Pawlos otahtan pa kihusgaroskya Kaysar
25
Kwakin o'as Festus pa konanaskya niwetatakewan pa in tal Kaysareya,
kimani panok yey tonatim opanoti pa Kaysareya wan pa Yerushalém.
2 Wan inik TotatsimWehwe wan inik wehwetatakewalme yudiyo' yehwante kitoloya teshpawiliste ika Pawlos kitahtaniloya miyak yewal.
3 Kitahtaniloya,
se ta'ihniliste ika yewal pa kiwikaloskya pa Yerushalém.
Wan ompa pa ot kichishtiyaloskya sek yudiyo' pa kimiktiloskya;
4 ma yok Festus kinankili Pawlos onka tatsakwal pa Kaysareya,
wan newal amo niwehkAwas pa nimokwepas ompa.
5 Ma yak:
—Sek inik kat wehwetatakewalme yudiyo pa anmehwante,
ma temok ka newal pa Kaysareya,
ta okichi ten amokwal in masewal,
ompa ma kiteshpawilik.
6 Omoka in Festus ompa pa Yerushalém kina pa chiknawi wan matahti tonatim,
kwakin omokwep pa Kaysareya.
Wan pa mostatik okinnots nitanichikolme in Abwelolme Wehwetsim wan otatake pa kwalikaloskya Pawlos.
7 Wan kimani o'as Pawlos,
kiyawaloloya moshte in yudiyo',
yehwante walaloya inak Festus pa Yerushalém,
wan miyak tateshpawiliste wehwe kwalikaloya,
ma yok amo kipiyaloya kina kineshtiloskya ika in ten kitoloya melawak.
8 Kwakin Pawlos omopale kinmili:
—Amoten onikchi ten amokwal ika,
NitanawatilMoshé ka in yudiyo' wan ika nityopalme,
wan ika in wetatakewan in Kaysar.
9 Festus kinekiya pa mokawaskya kwal inak inik yudiyo',
kwakin kitahtanili Pawlos:
—Tihnek tiyas pa Yerushalém,
pa tiyes tahusgaril ompa no'ishpa newal?
10 Wan Pawlos kito:
—Nimoketstik ni'ishpa in Kaysar nika kaha motahusgarol,
kampa monek pa niyes tahusgaril.
In yudiyo' amoten onikinchiwil ten amokwal,
kina tewal niyok tihmat.
11 Ta onikchi ten amokwal yewal monek pa nimiki,
kwakin amoten nikito ma nimik;
ma yok ta amo melawak in ten nishteshpawilitikat in yudiyo',
kwakin amo'ak kipi pa nishtemakas ka yehwante.
Newal nitahtani pa niyes tahusgaril ka in Kaysar.
12 Kwakin,
otam otahto ka inik wehwe inintamatiliste,
Festus kili:
—Kampa otitahtan pa tiyes tahosgaril pa in Kaysar.
Kwakin tiyas ka in Kaysar.
Pawlos ka in weRey Agripa wan Berenike
13 Panok sek tonatim,
walak pa Kaysareya ininweRey in yudiyo' yewal itokaya Agripa wan Berenike walak kitahpalok in weRey Festus.
14 Wan kina ompa oyek miyak tonatim,
Festus okitakechil Agripa kina kiteshpawililoya Pawlos,
kiliyaya:
—Se takat onka tatsakwal yewal okika nika Félis kwah reynarotikatka.
15 Kwah oniye pa Yerushalém,
owalak ka tateshpawiliste inik TotatsimWehwe wan Abwelolme Wehwetsim yudiyo',
tahtaniloya ika yewal pa yeskya tamiktil.
16 Yehwante nikinnankili kampa totahtolme tehwante inik romano' amo tiktemakal ka okse masewal pa yes tahusgaril,
monek pa yes ta'ishpa ka tahtaniliste ka inik yehwante kiteshpawilitikat,
yok yewal kipi pa mopalewis ka in ten kiteshpawilitikat ika yewal.
17 Kampa yok,
kwah tiwalak pa nikek ika yehwante,
wan amo oniwehkA pa onikpewalti in tahtaniliste,
onimotal ka inik wehwetatakewalme wan onitatake pa kwalikaloskya in takat.
18 Kimani ompa moketstikatkaloya yehwante kiteshpawilitikatkaloya wan amoten tachiwaliste kiteshpawililoya ika in ten nitamatiya.
19 Hanwel kipiyaloya ika yewal tateshpawiliste kina yehwante kineltokaloya ininDyos,
wan ika se yewal itok Yehshwa yewal omik wan Pawlos kito kampa melak yoltik.
20 Newal amo nihmatiya ten nikchiwaskya ika in tahtaniliste,
yok newal niktahtanil Pawlos ta kinekiya yaskya pa Yerushalém wan ompa yeskya tahusgaril ka in mochiten pa ininishpa yehwante.
21 Ma yok Pawlos otahtan pa yeskya tahosgaril ika in weRey Kaysar,
kwakin onitatake pa kipiyaloskya tatsakwal nika pa kimani niktitanis pa kiwikiliske in weRey Kaysar.
22 Kwakin Agripa kili Festus:
—Newal niyok nihnekiskya nihkakiskya in takat.
Festus kili:
—Mosta tihkakis tahtos.
23 Yok pa mostatik,
kwah walak Agripa wan Berenike ka tatakimiltilil kwal wan kalakiloya pa in kalitik kaha monichikoloya in weReye' ika in wehwetatakewalme gwacho wan ininweReye' in Wepweblo.
Kwakin Festus tatake pa kwalikaloskya Pawlos,
24 kwakin Festus kito:
—WeRey Agripa,
wan moshte masewalme nika kat ka tehwante,
nika ankipiyal in takat.
In se yewal moshte ka in tanichikolme yudiyo' walak ka newal pa Yerushalém wan nika tsatsitikat kampa yewal amo kipi pa yolis.
25 Ma yok newal amo nikit se tachiwaliste amokwal,
yewal kipi pa yes tamiktil;
yewal isel kinek pa yes tahosgaril ka in weRey Kaysar,
onitahtan pa kiwikaske pa Roma.
26 Ma yok kina amo nikpi melak se tahtol pa nikwihkwilolis ka in tats weRey Kaysar,
onihwalik pa nikek ka anmehwante,
hanwel ka tewal,
weRey Agripa,
pa tiktahtanilis in mochiten,
wan yok newal nikpiyas ten nihkwihkwilos.
27 Nitamat kampa amo kipi ta'ilnamikiliste ta oniktitan se tatsakwal wan ta ayamo onka tanawatil ten ika onka tateshpawilil.