In at pa in tet
(Taa 20:1-13)
17
Moshte inik isra'elita' opanotiyak pa in tal kaha tawak pa Tsin,
wan yaloya mohmoketstiyaloya kaha kintakewaya in WeTatsDyos wan mosewiloya pa Repidim,
kaha amo katka at pa koniloskya.
2 Kampa yok moshte inik isra'elita' ki'onanaloya ka tahtolme ika Moshé kililoya:
―Shitishmak at pa tikoniske.
Moshé kinnankili:
―Pates anmomiktitikat nonawak?
Pates amo kineltokal nipoderoliste in WeTatsDyos?
3 Kampa yok inik isra'elita' amikiloya,
wan taketsaloya ika Moshé:
―Pates otikchi pa tikisaloskya pa Egipto?
Pa tishmiktiskya ka amikiliste tehwante ka topilwam wan ka toyolikilme?
4 Kwakin Moshé okitahtolti in WeTatsDyos,
wan kili:
―Ten nikchiwas ka in masewalme?
Pa han tipit pa nishmohmotaske ka tetelme!
5 In WeTatsDyos kinankili Moshé:
―Shipan ininshpa inik masewalme,
wan shikinwik sek Abwelolme Wehwetsim ka inik isra'elita',
niyok shikonan in bara yewal ka otihwachil in atenko Nilo,
wan shi.
6 Nimishchiyas pa Horeb,
ipa in tet yewal ompa onka,
wan tewal tiktewis in tet,
wan pa yewal kisas at,
pa takoniske in masewalme.
Kwakin Moshé okichi yoke,
pa ininishpa inik Abwelolme Wehwetsim isra'elita'.
7 Ompa otatokayolti Meribá,
in kinek kitos tareklamar,
kampa inik isra'elita' kireklamarilik in WeTatsDyos.
Niyok okitokayolti Masá,
yewal kinek kitos,
kinekiloya kitanililoskya in WeTatsDyos kampa kitoloya:
“Onka in WeTatsDyos ka tehwante wan ayak”?
In momiktiliste inak amalekteko'
8 Kwakin owalak amalekteko' wan momiktik inak isra'elita' pa Repidim.
9 Kwakin Moshé kili YehoShu'a:
“Shikinonan sek takam wan shiyak shimomiktik ika amalekteko'.
Mosta newal niyes ipa in tepetlom ka nibara Dyos pa nomahwa.”
10 YehoShu'a okichi kina kitake Moshé wan oy omomikti ika amalekteko'.
Moshé,
Arón wan Hur otakisak kaha takpak pa in tepetLom.
11 Kimani Moshé ki'ahkokiyaya nimahwam inik isra'elita' tataniloya;
pa kimani kitemowiyaya nimahwam,
tataniloya amalekteko'.
12 Kimani nimahwam Moshé siyawiloya,
kampa yok konanak se tet wan okitalilik itsinta yewal,
Moshé omotal ipa yewal,
kampa han Arón wan Hur kikitskilitikatkaloya nimahwam,
se pa nimakwaKwal wan okse pa nimahwaMapoch,
yok oyek takpak pa kimani tamalin tonat.
13 Wan YehoShu'a okintanil inik amalekteko' ka teposte pa ininmahwam.
14 In WeTatsDyos kili Moshé:
“Shitakwihkwil in pa yes ta'ilnamikiliste pa se amat,
wan shikil YehoShu'a kampa nikchiwas pa amo yeske ta'ilnamikiliste nichikawaliste amalekteko' itsinta in takpakIlwikak.”