23
Januxun jau dasibi jabe ichai benunbun Judán enabun mai pakea anua mae tibi inun Jerusalén anua anibu unanepabu jau jatuki chanitanunbun xanen ibujaida Josíasin jatu kena bea ma jaki ichabu 2 Judán enabu junibu dasibi inun, Jerusalén anu jiweabu inun, jawenabu Diosbe janchaxunikabu inun, Diosun jancha yuixunikabu inun, mae jidabi bake mishtinbu inun, yuda ewabu betsa xanen ibubu inun betsa nuitapaibu dasibi Jehová kenwanti jiwe jemaintin anu xanen ibujaida Josíasbe bua mapuabu Jehová jatun xenipabube yubakani jancha una medan kenenibu Jehová kenwanti jiwe anua bechishinabu bua Josías tsauxun ja una medanu jancha dasibi jui kushipawen jatu yuixunkin keyutan 3 xanen ibujaida benikaun Jehová kenwanti jiwe utati mane chibu dapi nixun dasibibun ninkaibun Jehová yubakin yuikin: “Eanan, jawen yubakani jancha Moisin unaki keneni dasibi jawada Jehován bechipaiai en akubainaii, jawa kanekin betsa wama jeneama jawen yunuti inun jawen nemati inun jaska pe jiwekin yusinti jancha ninkakin chibankinan. Chanimajaida ean en akubainxanaii”, ikaya yuda dasibibun ninkatan:“Min jaska janchakin yuiayadan, nukubunan, nun mibetan jabiaskadi chibankubainxanaii”, iki janchanibukiaki.
Josíasin Dios kayabi kenwanti jiwe Templo jatu pewaxunkubainikiaki, na janchadan
(2 Cr 34.3-7)
4 Januxun Jehová kenwanti jiwe jemaintin anua yushibu Baal inun Aserá inun bishi xukua tibi ja kenwanti dami wanibu bikin keyuxun jau putanunbun jawenabu Diosbe janchaxunika xanen ibu Hilquías inun, jawenabu Diosbe janchaxunika xanen ibu ja kachu inun, jikiti xui mekenikabu jabu xanen ibujaida Josíasin jatu yunua jawen jancha chibankin Jehová kenwanti jiwe jemaintin anua yushibu kenwanti dami shadabu Jerusalén anua kainmabainkin benanta buxun Cedrón napaku anu janus manchintan kuaxun chipu jawen mapu beabain Betel anu bunibukiaki. 5 Januxun xanen ibujaida Josíasin jatu yunukubainaya mati medibi keyatapa Jerusalén kesukauna anuxun inun Judán enabun mai pakea mae betsa betsapa dapi mati medibi keyatapa januxun Dios kenwankin axunkin pewama jau jabun xeni ininipa menukin kuaxunkubainxanunbun jatunabu Diosbe janchaxunikabu Judán enabu xanen ibu betsabun jatu katuxun daya jatu inanibu jatu nichinkin dasibi putakin januxun yushibu Baal inun, badi inun, uxe inun, bishi xukua tibi ja kenwanti tibi daewakin xeni ininipa kuaxuni yushibubube janchaxunikabu putadiakin 6 ji dami keyatapa yushibu Aserá dami ainbu waxun Jehová kenwanti jiwe jemaintin anu nichinibu betsexun Jerusalén anua benanta buxun Cedrón napaku anuxun kuakin keyutan nuitapaibu mawa janus jatu maiwamisbu anu jawen mapu sa akin keyuxun 7 ja dikabi Jehová kenwanti jiwe jemaintin anuxun yushibu kenwain juni betsa puin kinin chutamisbu inun jawen yuda jidabi yabukuti yushibu Aserá kenwanti tadi wakin ainbuaibun timaxunmisbun jiwe tibi dasibi bedankin di axun jawen tude shadabu benanta manchinxun kuakin keyunibukiaki.
8 Januxun Judán enabun mai pakea jidabi mae tibi anua maewan Gueba nortejaida anua inun maewan betsa Beerseba surkidijaida ja jabu jawenabu Diosbe janchaxuni peisbuma jau Jerusalén anu benunbun xanen ibujaida Josíasin jatu yunua bei keyuabun januxun Jehová kenwankin xeni ininipa jawenabu Diosbe janchaxunikabun menuxunkubainmisbu jau chakabuwakin yamawatanunbun jawen tsumabu Josíasin jatu yunua, bukubaunkin jaska jatu yunushina jawen tsumabun akaibun, Jerusalén jidabi mekenika xanen ibu bexmas Josuén jiwe dapi jawen mae jikiti xui yusmaudi yushibu chakabu jawen kenwanti chi tapu jau dedakin di akin keyununbun jawen tsuma betsabu Josíasin jatu yunua jaska jatu yunua akaibun 9 jakia mati keyatapa medibi anuxun xeni ininipa jabun kuaxunkubainmisbu jawenabu Diosbe janchaxunikabu betsabube Dios kenwanti jiwe Jerusalén anu jau ana dayayamanunbun jatu nemaimaxun jatubetan besti misi xaxa watiuma pikubainibukiaki.
10 Yushibu Moloc daewakin kenwankin jatun bakebu juni inun ainbu jiwea jatu kuaxunkubainmisbu jau ana kuakin menupakeyamaxanunbun Ben-hinom napaku anuxun januxun menuti jau chakabuwakin yamawakin keyununbun Josíasin jatu yunudia jaska jatu yunua jawaida akin keyuaibun 11 Judán enabu xanen ibujaidabun badi kenwankin caballo medibi waxunkubainibu Jehová kenwanti jiwe jemaintin xui dapi janu Natán-mélecin caballo jawen jiwe anuxun jatu mekexunmis ja caballo jatu tenanmakin keyuxun januxun jawen badi kenwanti caballon tadanbainti Josíasin jatu kuamakin keyumatan 12 ja dikabi Ahazin jiwe masapa anu Judán enabu xanen ibujaida betsa betsapabun jawen kenwanti chi tapu akubainibu inun Jehová kenwanti jiwe jemaintin anu jawen juchi Manasésin ani dedakin di axun teke teke akin pude pude axun paxku Cedrón namaki jau putanunbun Josíasin jawen tsuma jatu yunua, jaska jatu yunua putakin keyuaibun
13 Sidón nawabun mekenika yushibu dios kayabima Astarté ainbu dami kenwanti jiwe inun, Moab nawabun mekenika yushibu dios kayabima Quemós dami kenwanti jiwe inun, Amón nawabun mekenika yushibu dios kayabima Milcom dami kenwanti jiwe Judán enabun jabun dananjaidabiaibun Jerusalén badi juaikidi Mati Olivos surkidi machi buteaudi anuxun jau jatu amanunbun Israelin enabu xanen ibujaida Salomónen dayakapabu jatu yunua akea akenibu ja kenwanti jiwe tibi jau yamawanunbun Josíasin jatu yunua deda deda akin keyunibukiaki. 14 Ja dikabi ja jiwe wanibu chakabuwaibu anu ana jiwe betsa benikin jau ayamaxanunbun yushibu ji dami keyatapa inun mishki dami betsa betsapa ji kenwanti chibu nichinibu jau teke teke akin chudi wanunbun xanen ibujaida Josíasin jatu yunua akin keyutan jau jawen xantu anu yuda mawanibun xau jau janudi anunbun jatu yunudia adiaibun 15 jabiaskadi mae betsa Betel anuxun kenwanti betsa dios kayabima medibi wakin Nabatin juni bake xanen ibu Jeroboamnen yushibu betsa kenwanti chi tapu waxun xeni ininti kuakin jawenabu Israelin enabu chakabuwamakubaini ja chi tapu di akin keyutan mishpu watan chiwen menutan ja dikabi yushibu Aserá dami waxun nichinibu di akin keyudiatan jau kuanunbun Josíasin jatu yunuima akaibun
16 ana Josías chintunkain uinbaunkin Betel mati anu yuda mawa janu jawen xau adumisbu mishki xui betsa betsapa bechitan xau dasibi bixun Jeroboamnen chi tapu wani anuxun ja xau menukin keyukin jatu chakabuwamakin jau atimapa wanunbun Josíasin jatu yunudia dasibi Betel anuxun jatu yunua akin keyunibukiaki.
Jaska bebunkidi Diosun jancha yuixunika chanini Josíasin ja kene bechimabu uinmaxun Diosun yuini Josíasin menekin keyutan 17 jatu jaska wamakin jatu yukakin:
—U unudan, ja shinanmati mishki jiwe pishta wanibu en uiainan, ¿jawamen?— jatu wa
mae Betel anu jiweabu junibun kemakin yuikin:
—Diosun jancha yuixunika Judán enabun mai pakea anua juxun jaska na chi tapukidi bebunkidi jakidi chanini keska Betel anua min yamawakin axudan, ja mawa maiwanibu jawen xau adunibu ikikiki— akabu
18 Josíasin ninkatan jatu yuikin:
—Jabiaska jenekanwen. Jau tsuan taska jawen xau meyamaxanunbunan— ikaya
jaskawen taexun jawen xau inun Samaria anua Diosun jancha yuixunikan xaudi jawa meabuma inibukiaki.
19-20 Samaria anuxun Jehová sinatamajaidakin mati keyatapa anuxun jatun yushibu kenwanti jiwe tibi Israelin enabu xanen ibujaida betsa betsapabun akubainibu anuxun yushibubube jawenabu janchaxunikabu jatun chi tapu anuxun jau tenanunbun Josíasin jatu yunua jatu tenankin keyuabu yushibu kenwanti chi tapu anuxun mawabun xau jau kuakin keyununbun Josíasin jatu yunudiakubainaya jaska jatu yunua akubainaibun jaska Betel anuxun ashian keskadi wakin yushibu kenwanti jiwe tibi Samaria anua Josíasin yamawakin keyutan janua Jerusalén anu ana chintunkainikiaki.
Josíasin shinanbaun Pascua jatu besimanikiaki, na janchadan
(2 Cr 35.1-19)
21-23 Januxun xanen ibujaida Josíasin jawenabu dasibi jatu yunukin: “Jehová nukunabube yubakai janchai Moisin keneni jancha una medanua nun ninkaima keska chibankin Egipto nawabu Jehován nai tsuman jatun juni bake iyuabu tenan keyukin nukun xenipabun bakebu dunkebaini shinanmati Pascuadan, ja shinankin dasibi pewatan Jehová duawakin kenwain nun jabe besixanaii”, jatu waidan, Josías xanen ibukunkaini ma 18 año kainkin jatu anikiaki. Jerusalén anuxun Jehován nai tsuman jatun xenipabun juni bake iyuabu tenanma jatu dunkebaini shinanmati Pascuawen taexun Jehová kenjaidawai benimai besinibukiaki. Na dasi xanen ibu unanepa yununikabubia jabutian jawa Pascua besiama ikubainibu inun Israel inun Judá xanen ibui paxkadabeaibutian jaska besi jenenibu Josíasin jawen shinan benawen Pascua besi jatu amakin jawenduajaida wakin jatu taewamanikiaki.
Jehován jancha Josíasin pe chibankin jeneama inikiaki, na janchadan
24 Jehová kenwanti jiwe anuxun jawenabu Diosbe janchaxunika xanen ibu Hilquíasin Jehová jatube yubakai janchani unaki kenenibu bechimawen taexun januxun jawen yunuti inun, jawen nemati inun, jawen pe jiweti yusinti jancha uinkin chibankubainkin Josíasin axunkin Jerusalén anuabu inun Judá mai pakea anu jiweabu juni inun ainbu mukayabu inun, yushibubu yukakin unanmisbu inun, jatun jiwe anuxun jamapai dami mishtin kenwanmisbu tibi bechitan jatu mebintan jatu chakabuwankin yamawakin keyukubainkin 25 Jehován jancha jaska Moisin unaki keneni chanima ninkakin jawen shinan dasibiwen inun, jawen yushin dasibiwen inun, jawen kushipa dasibiwen Josíasin ikunwankin jawen jiweakidi shinan betsa watan xanen ibuaidan, uatian inibu inun jatian ja bebun ixanaibu Josías pepa keska tsua betsa jayama inibukiaki, jatu binuadan.
26 Josías jaskabiakunkainaya jawen juchi xanen ibujaida Manasésin chakabujaida wakubainiwen taea Judán enabuki Jehová sinatankunkaini Judán enabuki sinatani jeneama jawa daeama ikunkainaiwen taexun 27 Jehován yuikin: “Jaska Samaria anuxun jatu yunuaibu Israelin enabun ninkakin ea chibankubainabuma en jenebaini keska wakin Judán enabudi putakin en jatu dananxanaii, ana jawa jatu nemaxunamadan. Ja maewan Jerusalén en katubiani en dananxanaii, ana mekeamadan. Jawen kenwanti jiwekidi: ‘En kena jayakunkainxanikiki’, akin en yuibiani ja dikabi en mebinxanaii”, iwanan, yuinikiaki.
Jaskai Josías mawanikiaki, na janchadan
(2 Cr 35.20-27)
28-30 Josías xanen ibujaida jiweyuken Asiria nawa xanen ibujaida medabewanun ika Egipto nawa xanen ibujaida Faraón jawen kena Necao Jene Éufrateskidi jawen detenamenikabube kai xanen ibujaida Josíasin jawen detenamenikabubetan nemanun ika kai Meguido anu jatuki nukua jatube detenameaibun Faraón Necaon Josías bechitan detekin tenanbainaya, januxun Josíasin xanen ibu bexmasbun jawen yuda caballon tadanbaintiki nanetan Meguidokidia Jerusalén anu buxun januxun maiwakin mishki xui anu jawen yuda datanibukiaki. Januxun Josíasin juni bake Joacaz yudabun katuxun jawen epan xantukun xanen ibujaida wakin Joacaz katunibukiaki.
Judán enabu xanen ibujaidabu ikaibukidi una betsa medan jatuki kenemisbu jawen daya betsa betsapa Josías jiwexun akubainikidi jakidi kenenibu jayaki.
Joacaz Judán enabu xanen ibujaida inikiaki, na janchadan
(2 Cr 36.1-4)
31 Joacaz 23 año jaya Jerusalén anu xanen ibuima 3 uxe besti jatun xanen ibujaida inikiaki. Jawen ewa Hamutal inikiaki, Jeremíasin bake ainbu Libná anua kainidan. 32 Jakia jawen xenipabun apaunibu keska chibankin Joacazin yunuchakakin chakabuwadianikiaki, jaska Jehován bechipaiamajaida akinan.
33 Egipto xanen ibujaida Faraón Necao chintunkidankin Jerusalén anu jau Joacaz ana janu xanen ibuyamanun achitan mai pakea Hamat anu mae betsa Riblá anu Joacaz jatu bichimatan jatu mekematan januxun jau jawenabun jatun mae anuxun jatun impuesto jau pakakubainunbun jatu yunuchakayamakin 3,300 kilo plata mane inun 33 kilo oro mane tashipa jau pakanunbun Judán enabu dasibibu kushipawen Faraón Necaon jatu yunujaidatan 34 januxun Josíasin juni bake betsa Eliaquim katuxun jawen epan xantukun Judán enabun xanen ibu watan jawen kena betsa wakin: “Joaquim”, watan jenebainkin Egipto anu Joacaz iyuima chipu jadia Joacaz mawanikiaki.
35 Faraón Necaon jatu yuka chakayamaimawen taexun jawada juni tibi jayabu xanen ibu bexmasbun tanaxun jabu ichapa jayabu ichapa jatu yukakin jabu eskadabes jayabu eskadabes jatu yukabu mane plata inun mane oro bixunun, iwanan, jawenabu jati yuka inanbaunkin plata inun oro bixun xanen ibu bexmasbu jatu inankubaunaibun xanen ibujaida Joaquim anu beabu Egipto anu Faraón Necao jau buxuntanunbun Joaquimnen jatu yunua plata inun oro impuesto pakati buxun inankubainibukiaki.
Joaquim Judán enabun xanen ibujaida ikunkainikiaki, na janchadan
(2 Cr 36.5-8)