Dyos kinmak takwaliste inik isra'elita'
16
Moshte inik isra'elita' opanotiyak pa Elim wan asik ompa pa in tal kaha tawak pa Tsin yewal onka ika Elim wan Sinay,
in opan pa 15 tonatim pa in ome meste,
pa takwitap kwah ya kisaloya pa in tal Egipto.
2 Ompa pa in tal kaha tawak,
moshte inik isra'elita' okipewaltik kwalaniliste ika Moshé wan Arón.
3 Inik isra'elita' kililoya:
―Kwal katka pa tishmiktiskya in WeTatsDyos pa in tal Egipto!
Ompa timotaliloya inak in komim ka nakat wan tikwaloya pan pa kishki tipachiwiloya.
Anmehwante antishkishtik pa in tal kaha tawak pa tishmiktiloskya ka mayanaliste pa moshte tehwante!
4 In WeTatsDyos kili Moshé:
“Shikit,
newal nikchiwas pa kyawis pan pa in takpakIlwikak.
In masewalme kisaske wan kipehpenaske pa hanse kishki han kikwaske pa se tonat,
kampa newal nihnek nihmati ak kimawishtili notahtolme,
wan akyewal ayak.
5 Pa in chikwase tonat shikpehpenak kina pa ome tonatim.”
6 Kwakin Moshé wan Arón okinmil moshte inik isra'elita':
―Pa tyotak ankimatiske kampa ye in WeTatsDyos akyewal anmishkistis pa in tal Egipto,
7 wan pa watsinko kitaske nitawiliste in WeTatsDyos.
Yewal kimat kampa anmehwante antaketstikat ika yewal.
Kampa tehwante amo ti'ak pa yok anmehwante tishtaketstiyaske ika tehwante.
8 Moshé kito niyok:
―Pa tyotak in WeTatsDyos anmishmakas nakat pa kikwaske,
wan pa watsinko anmishmakas pan pa kishki kinekiske,
kampa in WeTatsDyos anmishkak kampa anmehwante kitaketsaloya yewal.
Kampa akyewal titehwante?
Kimani anmehwante tishtaketsal,
amo tishtaketsal ika tehwante,
hanwel ika in WeTatsDyos!
9 Moshé kili Arón:
―Shikinmil moshte inik isra'elita' ma mo'asiltik ka in WeTatsDyos,
kampa yewal kinkakiya mochi inintaketsaliste.
10 Kwah Arón otahto ka inik isra'elita',
yehwante tachiyak pa in tal kaha tawak wan okitak nitawiliste in WeTatsDyos omoneshti pa ayawit.
11 Kwakin in WeTatsDyos otahto ka Moshé wan kili:
12 “Onihkak inintaketsaliste inik isra'elita',
kampa yok shikinmil kampa pa tyotak kikwaske nakat wan pa watsinko kikwaske pan pa kishki pachiwiske.
Yok kimatiske kampa ninewal in WeTatsDyos moDyos.”
13 Pa tyotak,
o'asik sek kodornise',
kampa otimik kaha katkaloya inik kalme tachiwalme ka shashalme tilawak wan pa watsinko owets ahwishte pa kishki kalme tachiwalme ka shashalme tilawak.
14 Kimani owak in ahwishte,
omoka kanakit ina nesiya kina sekwiste kwishtik ipa in tal kaha tawak.
15 Kimani inik isra'elita' okitak,
omotahtanilik sek ka oksek:
“Ten yewal in?”
Kwakin Moshé kinnankili:
―Ina yewal pan yewal in WeTatsDyos anmishmak pa ankikwaske.
16 Ina yewal in WeTatsDyos otatake:
“Pa sesen anmehwante konanaske pa kishki we ankikwal,
shikonanak ome litro' pa se masewal,
shikitak kishki ankat pa anmofamilya.”
17 Inik isra'elita' yok okichiwak wan sek konanak miyak wan oksek tipit.
18 Kwah kitamachiwak in takwal,
wan amo mokawil yewal aki konanaya miyak,
amo kiteshmonek yewal aki konanaya tepit,
pa sesen konanak kishki we kikwaloya.
19 Kwakin Moshé kinmili:
―Amo'ak ka anmehwante ki'ahkokis takwal pa yok kikwaske watsinko.
20 Ma yok yehwante amo kimatik takakik wan oki'ahkokik takwal pa kikwaloskya mostatik.
In takwal omochi okwil wan hyero potoniyaya.
Moshé hyero okwalan ka yehwante.
21 Inik isra'elita' konanaloya pa watsinko,
pa sesen kishki we kikwaloya wan kimani in tonat totoniyaya shitiniyaya.
22 Pa in chikwase tonat kipehpenak hanya ome,
in kinek kitos,
konanaloya nawi litro' pa se masewal,
yok inik wehwetatakewalme isra'elita' oyak kinawatik Moshé.
23 Yewal kinmili:
―Ina yewal kito in WeTatsDyos:
Mosta yewal tonatmosewil,
in se tonat tatasot ma kitekipanolik in WeTatsDyos.
Shitayokshitik ashka ten ankipiyal pa ankiyokshitiske wan shitaposonak in ten kipiyal pa ankiposonaske wan shikahkokik pa watsinko mochi in ten mokawas.
24 Yehwante ki'ahkokik pa mostatik,
han in yewal Moshé kina kitowaya,
wan amo omochi okwil,
wan amo poshka!
25 Kwakin Moshé kinmili:
—Shikwak ashka,
kampa ashka in tonatmosewil shiktekipanolik in WeTatsDyos.
Ashka amo kitaske amoten pa in tashosholtik.
26 Kipehpentiyaske pa chikwase tonatim,
pa in tonat chikome,
kampa yewal in tonatmosewil isra'elita' amoten kitaske.
27 Sek isra'elita' okisak pa in tonat chikome pa kipehpenaloskya,
wan amoten okitak.
28 Wan in WeTatsDyos kili in Moshé:
“Pa kimani as amo annishneltokaske?
29 Shikitak kampa newal,
in WeTatsDyos,
annimishmak in tonatmosewil,
wan yok pa in chikwase tonat annimishmak pan pa ome tonatim.
Yok yewal pa in chikome tonat shimokawak kaha ankat wan amo shikisak ompa.”
30 Yok inik isra'elita' mosewiloya pa in tonat chikome.
31 Inik isra'elita' in takwal kitokayoltik “maná”.a
In katka kina niyol silantro,
istak,
wan welek katka kina pan ka nekti.
32 Wan Moshé kito,
ina yewal in WeTatsDyos tatake:
“Shiktemiltik ka in se tamachiwiliste ka ome litro' wan shikahkokik pa yewal inik mokolinchim anmehwante pa kitaske in pan yewal newal annimishmak pa ankikwaske pa in tal kaha tawak,
kimani annimishkishti pa Egipto.”
33 Kwakin Moshé kili Arón:
―Shikonan se komit,
wan shiktal pa yewal ome litro' ka maná wan shiktal ni'ishpa in WeTatsDyos,
wan shitatake ma ki'ahkokik pa inik kolinchim tehwante.
34 Arón okital in komit ta'ishpa ka in Arka yewal nita'ilnamikiliste ka nitaketsaliste melawak Dyosb pa ki'ahkokiskya,
yok kina in WeTatsDyos okitake Moshé.
35 Inik isra'elita' kikwaloya mana pa 40 shiwim,
pa kimani asiloya kaha mochantiloya masewalme,
kikwaloya maná pa kimani asiloya kaha asiyaya itenko in tal Kanán.
36 Pa kitamachiwaloskya in maná,
inik isra'elita' kinteshmonekiya se tamachiwaliste ka ome litro' itokaya gomer.
Wan ka matahti gomer mochiwaya se tamachiwaliste itok efa.