Nikantaroliste in Moshé
15
Kwakin Moshé wan inik isra'elita' kikantarilik se tatsotsonaliste pa in WeTatsDyos:
Nihkantarili newal in WeTatsDyos,
kampa okitan tataniliste ipa inik kikokoliloya.
Okitas pa wehwe'atim in kabay wan in yowatiyaya.
2 In WeTatsDyosa yewal nishmak chikawaliste wan nokantaroliste ka wehwe tahtolme;
yewal nishpalewi pa amo nipoliwis.
Ina yewal noDyos,
akyewal newal nikilis tahtolme wehwe.
Yewal niDyos notats,
nikchiwili pa monotsas we.
3 In WeTatsDyos in se momiktiliste we.
Ni'itokaliste yewal WeTatsDyos!
4 In WeTatsDyos okintas pa in wehwe'atim
inik yahyawaltik tatilanalme ka kabayo' wan iningwacho' in para'ó.
In kwahkwalme gwacho' nikapitane' pa kishki Egipto
pa in wehwe'atim chichiltik kohkonik.
5 Inik wehwekatim wehwehkat okintapach,
owetsik pa tatsinta kina tetelme!
6 WeTatsDyos momahwaKwal okineshti tawiliste wan chikawaliste;
WeTatsDyos ka momahkwaKwal,
okintanil in tishkokoliloya.
7 Ka we mochikawaliste otikintanil
inik yehwante mo'onanak ka tewal.
Tikintitanil mokwalaniliste,
wan yewal okinchichin kina tasol.
8 Ka motapitsaliste pa moyakatsol,
monichikoloya inik atim
wan inik korriente' monichikoloya pa se tanichikol
inik tatsinta mokwaharok pa ipanta in wehwe'atim!
9 In tishkwalanili kito:
“Nikintohtokas,
wan nikchiwas pa kintsakwaske,
nitemakas mochiten tapiyal
kampa yok motachiwas kina nitamat pa yehwante.
Nihkistis noteposte,
wan yeske takokolilme ka nomahwa!”
10 Otitapits wan in wehwe'atim okintapach;
pa ipanta inik atim ka miyak chikawaliste,
opolakik kina plomo!
11 Ak kina tewal,
WeTatsDyos,
ika inik dyose'?
Ak kina tewal,
se we wan ka miyak tamawishtiliste?
Tikchi tachiwaliste ka tapololtiliste wan tamaptiliste,
tewal han tikinchi inik amo'ak kwal pa kinchiwas.
12 Tihmela momahwaKwal
wan in tal okintol!
13 Ka mota'ihniliste tikinwik inik masewalme yewal tikinkisti pa amo poliwiloskya.
Ka mochikawaliste tikinwik kaha mokal tatasot.
14 Inik oksek masewalme moyoyokaske kwah kikakiske in tapowaliste.
Inik peleshteko' moyoyokaske ka tamaptiliste.
15 Inik kapitane' Edom hyero tamakasiloya,
moyoyokaloya ka tamaptiliste inik wehwetatakewalme Mo'Ab.
Inik masewalme pa Kanán kipoloske nichikawaliste.
16 Ma wets ipa yehwante tayoyokaliste wan tamaptiliste,
ka mowe chikawaliste WeTatsDyos,
amokwal tahtoske kina tetelme
han pa kimani panoske momasewalme,
in yewal tikinonan tewal pa amo poliwiloskya.
17 Tewal tikinwikas wan ompa mokawaske,
pa motepetLom yewal timokawil,
in kaha tewal WeTatsDyos,
timochanti,
pa in tyopWe yewal tewal Tats,
otimochiwil.
18 Tewal,
WeTatsDyos,
tireynaro' pa hanse wan hanse!
Nikantaroliste Miryam
19 Kimani para'ó okalak pa in wehwe'atim,
yawiya ka nitayawalolme tatilanalme ka kabayo' wan nimasewalme in yowatiyalo pa kabayo',
ma yok in WeTatsDyos okichi kampa inik atim pa in wehwe'atim walmo'ishkwepaloskya ika yehwante,
han inik isra'elita' yaloya ipa tawak pa ipanta wehwe'atim.
20 Kwakin in nitaketsal nitahtol Dyos Miryam,
katka ninohni Arón,
okonan ayakashte wan moshte inik siwam kisaloya ikwetap yewal mitotitiyaloya wan tatsotsontiyaloya,
21 Miryam in kantarowaya:
Shihkantarilik in WeTatsDyos,
kampa okipi se tataniliste we:
Okintas pa in wehwe'atim in kabay wan yewal yowatiyaya pa yewal.
In at chichik pa Mará
22 Moshé okintake inik isra'elita' kampa panotiyaloskya pa in wehwe'atim Chichiltik,
wan yaloya pa in tal kaha tawak Shur wan nehnemtinemiloya pa yey tonatim pa in tal kaha tawak amo kitaloya at.
23 Asik pa Mará amokwal okonik at yewal ompa katka kampa katka chichik,
kampa yok ompa kitokayoltik Mará.
24 Ompa inik isra'elita' kitaketsaloya ika Moshé,
kililoya:
“Ten kwakin tikoniske?”
25 Kwakin Moshé kitahtolti in WeTatsDyos wan in WeTatsDyos okineshtil se kwawit wan Moshé okitas in kwawit pa at wan in at waltsopeli.
Ompa Dyos okital pa kitaskya ta melawak kichiwaloskya in masewalme kina yewal kinekiya wan okinmak se tanawatiliste pa kina yoliloskya ka nitamawishtiliste pa nitahtolme.
26 Kinmili:
“Ta anmehwante melawak kineltokal in WeTatsDyos,
anmoDyos,
wan ankichiwal ten yewal kwal kit,
wan ankikakil nitahtolme wan ankineltokal mochi nitamashtiliste,
nise kokoliste inik yewal onikintitanil ipa inik egiptiyo' kwalikas ipa anmehwante.
Ninewal in WeTatsDyos,
yewal anmishpahti.”
27 Kwakin asik pa Elim,
kaha wetstikatkaloya atim katkaloya 12 wan 70 palma' wan ompa omosewik inak inik atim.