanibukiaki, na janchadan
(2 Cr 36.17-21; Jer 39.8-10; 52.12-30)
8 Nabucodonosor Babilonia xanen ibujaidakunkaini ja xaba 7 inun, uxe 5 inun, 19 año kainaitian Babilonia xanen ibu bexmas jatun xanen ibujaida mekenikabu yununika jawen kena Nebuzaradán detenamenikabu ichapabube Jerusalén anu ana bei jikixun 9 Jehová kenwanti jiwe inun, xanen ibujaidatun jiwe jawendua inun, dasibi yununikabun jiwe ewapa jawendua tibi chiwen kuakin keyutan 10 januxun detenamenikabun Jerusalén mishki kenebaunibu chakabuwai dayajaidakin atimas bedankin keyuaibun 11 Jerusalén anu jabu nuitapai bashikuimabu inun, jabun Babilonia xanen ibujaidatun yunua chibainbu inun, mabu wanikabu texeimabu Nebuzaradánen jatu ichawaxun Babilonia anu jau jatu iyununbun jawen detenamenikabu ichapabu yunua dispiwen jatu nexa nexa akin keyuxun Babilonia anu main jatu iyuaibun 12 jau jabun januxun uva nishi bai inun yunu bai jau dayakin takushkubainxanunbun nuitapajaidaibu besti Judán mai pakea anu Nebuzaradánen jatu bashitan
13 januxun Caldea nawabu detenamenikabun Jehová kenwanti jiwe kuadiama jawen mabu Babilonia anu bukatsi ichawaxun jawen bronce chibu keyatapa dabe inun, jawen bronce unpax aduti ewapajaida inun, jaki aduti tsaunibu tekekin chudi watan 14 jabiaskadi wakin jabu bukatsi jaki mapu ichawamisbu inun, jatun pala inun, jawen bin yumen mexteti tsisuda inun, beati ewapa inun, dasibi bronce mabu betsa betsapa Dios kenwanti jiwe anua bikin ichawakin keyuaibun 15 ja dikabi jatun xanen ibujaida mekenikabu yununika Nebuzaradánen oro mabu inun, plata mabu dasibi inun, jaki ininti kuamisbu inun, kencha betsa betsapa ichawatan Babilonia anu jatu bumanikiaki. 16 Ja Jehová kenwanti jiwe chibu dabe inun, jaki unpax adukin meketi ewapa inun, jaki unpax manexun tsaunti jau anunbun xanen ibujaida Salomónen jatu yunua anibu jawen xankama pisakin tsuan tanakin binitiduma inikiaki. 17 Janua ja mane bronce chibu dabe jawen keyatapa 8 metro binua jaya ja mamaki desua dabeki mane bronce maiti jawendua jatia masua mistunibu jaya ja mane bronce maiti dabeki bimi mane bronce dami waxun duntanibukiaki, jaska dabes wakinan.
Babilonia anu Judán enabu jatu iyukin keyunibukiaki, na janchadan
18 Xanen ibujaida mekenikabu yununika Nebuzaradánen jatundi jawen detenamenikabu yunukin Jerusalén anu yudabu bashikuimabu jatu ichawamakin jawenabu Diosbe janchaxunika xanen ibu Seraías inun, jawenabu Diosbe janchaxunika xanen ibu ja kachu Sofonías inun, Jehová kenwanti jiwe jikiti xui beputi mekenikabu dabe inun besti inun, 19 detenamenikabu mekemis xanen ibu inun, Judán enabu xanen ibujaida dayaxunmisbu 5 bashikuimabu inun, jawen xanen ibu detenamenika waxunun, iwanan, jatun jatu katumis xanen ibu bexmas inun, 70 junibu dasibibun unainbu Jerusalén anu bashikuima jiweabu bechitan 20-21 achikin jatu ichawaxun mai pakea Hamat anu mae betsa Riblá anuxun Babilonia xanen ibujaida manayuaya janu Nebuzaradánen jatu iyuxun jawen xanen ibujaida bebun jatu nichian jau jatu detekin tenanunbun Babilonia xanen ibujaidatun jatu yunua jawen detenamenikabun ja 82 junibu tenan keyunibukiaki.
Jaska wakin Judán enabu achixun jawen mai pakea anua chaijaida jatu iyunibukiaki.
Jabu bashikuimabu Egipto anu paxai keyunibukiaki, na janchadan
22 Jatu jaska wabainkin yudabu bashikuimabu jau jatu yunukubainxanun Safánen baba Ahicamnen juni bake Guedalías katuxun Babilonia xanen ibujaida Nabucodonosorin Judán xanen ibu mekenika watan jawen detenamenika dasibibu Babilonia anu jatu iyuimaken 23 Judán enabu detenamenikabu paxai juneimaxun jaskakidi banabitan taxnibidani Guedalíasbe janchanun ika detenamenikabu xanen ibubu Netaníasin juni bake Ismael inun, Caréahn juni bake Johanán inun, mae Netofá anua Tanhúmetin juni bake Seraías inun, mae Maacá anua juni betsa jiwenitun juni bake Jaazanías jabun chibanmisbube Mispá anu buabu 24 Guedalíasin jatu yubakin yuikin: “Caldea nawabu xanen ibu bexmasbuki dateyamakubainkanwen. Nukun mai pakea anu bashikuima nenu jiwexun Babilonia xanen ibujaidatun jancha ninkakin chibankubainxankanwen. Jaskai man pei jiwekunkainxanaii”, jatu waima
25 janua 7 uxe kaya Judán enabu xanen ibujaidatun enabu Elisamán baba Netanías juni bake Ismael 10 junibube Mispá anu jikixun xanen ibu mekenika Guedalías inun, Judán enabu jabe dayamisbu inun, Caldea nawabu jabube jiweabu jatu detekin keyuabu 26 jatu jaska wabu bana ninkabauni Caldea nawabuki datejaidai jatun mabu pewakin keyutan mabu ichapayabu inun, mabu eskadabesyabu inun, detenamenikabu xanen ibubu paxai Egipto anu jiwei bunibukiaki.
Babilonia bichiti jiwe anua Joaquín taxnimaxun jawen benimakin duawanibukiaki, na janchadan
27 Judán enabun mai pakea anua xanen ibu Joaquín iyunibu xaba 27 inun uxe 12 inun 37 año kainaitian Babilonia anua xanen ibujaida bena Evil-merodacin jatu yunukin taewai Joaquínwen nuikin bichti jiwe anua taxnimaxun 28 jawen nuikin duawakin Babilonia anu xanen ibubu Nabucodonosorin jatu iwebidanbidankin jatu ichawani Evil-merodacbe ja dapi tsaubaunabu anu Joaquín xanen ibun tsauti dapi jabe ketaxamekin betsa xekatan jatu binumakin ja dapijaida Joaquín tsauntan 29 bichiti jiwe anuxun tadi sawemis pekamatan jawen xanen ibun tadi Joaquín ana sawemakin duawakin jatixun jiweaitian jiwemaxun xaba tibi xanen ibujaida Evil-merodacbetan pimakubainikiaki. 30 Ja dikabi janu jiweyuken pe jiwemakin xaba tibi Babilonia xanen ibujaidatun duawakin jawen jamapai tibi inankubainikiaki.