Yehshwa okalak Yerushalém
(Mt. 21:1-11; Lk. 19:28-40; Yh. 12:12-19)
11
Kwah astiyaloya pa Yerushalém,
ika inik BetPagé wan BetAnya,
pa i'ishpa in tepetLom itok Oliwo',
Yehshwa okintetan ome nimoneshtililme,
2 kinmili:
―Shiyak pa in ranchit yewal nepa ta'ishpa nestik ka anmehwante,
wan haniman ankalaktiyal,
ankitaske se burroyankwik ilpitik,
yewal ayamo'ak motali.
Shiktomak shihwalikak.
3 Ta ak anmishtahtanili pates ankitomtikat,
kwakin shikilik in TATS kiteshmonék,
wan haniman kiwalkwepas.
4 Oyak,
wan kitak kampa ilpitikatka in burroyankwik katka pa kiyawak inawak ka nitatapoli,
wan kitomak.
5 Wan sek yehwante katkaloya ompa moketstikatkaloya kintahtanilik:
―Ten ankichiptikat?
Pates ankitomtikat in burroyankwik?
6 Yehwante kinankilik kina Yehshwa kinmili;
wan kinmakawak pa yaloskya.
7 Kiwikilik in burroyankwik Yehshwa,
kitalilik nitakemtel wan Yehshwa motal ipa yewal.
8 Niyok myak kinsowaloya inintakemtel pa ot,
oksek kintehtektiyaloya nimahmashaltikito kwawim wan kintastiyaloya pa ot.
9 Yehwante yaloya ta'ishpa,
wan yehwante yaloya takwitap tsatsitiyaloya,
kitotiyaloya:
―Osana!a
Ma kimashti akyewal wal ka ni'itokaliste in TATS!
10 Ma kimashti nireynaroliste totats Dawid,
yewal walas!
Tawiliste takpakIlwikak!
11 Okalak Yehshwa pa Yerushalém,
wan oy pa in tyopWe;
wan tahtachiyaya mochiten ompa katka,
kina tapohpoyaptiyaya panoti inak nimoneshtililme pa BetAnya.
Yehshwa ki'ahwa se kwawitIgero amo taki
(Mt. 21:18-19)
12 Mostatik,
kwah kisak pa BetAnya,
yewal walmayan.
13 Okit pa wEhka se kwawitIgero yewal kipiyaya ni'iswam;
oy okit ta kipiyaya nitaki kwah o'as amoten okit kipiyaya ni'iswam,
ayamo'ok katka nitonat pa kipiyaskya nitaki.
14 Kwakin Yehshwa tahto ka kwawitIgero,
wan kili:
―Ma amo'ik amo'ak kikwa motaki.
Kikakik nimoneshtililme in yewal ten kito.
Yehshwa kinkishti yehwante tanamakaloya pa in tyopWe
(Mt. 21:12-17; Lk. 19:45-48; Yh. 2:13-22)
15 Kwakin asik pa Yerushalém.
Wan ompa okalak Yehshwa pa in tyopWe,
okinkishti pa kiyawak yehwante tanamakaloya wan takowaloya pa in tyopWe.
Kinishkwepil ininmesa' kaha yehwante tataliloya tomib wan niyok kaha mosewilme yehwante tanamakaloya wilom;
16 wan amo kinmakawaltiyaya pa panoloskya pa in tyopWe ka tamamaliste.
17 Wan kinmashtiyaya,
kinmiliyaya:
―In takwihkwiloli kito:
“Nokal kitokayoltiske se kal kaha Dyos kitahtaniske pa moshte masewalme”;
ma yok anmehwante ankipiyal in tyopWe kina se teshkalkoyonke kampa motatil ta'ishtikiyanilme.
18 Kwah kikakik inik Tamashtinilme NitanawatilMoshé wan inik TotatsimWehwe,
kitemoloya kina kimiktiloskya,
ma yok kimakasiloya,
kampa moshte masewalme katkaloya tapololme ka nitamashtiliste.
19 Kwah katka tyotak,
Yehshwa okis pa in Wepweblo.
In kwawitIgero owak
(Mt. 21:20-22)
20 Panotiyaloya watsinko,
okitak in kwawitIgero katka wak mochi ninelwa.
21 Kwakin ki'ilnamik Petros,
wan kili:
―Tamashtini,
shikit,
in kwawitIgero tikili pa amokwal kiyaptiyas,
ashka owak.
22 Yehshwa kinankili:
―Shiyoltiyak kina kinek Dyos.c
23 Annimichilis melak,
ta anmehwante ankilil in tepetLom nika:
“Shimokets wan shimotamot pa in we'at”,
wan ta taneltok ka niyol,
yok motachiwas kina tahtan.
24 Kampa yok annimichilis in,
mochi inik kitahtaniske Dyos,
shitaneltokak kampa ankipiyaske wan yok anmishmakaske.
25 Kwah ankitahtantiyaske Dyos,
ta ak ankikwalanilil kwakin shikpohpowilik nita'ihtakoliste,
kampa niyok anmoTatsDyos yewal onka pa in takpakIlwikak,
yok anmishpohpowas anmota'ihtakoliste.
26 Anta amo ankinpohpowak,
niyok anmoTatsDyos yewal onka pa in takpakIlwikak amo anmishpohpowas anmota'ihtakoliste.
Nitatakewaliste Yehshwa
(Mt. 21:23-27; Lk. 20:1-8)
27 Wan oksep asik Yerushalém.
Wan yewal nehnemiya kalitik pa in tyopWe,
asik ka yewal in TotatsimWehwe,
in Tamashtinilme NitanawatilMoshé wan in Abwelolme Wehwetsim,
28 kitahtanilik:
―Pa ten nitatakewaliste tikchiptik inik tachiwaliste?
Ak mishmak tatakewaliste ika tikchiptik in?
29 Yehshwa kinnankili:
―Niyok annimishtahtanili se tahtol;
wan shinishnankilik,
kwakin annimichilis pa ten tatakewaliste nikchiptik.
30 Nitakwatekiliste Yuhanes,
katka yewal Dyos okitake pa in takpakIlwikak?,
katka yewal masewalme?
Shinishnankilik.
31 Kwakin yehwante mo'ililoya se ka okse,
kitoloya:
―Ta tikilik pa in takpakIlwikak tichili:
“Pates amo ankineltokak?”
32 Wan ta tikitok kampa masewalme?
Ma yok kinmakasiloya masewalme,
kampa moshte yehwante kimatiloya kampa Yuhanes katka se niTaketsal nitahtolDyos.
33 Yok kinankilik Yehshwa:
―Amo tihmatil.
Kwakin Yehshwa kinmili:
―Newal niyok amo annimichilis pa ten tatakewaliste nikchiptik inik tachiwaliste.