3 Josías xanen ibujaidani ma 18 año kaya januxun xaba tibi ikai jatun kenexunmis Safán kenaxun Jehová kenwanti jiwe anu yununikiaki. Safánen epadan, Asalías inikiaki. Jawen juchidan, Mesulam inikiaki. Josíasin Safán yunukin yuikin:

4 —Nukunabu Diosbe janchaxunika xanen ibu Hilquías anu kaxun uintanwen. Eska en jancha ea yuixuntanwen: “Jehová kenwanti jiwe jabun beputi tibi mekexun yudabun pei jatu inankuiainbu ichawamisbu jau jaki dasiwanunbunwen. 5 Jehová kenwanti jiwe jau pewakin benawamanunbun Jehová kenwanti jiwe jabun pewaibu ja pei jatu inanwen, dayadubu ja peiwen jau jatu pakanunbunan. Jabun dayadu pepa benabaunkin katuxun jau jabun jawen dayadubudi pakakubainxanunbunwen. 6 Jawen kenwanti jiwe jau jawen pewanun, iwanan, mishki datsa bixanaibu inun ji nisa bixanaibu jatu pakakin januxun jabu dayaibu yununikabu inun, ji dayanika jabun Templo pewaibu jatu pakakubaintidubuki. 7 Juni pepa jawa yumetsuisbumawen taexun jawen kenwanti jiwe mekenikabu peikidi jau jatu unanti wakin yukayamaxanun Hilquías ea yuixundiatanwen”— aka Safán kaxun jawen xanen ibun jancha Hilquías yuia

8 januxun jawenabu Diosbe janchaxunika xanen ibu Hilquíasin Safán yuikin:

—Jehová kenwanti jiwe anu jawen yunuti inun jawen nemati jancha Jehován Moisés yuia una medan keneni en bechishinaki. Butanwen— akin inan Safánen mebinbaini kaxun ja una uin keyutan 9 chipu jawen xanen ibu yuinun, iwanan, Safán kaxun yuikin:

—Jehová kenwanti jiwe anua pei bechikin ichawatan jau pewanunbun jawen kenwanti jiwe mekenikabu min dayadubu Diosbe janchaxunikabun pei jatu inankanxuki— iwanan

10 —Ja dikabi nukunabu Diosbe janchaxunika Hilquíasin ea una inanxuki— atan xanen ibujaida Josías ja una Safánen yui keyuxuna 11 jawen yunuti inun jawen nemati Moisin keneni jancha ninkatan datekin xanen ibujaida Josíasin jawen tadi ushnitan 12 Hilquías inun, Safánen juni bake Ahicam inun, Micaíasin juni bake Acbor inun, kenekubainmis Safán inun, jawen medabewanika Asaías jatu kenakin ichawaxun jawaida jatu yunukin 13 yuikin:

—Jaska jawen yunuti inun jawen nemati na una medan keneni en ninkaxukidi buxun eakidi inun, na Jerusalén anu jiweabu inun, Judán enabun mai pakea anu jiweabu dasibi Jehová nukukidi yukaxuntankanwen. Na una medan Moisin keneni nukun xenipabun jawa ninkabuma inun jawa chibankin akama inibuwen taea Jehová nukuki sinatajaidaimenkainan— jatu wa

14 Diosbe jawenabu janchaxunika Hilquías inun, Ahicam inun, Acbor inun, Safán inun, Asaíasin yukai bui Diosun jancha yuixunika ainbu jawen kena Huldá anu bunibukiaki. Jawen benen kenadan, Salum inikiaki. Jawen epadan, Ticvá inikiaki. Jawen juchidan, Harhás inikiaki. Salumnen Jehová kenwanti jiwe anuxun Diosbe jawenabu janchaxunikabun jatun tadi mekekubainmistun Jerusalén maewan bekex betsa bena anu Huldá jiwea anu jikixun jaska xanen ibu Josíasin jatu yunua yuiabu 15-16 Diosun jancha jatu yuixunkin Huldán jatu yuikin:

—Israelin enabu mekenika Dios Jehován kemati jancha ninkakanwen: “Chanima jaska man ea yukayuxudan, jau man ea yukayunun jatun matu yunuxu en jancha eska yuiditankanwen. Jaska chanima en yuini jawen kupiti ixanai unaki kenenibu Judán enabu xanen ibun yuixu keska wakin en matu axanaii, na mae anu yudabu jiweabu kupikin chakabujaida wakinan, jaska en chanini yuikin ninkaxu keskadan. 17 Matun xenipabun ea jenetan yushibu betsa betsapabu kenwankin jatu bebunxun xeni ininipa kuaxunkin ea sinatamajaidanibuki. Jaskawen taea na maeki en sinatajaidani ibubis jaskatan en jawa daetidumajaidaki. 18-20 Ja inun, jau man Jehová yukai benunbun Judán enabu xanen ibujaidatun matu yunuxu eska jancha yuitankanwen. Israelin enabu mekenika Dios Jehován mia yuidiakin: En jancha kenenibu una anua Safánen mia yuixuna ninka pejaida watan min shinan datei min eki mesebiayadan, jaska watan ja en jatu yupuni chakabuwakin en keyuxanaii, na mae inun nenu jiwediabu ja una kenenibu anua en jatukidi ja iniwenan. Jaska shinain min saki saki ikin min shinan betsa watan en shinan chibankin min ea ikunwain en ma mia ninkaxuki. Min tadi min ushnitan ea bebun nia juinti nishma min kaxajaidaya en miwen nuiai en mia yuiaii. Jaskawen taea kupikin na mae chakabuwakin en jatu ichakawaxanai min uindiama unanuma min mawaxanaii, min xenipabuki nukuidan. En Jehován chanima en mia yuiaii”— ikai Huldánen ninkatan jatu yuia janua jabun xanen ibujaidatun jatu nichian beabu janua chintunbain Jehován kemati jancha Josías yuinibukiaki.