—Timishmakawaltitikat pa titahtos,

pa timopalewis tewal.

Kwakin Pawlos oki'ahkok nimahwa,

wan yok okipe tahtolme:

2 —WeRey Agripa,

ka miyak pakiliste nimo'itatik ka tewal ashka kampa tinishmakawiltitik pa nimopalewis ika mochiten in yewal nishteshpawilitikat in yudiyo',

3 ma yok kampa tewal tikinmat mochi inik tachiwaliste wan inik tahtolme in ten kinneltokal in yudiyo' wan tihmat mochi in taketsaliste yewal kitoloya in yudiyo'.

Yok nimishtahtani pa amo tisyawis pa tinishkakis.

4 ’Moshte in yudiyo' kimatil kina niyoliyaya kwah nikatkaya takatYanwik kwah nimo'apaptiyaya pa notal wan pa Yerushalém.

5 Yehwante nishishmatil pa miyak shiwim,

wan kwal pa tahtoloskya pa newal ta kinekiloskya,

kampa newal niyoliyaya kina se pariseyo,

yok kina kichiwal parisheyo' inik kichiwaloya kina taneltokaloya pa NitanawatilMoshé.

6 Wan ashka nishteshpawilitikat,

kampa nikchishtik,

in tahtol melawak yewal Dyos kinmak towichalme.

7 Tomasewalme inik 12 tanichikolme Isra'El kichishtikat pa kitaske mochiwas nitatenewiliste wan kitekipanoske Dyos pa tahka wan pa tayo.

Ika in yewal newal nikchishtik,

oh weRey,

ika yewal inik yudiyo' nishteshpawilitikat.

8 Kampa antamatil anmehwante kampa Dyos amo kipi chikawaliste pa yoliske oksep inik mihmihki?

9 ’Newal melawak nitamatiya pa nikchiwaskya ten han ika ni'itokaliste Yehshwa in nasareno,

10 in niyok onikchi pa Yerushalém,

newal onikintsakwa miyak yehwante nita'onanalme nitekipanolme Dyos,

ka inintatakewaliste in TotatsimWehwe,

wan kimani kinmiktiloya,

newal nikinmakaya notahtol pa yeloskya tamiktilme.

11 Wan pa mochi inik inintyopalmeYudiyo' pa hanse nikintakokoltiyaya inik taneltokalme pa kinkawaloskya in taneltokaliste ka Yehshwa,

hyero nikinkwalaniliyaya yehwante wan niyaya pa oksek Wehwepweblo' ta nikinmitaya nikintakokoltiyaya.

12 ’Yok niyaya pa se tonat pa Damaskos,

ka chikawaliste wan ka inintatakewaliste TotatsimWehwe.

13 Katkaya takwalispa,

weRey Agripa,

kimani niyaya pa ot,

onikit se tawiliste pa in takpakIlwikak hyero we taminaya amoyok kina nitawiliste tonat,

nishyawalowaya newal wan niyok yehwante yaloya nonawak.

14 Wan moshte tiwetsik talpa,

wan newal onihkak yewal nichiliyaya ka tahtol hebreteko:

“Sha'ul,

Sha'ul,

pates tikintohtokatik yehwante nishneltokal?

Timokokoltitik mosel,

timomiktitik inak se yewal kipi miyak chikawaliste in amokwal kina tiktanilis.”

15 Kwakin nikili:

“Ak tewal,

TATS?”

In Tats nishnankili:

“Newal niYehshwa,

yewal tiktohtokatik.

16 Ashka shimokets ka mokshiwalme,

kampa nimoneshti ka tewal pa tinishtekipanolis wan tihmat kampa melawak otikit in mochiten wan yewal ten nimishneshtilis.

17 Nimishkistis ka mopweblo wan ka yehwante amo yudiyo' nimishtitanis ashka.

18 pa tikinishtapolis ininishtololwam,

yehwante amo yudiyo' pa kisaske pa in tayowaliste wan pa kalakiske pa in tawiliste,

ma kipanoltik nichikawaliste inik kineltokal Satán pa nichikawaliste in Dyos,

yok kipiyaske ta'ihniliste ka ininkatsawiliste wan yok kipiyaske takawaliste moshte yehwante kishki ta'onanalme inik taneltokalme pa newal.”

19 ’Yok yewal,

weRey Agripa,

onitaneltok pa in tachiyaliste kina tatemikiliste yewal onishnots ompa pa in ilwikak,

20 yok onikpe ta'ishpa ka in masewalme pa Damaskos,

wan niyok pa Yerushalém wan pa mochi kishki Yudaya,

wan niyok yehwante amo yudiyo',

pa kikwepaloskya ininta'ilnamikiliste wan kineshtiloskya kampa kikweptikatkaloya ininyolme ka Dyos,

ka inintachiwaliste kwahkwalme.

21 Ka in nishkitskik inik yudiyo' pa in tyopWe wan kinekiloya nishmiktiloskya.

22 Ma yok nishpalewiyaya Dyos ompa pa in tonatim wan pa ashka,

yok yewal ashka nika ni'onka nitakestik in tamashtilisteKwal,

ka in takam amo wehwe monotsal wan ka in takam wehwe monotsal.

In ten han nikitotik hanwel in niTaketsalme nitahtolmeDyos wan Moshé kitoloya kampa in panoskya,

23 kampa in Kristo kipiyaya pa panoskya takokoliste,

pa mikiskya wan yewal yeskya in se ta'ishpa pa yoliskya oksep ka in mihmihke,

wan kwalikaskya tanawatiliste ka tawiliste pa in yudiyo' wan amo yudiyo'.

24 Kwah Pawlos kitowaya inik tahtolme ka mopaleptikatka,

Festus waltahtoWehwe,

kito:

—Amo tikpi ta'ilnamikiliste,

Pawlos!

Kampa timotaneshtili miyak ka in amatTakwihkwilolme yewal onishchiwil pa tikpolos mota'ilnamikiliste.

25 Pawlos kinankili:

—Amo nikpolo nota'ilnamikiliste,

tasotili Festus;

in ten nikitotik melawak wan ka nota'ilnamikiliste melawak nikitotik.

26 Kampa in weRey kimat in mochiten nikitotik wan yok nitahtotik ni'ishpa ka mochi tamakawaliste.

Newal nihmat kampa yewal kimat mochi in,

kampa amo opan kaha amo'ak kimatiskya.

27 Tewal,

weRey Agripa,

titaneltok tewal pa niTaketsalme nitahtolmeDyos?

Newal nihmat kampa tewal titaneltok.

28 Wan Agripa kili Pawlos:

—Pa han tipit katka pa nitaneltokaskya pa Kristo.

29 Wan Pawlos kito:

—Han ka tipik,

han ka miyak niktahtantik Dyos han amo pa tewal,

hanwel niyok pa moshte inik takaktikat ashka,

ma yek kina newal ni'onka,

ma yok amo yeske ta'ilpilme kina newal ka in kadena'.

30 Wan omokets in weRey Agripa,

wan niyok in wetatakewan Festus,

wan Berenike wan yehwante ompa yowatikatkaloya ka yehwante,

31 kwah omowikak kitoloya sek ka oksek:

—In takat amoten okichi pa yeskya tamiktil,

wan pa yeskya tatsakwal.

32 Wan Agripa kili Festus:

—Yewal kwal katka pa yeskya tamakawal,

ta amo tahtaniskya pa yeskya tahusgaril ka in weRey Kaysar.