—Nonohniwan,

newal ka mochi nota'ilnamikiliste kwal nimochantitik ka sewiliste inak Dyos wan pa ashka.

2 Wan in totatsWe itok HananYah,

kintake yehwante ompa moketstikatkaloya inak Pawlos,

pa kiwitekiloskya pa nikamak.

3 Kwakin Pawlos kili in totatsWe:

—Tewal niyok Dyos mishwitekis kampa tewal,

kina se tepante katsak yewal ye tapakal!

Wan tewal tiyowatik titahusgarotik kina kitowaya nitanawatil nitahtolmeMoshé?

Wan titatake pa nishwitekiske ma yok amo tikmawishtilitik kina kito nitanawatil nitahtolmeMoshé?

4 Yehwante ompa moketstikatkaloya kilik:

—Kina timochika pa tikilis in tahtolme totatsWe yewal Dyos kitahtolti?

5 Pawlos kito:

—Nonohniwan taneltokalme,

amo nihmatiya kampa yewal katka in totatsWe;

kampa onka takwihkwiloli:

“Amo shikil ten amokwal yewal reynaro pa mopweblo.”

6 Kwakin Pawlos kimatiya kampa sek katkaloya nitamatiliste inik saduseyo' wan oksek nitamatiliste inik parisheyo',

kwakin Pawlos wehwe waltahto pa in tanichikoliste kaha motahosgarowaya:

—Nonohniwan,

newal niparisheyo' wan notats se parisheyo.

Ashka ni'onka tahusgaril kampa newal nikchishtik in tonat pa kimani walyoliske oksep.

7 Kwah kito in,

okipewak kwalaniliste inik parisheyo' wan inik saduseyo',

wan ye tashelol in tanichikol ka in masewalme.

8 Kampa inik saduseyo' kitoloya kampa amo yoliloya oksep,

wan amo katkaloya nitanawatilanhelme,

wan yehyekatim kwahkwalme wan amo kwahkwalme;

ma yok in parisheyo' kineltokal mochi inik.

9 Kwakin oye se kwalaniliste we;

wan moketsak sek Tamashtinilme NitanawatilMoshé yehwante katkaloya parisheyo',

wan kitoloya:

—Amo tikital amoten pa in takat;

hanwel aso amo okitakichil se Espiritu wan se nitanawatilanhel.

10 Wan in kwalaniliste omochi se momiktiliste we,

in wetatakewan gwacho omomapti pa kichiwililoskya tahtahko Pawlos.

Kwakin okintake in gwacho' pa temoloskya pa kikistiloskya ompa pa kiwikaloskya oksep pa nikal gwacho'.

11 Wan pa nokse yowal in TATS omoneshti ka Pawlos,

wan kili:

—Amo shimomapti,

yok kina tihmashtiyaya notahtolme pa Yerushalém,

yok niyok monek pa tihmashti notahtolme pa Roma.

12 Pa mostatik,

kichiwak in yudiyo' se tahtoliste pa kimiktiloskya Pawlos,

wan mochiwilik se tahtoliste melak pa i'ishpa Dyos mo'ililoya iselte kampa amo takwaloskya wan amo takoniloskya pa kimani kimiktiloskya in Pawlos.

13 Katkaloya amoyok han kina 40 takam yehwante monichikoloya ka in se tahtoliste melawak.

14 Kwakin oyak ka in TotatsimWehwe wan Abwelolme Wehwetsim wan kinmilik:

—Tehwante timochiwilik se tahtoliste melawak,

inak Dyos pa amoten tikwaske pa kimani tihmiktiske Pawlos.

15 Ma yok ashka anmehwante wan inik oksek inik tanichikolme tatakewalme yudiyo',

shiktahtanik in wetatakewan ka chikwase mil gwacho' yewal pa kwalikas mosta pa anmo'ishpa anmehwante,

pa kichiwiliske tahtaniliste,

yewal tehwante tikchishtiyaske pa in ot pa tihmiktiske.

16 Ma yok kimani nikon ninohniSiwat Pawlos otakak kina kinekiloya kimiktiloskya okalak pa nikal inik gwacho',

wan okinawat Pawlos.

17 Wan Pawlos okinots pa walaskya se nikapitan in gwacho' wan kili:

—Shihwik in takatYankwik kaha in wetatakewan gwacho kampa,

kipi ten pa kilis.

18 Yok in nikapitan gwacho okiwik ka in wetatakewan wan kili:

—In tatsakwal Pawlos onishnots newal wan onishtahtan pa nimishwalikiliskya in takatYankwik,

kampa kipi ten pa michilis.

19 In wetatakewan gwacho okikitski pa nimahwa in takatYankwik,

wan okiwik oksela wan kitahtanili:

—Ten tihnek tinichilis?

20 In takatYankwik kili:

—In yudiyo' motalik pa se tahtoliste pa mishtahtaniske tewal kampa mosta tihwikas Pawlos pa in tanichikolme tatakewalme yudiyo',

pa kichiwiliske tahtaniliste ika in ten amokwal okichi yewal.

21 Wan tewal amo shikinneltok,

kampa miyak kat amo han 40 takam,

yehwante kichishtikat pa ot pa kimiktiske Pawlos.

Yehwante mokawak ka se tahtoliste pa i'ishpa Dyos pa amoten kikwaske wan amoten koniske pa kimani tihmiktiske Pawlos.

Wan ashka hanwel kichishtikat motanankiliste.

22 Kwakin in wetatakewan gwacho okitetan pa ni'ot in takatYankwik,

kili in tahtolme amo'ak shikil amoten in ten otinichil.

23 Kwakin okinnots omente ininkapitan in gwacho',

kinmili shikinpiyak 200 gwacho' pa yaske nikshi wan 70 gwacho pa kabayo wan 200 gwacho' ka tepostim ka momiktiliste,

kampa yaske pa Kaysareya pa in yowal kina pa chiknawi ora.

24 Niyok tatake pa kinwalikaloskya kabayo' pa motaliskya Pawlos,

okiwikak pa ot pa amoten kipanoskya kwal oki'asiltiloskya ka in takat itok Félis in wetatakewan pa in tal Kaysareya.

25 In wetatakewan gwacho okitetanil se amatTakwihkwilol yewal kitowaya:

26 “Kela'udyus Lisyas in tasotili niwetatakewan pa in tal Félis,

Nimishtahpalo.

27 In takat kikitskik in yudiyo' wan kinekiloya kimiktiloskya,

yehwante kampa nihmat yewal se takat romano,

wan onihkisti ka nogwacho.

28 Nihnekiya nihmatiskya ten ika kiteshpawilitikatkaloya yewal,

wan onihwik ininishpa nitanichikolme wehwetatakewalme in yudiyo',

29 wan onihmat kampa kiteshpawilitikatkaloya kampa amoyok kinek kichiwas kina kito nitanawatil nitahtolmeMoshé ka yehwante,

ma yok amo katka tateshpawiliste pa ten ika kimiktiloskya wan pa kitsakwaloskya.

30 Kwah nishnawatik kampa sek yudiyo' kichiwaloya se tahtoliste pa kimiktiloskya in takat,

kwakin haniman onitatake pa mishwalikililoskya tewal.

Niyok onikintake inik kiteshpawilitikatkaloya pa michililoskya mo'ishpa tewal in ten ika kiteshpawilitikat yewal.”

31 Yok in gwacho' konanak Pawlos kina kinmili in wetatakewan,

wan okiwikak tayo pa Antípatris.

32 Pa mostatik yehwante gwacho yaloya nikshi walmokwepaloya pa nikal gwacho',

pa Yerushalém wan yehwante yalowa pa kabayo' kitokatiyaloya Pawlos.

33 Wan in gwacho' yaloya pa kabayo' asik pa Kaysareya,

wan kimakak in amatTakwihkwilol in takat niwetatakewan pa in tal wan niyok okitemakak Pawlos.

34 Yok niwetatakewan in tal,

Félis,

kwah otam okit in amatTakwihkwilol;

wan otahtan pa kati tal otakat yewal kimani okimat kampa otakat pa in tal Kilikya,

35 kwakin Félis kili:

—Nimishkakis pa kimani walaske inik mishteshpawilitikat.

Kwakin tatake pa kikwitawiloskya Pawlos kaha niweKal Herodes.