9
Niyok Yehshwa kinmili:
―Melak annimichilis,
sek inik yehwante ashka nika kat ankitaske,
kina walas nireynarolisteDyos ka chikawaliste ankitaske yehwante ayamo'ok mikil.
Istayaya taminaya Yehshwa pa ininishpa in yey nimoneshtililme
(Mt. 17:1-13; Lk. 9:28-36)
2 Panok chikwase tonatim,
Yehshwa okinwik Petros,
Yakobo wan Yuhanes;
tehkok iselte pa tepetLom wan ompa amoyok nesiyaya ni'ishpa yehwante.
3 Ompa nitakemtel hyero istayaya wan tipitakaya,
amoyok se tapakaliste yeskya pa kishki tal,
amo'ak kipakaskya istak kina in.
4 Kwakin nesik EliYah inak Moshé,
ka Yehshwa taketstikatkaloya.a
5 Kwakin Petros kili Yehshwa:
―Tamashtini,
kwal onka kampa tikat nika!
Ma tikchiwak yey kalme tachiwalme ka iswat:
se pa tewal,
okse pa Moshé wan in okse pa EliYah.
6 Amo kimatiya ten kitotikatka Petros,
kampa momaptitikatkaloya in yey monishtililme.
7 Kwakin owal se ayawit okintasowalti,
wan pa in ayawit kikakik se tahtol kitowaya:
―In yewal nokon niktasot;
yewal shihkaktiyak.
8 Haniman,
momalinak tachiyak,
amo'ak kitak Yehshwa han.
9 Kimani temotiwalaloya pa in tepetLom,
Yehshwa kinmili:
Amo'ak shikilik amoten ten ankitak,
hanwel kimani NitakaTakpakIlwikak mikiskya wan yoliskya oksep.
10 Ma yok amo'ak taketsaya ka yehwante,
motahtanililoya ten kinekiya kitoskya kampa mikiskya wan yoliskya oksep.
11 Kwakin kitahtanilik Yehshwa:
―Pates yok tishmashtil inik Tamashtinilme NitanawatilMoshé kito monek pa walas ta'ishpa EliYah kwakin walas Kristo?
12 Yehshwa kinnankili:
―Melak pa walas ta'ishpa EliYah,
pa takawas kwal pa mochiten.
Kina kwakin kito nitakwihkwiloliste in NitakaTakpakIlwikak?
Kipi kampa panos miyak takokoliste wan yes ta'ihyaliste.
13 Wan annimichilis kampa EliYah ya owal,
kampa sek kichiwilik kina ankinekik,
kina onka pa takwihkwiloli inak yewal.
Yehshwa kipahti se piltonte yewal kiyehyekaltitiyaya niyehyekat tawalilot
(Mt. 17:14-21; Lk. 9:37-43)
14 Kwah asik kampa katkaloya in oksek nimoneshtililme,
kinmitak myak masewalme kinyawalotikatkaloya;
wan sek Tamashtinilme NitanawatilMoshé momiktitikatkaloya ka yehwante nimoneshtililme Yehshwa.
15 Kwah,
kitak Yehshwa,
mokawak tachishtiyak in masewalme wan motalok kitahpalok.
16 Wan Yehshwa kintahtanili:
―Ten ika momiktitikat ka yehwante?
17 Se takat ka inik masewalme kinankili:
―Tamashtini,
onimishwalikil nokon,
kipi se yehyekat kampa amo tahto.
18 Kaha yes,
in yehyekat kalaki kitaweteki pa tal kitsehtselo,
kikis nichihchal ka espom pa ikamak,
kahkakistil nitankochowam wan moka kwapistik.
Wan nikintahtan momonishtililme pa kikishtililoskya wan amo kikishtilik.
19 Kinankili Yehshwa:
―Ah,
masewalme yewal amo ankineltokal Dyos!
Kishki tonatim monek pa niyes ka anmehwante?
Kishki tonatim monek pa annimishkaktiyas?
Shinishwalikilik in piltonte.
20 Kiwalikilik,
kwah in yehyekat okit Yehshwa,
haniman okitsehtselo chikawak piltonte,
okimaya talpa,
momihmilowaya kikis nichihchal ka espom pa ikamak.
21 Wan Yehshwa kitahtanili nitats,
kili:
―Kishki tonatim kipi ka in?
Wan nitats kinankili:
―Kwah katka tipichi;
22 pa myak tonatim kimayawiyaya pa teshoshte wan kimayawiyaya pa at,
kinekiya kimiktiskya.
Ta kwal tikchiwas ten,
kwakin shitishihnil shitishpale.
23 Yehshwa kili:
―Pates tikito,
ta kwal tikchiwas ten,
ak taneltok mochiten kwal panos.
24 Haniman otsats nitats in piltonte kito:
―Newal nitaneltok;
shinishpale kampa amo we notaneltokaliste!
25 Kwah Yehshwa okinmit kampa monichikotiyaloya myak masewalme,
oki'ahwa in yehyekat katsak,
kili:
―Tewal yehyekat amo tahto wan amo takak,
ashka nimichili shikis pa yewal;
wan amo shikalak oksep pa yewal.
26 Kwakin in yehyekat tsatsi,
kitsehtselo chikawak in piltonte wan okis,
omoka kwapistik kina mihki in piltonte,
myak masewalme kitoloya kampa ashka omik.
27 Ma yok okikitski Yehshwa pa nimahwa,
wan okikets;
in piltonte omokets.
28 Kwah okalak Yehshwa pa in kal,
wan nimoneshtililme iselte kitahtanilik kilik:
―Pates tehwante amokwal tihkishtilik in yehyekat?
29 Wan Yehshwa kinankili:
―Inik niyehyekatim tawalilom ka amoten mokishtili hanwel monek pa kitahtaniske Dyos wan mosawaske pa yok kinkishtiliske.
Yehshwa kinnawati oksep nimikiliste
(Mt. 17:22-23; Lk. 9:43-45)
30 Kwah kisak ompa,
panok pa Galileya.
Wan Yehshwa amo kinekiya pa amo'ak kimatiskya,
31 kampa kinmashtiyaya nimoneshtililme kinmiliyaya NitakaTakpakIlwikak kikitskiske wan kitemakaske ka masewalme,
wan kimiktiske;
kwah panoske yey tonatim yoliskya oksep.
32 Ma yok yehwante amo kimatiloya kikakiloya kina tahtowaya,
wan kimakasiloya kitahtanililoskya ten kinek kitoskya.
Akyewal we yes nimonotsaliste?
(Mt. 18:1-5; Lk. 9:46-48)
33 Asik KaparNahum;
katkaloya kalitik pa kal,
Yehshwa kintahtanili:
―Pates anmo'ahwatiwalaloya pa ot?
34 Yehwante amo nawatiloya,
kampa mo'ahwatiwalaloya pa ot in ak yeskya in we ka yehwante.
35 Kwakin omotal Yehshwa okinnots 12 nimoneshtililme,
kinmili:
―Ta se kinek monotsa we ika anmehwante,
kwakin ma monots tipichi ka moshte,
yewal yes nitikipanol pa moshte.
36 Wan kikitski se piltonte okital ipanta ka yehwante kinapalo,
kinmili:
37 ―Ta'ak kinamiki ka no'itokaliste se piltonte kina in,
yok yewal nishnamiktik newal;
wan akyewal nishnamiktik newal,
yewal amo hanwel nishnamiktik newal,
niyok kinamiktik ak onishwaltitan.
Yehwante amo tishkokolil, yehwante kat ka tehwante
(Lk. 9:49-50; Mt. 10:42)
38 Yuhanes kinankili:
―Tamashtini,
tikitak se takat ka mo'itokaliste kinkishtiliyaya niyehyekat tawalilot,
wan tehwante tikilik pa amoyok kichiptiyas,
kampa yewal amo tishtokatiyaya.
39 Kwakin Yehshwa kito:
―Amo shiktasotilik;
kampa amo onka amo'ak yewal kichi se taneshtiliste ka no'itokaliste,
kampa amoyok pek nishtaketstinemis.
40 Annimichilis kampa akyewal amo tishkokoli,
yok yewal onka ka tehwante.
41 Wan akyewal anmishmakas se shikal ka at pa ankoniske ka no'itokaliste,
kampa kat anmehwante in Kristo,
melak annimichilis kampa amo ankipoloske nitashtawiliste.
Shimokwitawik pa amo anyoliske pa se ta'ihtakoliste
(Mt. 18:6-9; Lk. 17:1-2)
42 ’Ta ak kichiwilitik se ta'ihtakoliste ka in tipichim yewal kipi nitaneltokaliste pa newal,
yeskya kwal pa ki'ilpililoskya se metatWe pa nikich in kitasaloskya ipanta we'atTemtik.
43 Ta momahwa mishchiwili ta'ihtakoliste,
kwakin shihkoton;
kwal katka pa yoliliste ka se momahwa,
wan amo shikalak ka ome momahwam wan yewal tiyas kaha amoSewiTeshoshte,
44 kampa inik okwilme kikwal ikwerpo yehwante amo mikil wan niyok amoSewiTeshoshte.
45 Ta mokshi mishchiwili ta'ihtakoliste,
kwakin shihkoton;
kwal katka pa yoliliste ka se mokshi wan amo shikalak ka ome mokshiwim wan tiyas kaha amoSewiTeshoshte,
46 kampa inik okwilme kikwal ikwerpo yehwante amo mikil wan niyok amoSewiTeshoshte.
47 Ta moshtolol mishchiwili ta'ihtakoliste,
kwakin shihkopin,
kina kwal katka,
ta tewal tikalakiskya ka se moshtolol ka nireynarolisteDyos,
ma yok yewal ka ome moshtololwam wan mishtasaske kaha amoSewiTeshoshte,
48 kampa inik okwilme kikwal ikwerpo yehwante amo mikil,
wan niyok amoSewiTeshoshte.