Yetró kipashalo Moshé
18
Yetró,
se totats pa in tal Midyán,
nimontats Moshé,
okimat mochi in ten Dyos okichi pa Moshé,
niyok pa inik isra'elita' wan kina in WeTatsDyos okinkisti pa in tal Egipto.
2 Kimani Moshé okitetan Shépora,
in nisiwa,
Yetró oki'onan yewal
3 wan in omente ininpilwam.
Se ka nikon itokaya Gershóna kampa Moshé kitowaya:
“Ninewal se yewal amo nika nitakat pa in tal”;
4 in okse itokaya EliÉser,
in kinek kitos:
“NiDyos notats yewal nishpalewi,
wan onishkisti pa in miktiliste ka niteposte para'ó.”
5 Wan Yetró nimontats Moshé,
ka ininpilwam wan nisiwa,
owal ka Moshé pa se tal kaha tawak,
kaha kiketstikatka nikal tachiwal ka shashal pa nitepetLom Dyos.
6 Yetró okitetanil se tanawatiliste Moshé:
“Newal,
Yetró,
nimomontats,
niyas nimichitas,
inak mosiwa wan in omente mopilwam.”
7 Moshé oy okinamik nimontats,
omokwalpach ni'ishpa yewal wan okitenamik.
Pa kimani moshte omente motahpalok,
motahtanilik se ka okse kina katkaloya kwakin okalakik pa kal tachiwal ka shashal.
8 Moshé kitakichili nimontats mochi in ten okichi in WeTatsDyos ka in para'ó wan inik egiptiyo' kampa kinpalewiyaya inik isra'elita',
mochi inik takokoliste yewal panoloya pa ininot wan kina in WeTatsDyos okinkistiya pa in poliwiste.
9 Yetró kwal otamat kampa in WeTatsDyos kwal kinchiwiliyaya isra'elita' wan kinkistiyaya ka inik egiptiyo',
10 Yetró kito:
“Ma kilik tahtolme kwahkwal in WeTatsDyos,
yewal anmishkistis anmehwante ka nichikawaliste ka inik egiptiyo' wan in para'ó!
Yewal okinkisti inik isra'elita' pa nichikawaliste inik egiptiyo'!
11 Ashka nihmat kampa in WeTatsDyos hyero we pa moshte inik dyose',
ka in ten okichi ka akyehwante amokwal kinchiwililoya inik isra'elita' ka inik hyero we tamatiloya.”
12 Yetró,
nimontats Moshé,
okichi tamakaliste wan tamiktiliste ka yolikilme pa Dyos wan Arón wan moshte inik Abwelolme Wehwetsim pa Isra'El oyak takwak i'ishpa in Dyos inak nimontats Moshé.
Moshé kintali sek hwese'
(TaNiDb 1:9-18)
13 Pa mostatik,
Moshé omotal pa kinhusgaroskya masewalme wan inik masewalme katkaloya ininishpa Moshé pa watsinko wan pa tyotak.
14 Nimontats Moshé okit mochi in ten kichiwaya Moshé ka in masewalme wan kitahtanili:
―Ten yewal tikchiptik ka inik masewalme?
Kina han tewal timotali,
kampa inik masewalme mokawal moketstiyaske pa mo'ishpa tewal pa mochi watsinko wan pa tyotak?
15 Moshé kinankili nimontats:
―Kampa in masewalme walal nichital pa nikintahtanilis pa Dyos akyewal kipi melawaliste.
16 Kimani mokwalantil se ka okse,
walal wan newal nikinnawatis akyewal kito melawak wan nikinmashtili kina kito nitahtolmeDyos wan inik nitamashtilisteDyos.
17 Yetró nimontats Moshé,
kili:
―Amokwal in ten yewal tikchiptik.
18 Kampa tisiyawi tewal wan inik masewalme yehwante kat ka tewal.
In tekipanoliste hyero miyak pa tewal,
amokwal tikchiwas tewal mosel.
19 Ashka shinishkak,
nimichilis sek tahtolme kampa yewal Dyos ma mishpale.
Shimoneshti tewal,
pa titahtos inak Dyos ka yehwante wan tihwikas inintateshpawiliste yehwante kinpiyal.
20 Monek kampa yehwante tikinnawatis nitahtolmeDyos wan nitamashtiliste Dyos wan shikinnawat kina kwal pa mochantiske wan ten monek pa kichiwaske.
21 Monek pa tikinonanas sek masewalme kwal kimatil kichiwal,
kampa kimawishtilil Dyos,
kampa kitasotal ten melawak wan shikihyak in tomi yewal motani pa ten amokwal,
wan shikintal pa yeske wehwetatakewalme ipa se tanichikol ka se mil masewalme,
oksek ka 100,
oksek 50 wan ka matahti.
22 Yehwante kinhusgaroske inik masewalme pa mochi tonatim,
mochi taketsaliste we ma kwalikak ka tewal wan yehwante tahusgaroske mochi taketsaliste tipichim.
Yok timosewis,
ta mishpalewil yehwante.
23 Ta tikchi mochi in wan ta Dyos yok michili,
kwal timo'ehwas wan moshte masewalme yaske ka ininsewiliste pa ininicha.
24 Moshé okikak nimontats wan okichi kina kili.
25 Kinonan Moshé ika moshte yehwante inik isra'elita' takam ka tamatiliste wan okintal ta'ishpa ka inik isra'elita' kina wehwetatakewalme ka se tanichikol mil,
oksek ka 100,
oksek ka 50,
wan oksek ka matahti.
26 Yehwante katkaloya inik hwese' pa mochi tonat pa in pweblo,
yaloya ka Moshé kwah kipiyaloya se taketsaliste we,
kikawililoya Moshé wan yehwante tahusgaroloya mochi kishki taketsalme amo wehwe.
27 Kwakin Moshé kitahpalo nimontats pa yaskya pa ni'ot wan yewal omokwep pa nital.