22
—Masewalme nonohniwan taneltokalme wan anmehwante wehwe monotsalme,
shinishkakik ten ashka nikitos pa nimopalewis.
2 Kwah okikakik Pawlos tahtotikatka ka inintahtol hebreteko,
yehwante monawatiloya,
wan Pawlos kitowaya:
3 —Ninewal nitakat yudiyo.
Onitakat pa Tarso pa in nital Kilikya,
ma yok onimo'apa nika pa Yerushalém oniye pa in kal kaha nimotaneshtili wan Gamali'El ye notamashtini,
yewal nishtanishtiliyaya pa nihneltokaskya in tahtolme yewal tishmakak towichalme ka in NitanawatilMoshé.
Hanse tonatim nikchiwaya kina kitowaya nitahtolmeDyos yok kina anmehwante ashka ankichiptikat.
4 Nikintohtokaya pa nikinmiktiskya yehwante kitokaloya ni'ot Yehshwa,
wan nikinkitskiyaya takam wan siwam nitatakewaya pa kintsakwaloskya.
5 In TotatsWe wan moshte in Abwelolme Wehwetsim kimatiloya kampa melawak okitak kampa yehwante nishmakak amatTakwihkwilolme pa nikinwikiliskya tonohniwan taneltokalme yudiyo' pa Damaskos,
niyaya nikinkitskiyaya inik taneltokalme pa Yehshwa pa nikinwalikaskya pa Yerushalém pa kintakokoltiloskya.
Pawlos kinpowil kina otaneltok pa in Tats Yehshwa
6 ’Kwakin kwah niyaya pa in ot,
kwah ni'astiyaya pa in Wepweblo Damaskos,
katkaya takwalispa,
se tawiliste hyero we nishminaya pa in takpakIlwikak,
7 wan oniwets pa tal,
Wan onihkak se tahtol kitowaya:
“Sha'ul,
Sha'ul,
pates tinishtohtokatik?”
8 Wan niktahtanili:
“Ak tewal,
TATS?”
In tahtol kito:
“Newal niYehshwa in nasareteko,
in yewal tewal tiktohtokatik.”
9 Inik yehwante katkaloya nonawak kitak in tawiliste,
ma yok amo kikakik in tahtol yewal taketsaya nahnewal.
10 Kwakin nikili:
“Ten monek nikchiwas,
TATS?”
Wan in TATS nichili:
“Shimokets,
shi pa Damaskos,
wan ompa michiliske in ten yewal tikpiyas pa tikchiyas.”
11 Wan kina amo nitachiyaya ka in tawiliste hyero we,
yok nishwikak nonihniwam nishkitskitiyak pa nomahwam wan nishwikak pa Damaskos yehwante katkaloya ka newal.
12 ’Wan ompa katkaya se takat itoka HananYah pa Damaskos,
se takat yewal hanse tonatim kichiwaya kina kichiwaloya in yudiyo' wan kichiwaya kina kitowaya NitanawatilMoshé,
wan moshte in yudiyo' kitasotaloya miyak kampa HananYah katka se takat kwal.
13 Owal kaha newal in HananYah,
o'as wan nichili:
“Nonihni Sha'ul,
titachiyas oksep.”
Wan haniman onitachi wan nikitaya yewal.
14 Kwakin nichili:
“In Dyos pa yewal taneltokaloya towichalme mishtahtolti pa tihmatis ten yewal kinek pa tikchiwas,
yewal kinek pa tikitas Yehshwa in melawak wan pa tihkakis nitahtol ka ikamak.
15 Kampa tewal titahtos ka yewal pa ni'ishpa moshte masewalme pa mochital,
yewal otikit wan otihkak.
16 Wan ashka,
pates tiwehkAptik?
Shimokets shimokwatek,
wan shikpak mokatsawiliste,
ka nitanotsaliste ni'itokaliste in Tats Yehshwa.”
Pawlos kinmili kina Dyos okititan ka yehwante amo yudiyo'
17 ’Kimani nimokwepaya pa Yerushalém,
wan niktahtoltitikatka Dyos,
pa in tyopWe nitachiyaya kina nitatimiktiyaskya.
18 Wan onikit in Tats Yehshwa,
nichiliyaya:
“Shimo'isiwilti,
shikis nika pa Yerushalém amo shiwehkA,
kampa yehwante nika amo mishneltokaske ka in taketsaliste pa newal.”
19 Wan newal nikili:
“TATS,
yehwante iselte kimatil kampa newal nikintsakwaya wan nikinwitekiyaya pa inintyopYudiyo' yehwante mishneltokal tewal,
20 kwah kimiktik ototok niyEste Estepan,
newal nihmatiya kampa melawak onikit,
ompa nikatkaya newal wan nikatkaya ka in tahtolme pa kimiktiloskya,
wan nikinkwitaptikatkaya ininshashalme inik kimiktitikatkaloya.”
21 Ma yok in TATS nichili:
“Shi,
kampa newal nimishtitanis wEhka kaha kat in yewal amo yudiyo'.”
Pawlos ka niwetatakewan in gwacho'
22 Wan masewalme kikaktikatkaloya Pawlos;
kwah okinmil in tahtolme wan okipewaltik tsatsiliste kitoloya:
—Shikpololtik pa in tal!
In takat amo monek pa yolis!
23 Yehwante tsatsitikatkaloya wan kitasaloya inintakemtil wan kitasaloya nipokteTal,
24 in wetatakewan tatake pa kikalaktiloskya Pawlos pa ininkal in gwacho',
tatake pa kitahtanililoskya ka tawitekiliste pa yok kimatiskya pates yok tsatsitikatkaloya ika yewal.
25 Kimani ki'ilpitiyaloya ka kadena' pa kiwitekiloskya,
Pawlos kili in wetatakewan yewal ompa katka:
—Anmehwante kwal pa kiwitekiske se masewal romano,
yewal ta ayamo'ok kihusgarol?
26 Kwah okikak in,
in wetatakewan kapitan oy wan okinawat wetatakewan gwacho:
—Tihmat tewal ten tikchiptik,
kampa in masewal se yewal romano.
27 Owal ka Pawlos in nikapitan gwacho,
omo'asilti wan kili:
—Shinichil tewal se masewal romano?
Pawlos kito:
—Haha.
28 In wetatakewan kito:
—Newal nitakat romano wan onitashta miyak tomi pa nimochiwaskya romano.
Wan Pawlos kili:
—Kampa newal onitakat nika pa Roma.
29 Inik katkaloya pa kitahtanililoskya haniman opanotiyak ka yewal;
kwah kimatik kampa Pawlos katka se takat yewal otakat pa Roma,
in wetatakewan momaptiyaya kampa yewal se takat romano wan yewal oki'ilpiyaya ka kadena'.
Pawlos ininishpa in tanichikolme tatakewalme yudiyo'
30 Kwakin pa mostatik in wetatakewan gwacho' kinek kimatiskya pates kiteshpawililoya inik yudiyo' Pawlos,
kwakin okintake inik TotatsimWehwe wan moshte inik tanichikolme tatakewalme yudiyo' pa monichikoloskya.
In wetatakewan gwacho' otatake pa kikistiloskya kadena' wan okiwik Pawlos pa in taketsaliste tanichikoliste kaha motahusgarowaya ni'ishpa moshte yehwante.