Mitotiliste fyesta Paskwa
12
Pa Egipto in WeTatsDyos otahto inak Moshé wan Arón kinmili:
2 “In meste yes pa anmehwante in se tanotsaliste we,
in meste yankwik shiwit yes ta'ishpa.
3 Shitahtok ka moshte inik isra'elita',
wan shikinmilik kampa pa in tonat matahti pa in meste moshte anmehwante konanaske se borregit tamo se chibit pa se kal pa se familya.
4 Ta pa se familya amo myak kat,
han amo kitamil se borregit,
kwakin monek pa ankikwaske ka anmonihniwan yewal mochanti selah ka anmehwante.
Monek pa anmopowaske kishki masewalme kat wan kishki miyak takwa se,
shikitak ta anmishasi se borregit.
5 In borregit wan chibit monek pa kipiyas se shiwit,
toro wan amo kipiyas ten amokwal se kokoliste,
6 monek pa anki'ahkokiske pa in tonat 14 ka in meste yankwik shiwit wan pa in tonat moshte wan pa sesen isra'elita' kimiktiske se borregit pa tapohpoyakti.
7 Konanaske niyEste wan kishawiliske nitenko tatapoli kal kaha kikwaske in chibit.
8 Monek pa kikwaske in nakat pa in yowal,
tayokshitil pa in teshoshte ka in shosholtik tsimolinke chichik wan pan amo kipiyas taposhawalti.
9 Ma yok amo shikwak shoshok wan taposonal,
hanwel tawatsal pa teshoshte,
inak nitsontek,
nitankwa wan mochiten kipi itik nipansa.
10 Wan amoten monek pa kikawaske.
Ta hanwel ten omoka,
kichichinoske pa mostatik.
11 Shikwak in borregit yoke:
ka se shashal kwal takwehtil pa anmosintor,
ka anmowarachim pa anmoshiwalme wan ka anmokwawi pa anmomahwam wan ka sewiliste ankikwaske.
In tonat yewal nimitotiliste itok Paskwa in WeTatsDyos.
12 ’Pa yewal tayo newal nipanos pa mochi Egipto,
nikinmiktis moshte inik takatilme ta'ishpa,
yok kina masewalme wan yolikilme,
wan nikintamilis nipoderoliste nidyose' inik egiptiyo'.
Ninewal in WeTatsDyos.
13 In yEste yes taneshtiliste pa in kalme kampa anmehwante anyeske kwah nikitas nipanos hanse.
Wan yok,
pa kimani newal nikinmiktis inik egiptiyo',
kampa amo'ak pa anmehwante mikis.
14 ’In se tonat kampa anmehwante amo'ik ki'ilkawaske hanse ki'ilnamiktiyaske wan kichiwaske se mitotiliste we fyesta ka ni'itokaliste in WeTatsDyos,
wan moshte mokolinchim inik takatitiwalaske niyok kichiwaske in mitotiliste.
15 Pa chikome tonatim kikwaske pan yewal amo kipiyas taposhawalti,
kampa yok,
pa in tonat ta'ishpa shihkistik in taposhawalti pa anmo'icha.
Aki han ta kikwa pan yewal kipiyas taposhawalti pa inik chikome tonatim,
yes takistiliste pa ininmasewalme Isra'El.
16 In tonat ta'ishpa wan pa in tonat chikome yes taketsaliste ka miyak tamawishtiliste.
Amo shitekipanok pa in ome tonatim,
in han kwal pa mochiwiliske anmotakwaliste.
17 ’Monek pa ki'ilnamiktiyaske in mitotiliste fyesta ka inik pane' yewal amo kipi taposhawalti,
kampa in tonat oye,
kimani annimishkishti pa Egipto kampa yaloya pa sesen tanichikolme.
Ka in nitamashtilisteDyos anmokolinchim inik takatitiwalaske monek pa in tonat kichiwaske in mitotiliste.
18 Kikwaske in pan amo kipiyas taposhawalti pa tyotak in tonat 14 hanwel pa tyotak in tonak 21 pa in meste yankwik shiwit.
19 Pa chikome tonatim amo ankipiyaske taposhawalti pa anmo'icha,
kampa aki han ta okikwa yewal kipiyas taposhawalti,
yok kina yewal wal pa okse tal nika amo nital wan niyok inik takatilme pa in Wepweblo,
yeske takishtilme pa in tanichikol isra'elita'.
20 Amo shikwak amoten yewal ten kipiyas taposhawalti.
Kaha han ta anmochantil,
hanwel amo shikwak pan amo kipiyas taposhawalti.”
21 Kwakin Moshé okinnots moshte inik Abwelolme Wehwetsim pa isra'elita',
wan kinmili:
“Shiyak shihwalikak haniman pa sesen anmehwante se borregit pa anmofamilya,
wan shihmiktik pa kikwaske pa in mitotiliste itok Paskwa.
22 Shikonanak sek nimahmashaltik in hisopo,
shikpaltilik ka yEste yewal konanak pa se tapalkatonte,
shikshawilik itenko tatapoli,
wan amo shikisak amo'ak ka anmehwante pa anmo'icha pa mostatik!
23 Kimani panos in WeTatsDyos pa kinmiktis inik egiptiyo',
wan kimani kitas yEste pa inintenko tatapoli pwerta,
hanse panos pa in kalme.
In WeTatsDyos amo kikawas pa kalakis in tamiktiyan pa kinmiktis anmopilwam inintakatiliste ta'ishpa.
24 ’Monek anmehwante ankichiwaske kina kito taketsaliste,
shikilnamiktiyak notaketsaliste anmehwante wan anmopilwam pa hanse.
25 Kimani ankalakiske pa in tal yewal in WeTatsDyos anmishtenewil pa anmishmakas,
anmehwante ankichiptiyaske in mitotiliste.
26 Pa kimani anmopilwam anmishtahtaniliske:
“Ten kinek kitos in,
ka anmehwante in mitotiliste?”,
27 anmehwante shikinnankilik:
‘In tachichinoliste ka ahwiyaliste kwal pa in mitotiliste itok Paskwa pa in WeTatsDyos,
kampa yewal pa Egipto hanse opan pa ininkalme isra'elita' wan okinmikti inik egiptiyo',
ma yok topilwam okinka pa yoliloskya.’”
Kwah okikakik in,
inik isra'elita' motankwaketsak wan kililoya tahtolme wehwe,
28 wan inik isra'elita' oyak okichiwak yok kina kinmiliyaya in WeTatsDyos in Moshé wan Arón.
Nimikiliste ka ininpilwam inintakatiliste ta'ishpa
29 Pa ipanta yowal in WeTatsDyos okinmikti inik moshte ininpilwam inintakatiliste ta'ishpa ka inik egiptiyo',
ka in yewal nitakatiliste ta'ishpa ka para'ó yewal isel motali pa nisiyaTats,
wan niyok ininpilwam yehwante tsaktikatkaloya,
wan mochi ininpilwam inintakatiliste ta'ishpa inik ininyolikilme.
30 Moshte pa Egipto moketsak pa in yowal,
niyok in para'ó wan inintekipanolme,
wan oye miyak chokaliste pa mochi Egipto.
Amo katka se kal egiptiya' kaha amo yeskya se mihki.
31 Pa in yowal otatake para'ó pa kinotsaloskya Moshé wan Arón,
wan kinmili:
“Shikisak nika!
Shipanotiyak wEhka ka nomasewalme,
anmehwante wan inik isra'elita'!
Shiyak shiktahtoltik in WeTatsDyos,
yok kina anmehwante ankinekiloya!
32 Shikinwikak niyok anmoborrego' wan anmoyolikilme,
yok kina ankitoloya,
ya shiyaptiyak,
wan shinishmashtik niyok newal!”
33 Niyok inik egiptiyo',
kinisiwiltiloya inik isra'elita' pa kisaloskya pa in tal,
kampa kitoloya:
“Moshte timikiske!”
34 Kwakin inik isra'elita' okonanak ininteshte yewal amo kipiyaya taposhawalti,
okilyarok pa shashalme wan okintalik pa ininyahkwalme ka mochi ininmetam.
35 Yok kichiwak inik isra'elita' kina kitowaya Moshé wan okintahtanik inik egiptiyo' mochiten tachiwalme ka oro wan plata wan takemiltilme.
36 In WeTatsDyos okichi pa kwal kinchiwililoskya inik isra'elita',
kinmakaloya tenehan tahtaniloya.
Yok okinkistilik mochiten inik egiptiyo'.
Inik isra'elita' kisal pa in tal Egipto
37 Inik isra'elita' okisak pa Ramsés wan oyak pa Sukot.
Katkaloya 600 mil gwacho' takam ininikship,
amo katkaloya tapowalme siwam wan inik piltontim.
38 Niyok inak yehwante yaloya myak masewalme pa oksek Wepweblo wan myak tanichikolme ka yolikilme borrego' wan baka'.
39 Ka in teshte yewal kiwalikak pa Egipto okichiwak pan amo kipiyaya taposhawalti,
kampa inik egiptiyo' okinkistik,
amo mo'asiltik pa kichiwaloskya takwaliste.
40 Inik isra'elita' ompa kipiyaloya pa mochantitikatkaloya pa Egipto 430 shiwim.
41 Inin masewalme in Tats okisak pa Egipto pa in tonat kimani mo'asiltiyaya 430 shiwim,
moshte nimasewalme in WeTatsDyos kisaloya pa Egipto.
42 Pa in tayo in WeTatsDyos okinkwitapti mochi yowal inik isra'elita' pa amoten kinpanoskya pa kinkistiskya kwal pa in tal Egipto.
Kampa yok niyok monek ininpilwam isra'elita' inik takatitiwalaske pa takwitaptiyaske mochi yowal pa kimani mopewalti in shiwit.
Kitoloya kina kichiwaloskya ka in fyesta itok Paskwa
43 Kwakin in WeTatsDyos kili Moshé wan Arón:
“Kimani kichiwaske in mitotiliste fyesta itok Paskwa in kichiwaske:
’Amo'ak ka yehwante amo nika niWepweblo amokwal pa kikwaske.
44 ’In tekipanol yewal timokowil kwal pa kikwas in borregit pa in tatamakaliste ta yewal kipiyaskya takotonili nikwerit kaha mashishal.
45 ’Pa amo'ak ka yehwante kwal pa kikwas inik walal pa okse Wepweblo,
niyok yehwante tekipanolme kintashtawilil.
46 ’In Paskwa monek pa ankikwaske pa anmo'icha,
amo shihkistik amoten in nakat,
niyok amo shihtapanik nise in weso ka in chibit tatamakal.
47 ’Moshte inik isra'elita' monek pa kichiwaske in mitotiliste fyesta itok Paskwa.
48 ’Ta se yewal otakat pa okse Wepweblo yewal mochanti monawak wan kinek kichiwas in mitotiliste fyesta itok Paskwa ka in WeTatsDyos monek pa yeske takotonili nikwerit kaha mashishal moshte takam pa se familya,
kwakin kwal pa yeske pa in mitotiliste itok Paskwa,
kampa yok yeloskya kina ta takatilme pa in Wepweblo.
’Ta amo kipi takotonili nikwerit kaha mashishal amokwal yes pa in fyesta.
49 ’In se tahtol monek pa yes ka yehwante nika takatilme wan pa yehwante takatil pa okse Wepweblo yehwante mochantitiyaske ika anmehwante.”