Inik isra'elita' pa in tal Sinay
19
Inik isra'elita' o'asik pa se tal kaha tawak pa Sinay pa yey meste pa kimani kisaloya pa Egipto.
2 Okisak isra'elita' pa Repidim wan asiloya pa in tal kaha tawak pa Sinay ompa mosewiloya,
ni'ishpa in talTepet,
3 ompa Moshé otakis pa in talTepet pa kinamikiskya Dyos.
Wan ompa okinots in,
WeTatsDyos kili:
“Yok tikinmilis nikolinchim Yakob,
shikinmil in,
nimasewalme Isra'El:
4 ‘Anmehwante ankitak ten onikchi pa Egipto
wan annimishwalik ka newal
kina ipa ninastakapal kwish.
5 Ta ashka anmehwante melak ankimatil annishkakil
wan ankichiwal kina onka notaketsaliste melawak,
anyeske nomasewalme tatasotalme
pa moshte in talme.
Mochi inik talme kat pa newal,
6 anmehwante anyeske se tanichikol ka totatsim
wan se Wepweblo ta'onanalme pa nishtekipanoliske newal han.’
’Ina yewal tikinmilis inik isra'elita'.”
7 Moshé walmokwep,
okinnots inik Abwelolme Wehwetsim wan kinmili mochiten in WeTatsDyos kiliyaya.
8 Moshte in masewalme tanankililoya pa se tahtoliste:
“Tikchiwaske mochi in ten yewal in WeTatsDyos kito.”
Kwakin Moshé omokwep pa talTepet wan kitakichili in WeTatsDyos in ten kitoloya isra'elita'.
9 In WeTatsDyos kili Moshé:
―Shikit,
niyas pa se ayawit tilawak kampa tewal tiyes kampa yok inik isra'elita' nishkakiske nitahto ka tewal wan yok yehwante mishneltokaske hanse in ten tikinmilitiyas.
―Shi,
wan shikinpale in masewalme ma mosawak pa ashka wan mosta wan shikinmil ma kinpakak ininshashalme,
11 ma mochishtiyak pa wipta,
kampa pa in tonat newal,
in WeTatsDyos nitemos ipa in talTepet Sinay,
pa ininishpa moshte inik masewalme.
12 Shikinmil pa amo mo'asiltiske pa in talTepet.
Shikchi se tatsakwal wan amo shikinka pa panoske kampa aki yewal kikitskis in talTepet yes tamiktil.
13 Amo'ak kwal pa kikitskis yewal aki yok kichiwas,
yes tamiktil ka tamohmotaliste wan ka taminaliste.
Kipi pa mikis,
yok ta yeskya se masewal wan se yolikil.
Inik masewalme kwal pa takisaske pa in talTepet pa kimani kitakwikaltiske in kahelon.
14 Kwakin Moshé otem pa in talTepet wan oy kaha katkaloya inik isra'elita',
pa mo'alistaroloskya pa kitahtoltiloskya Dyos,
wan yehwante kinpakak ininshashalme.
15 Kwakin Moshé kinmili:
“Anmehwante shiyek kwal pa wipta wan amo shimotekak inak anmotaka' pa inik yey tonatim.”
16 Pa tahtaneshti pa in yey tonatim oye takomonaliste wan tapitaniliste wan se ayawit tilawak omosal pa in talTepet wan omokak tatsoyonaliste ka trompeta.
Moshte yehwante ompa katkaloya ka ininkalme tachiwalme ka shashalme moyoyokatikatkaloya.
17 Kwakin Moshé okinkisti pa in kalme tachiwalme ka shashalme okinwik inik isra'elita' pa kiyawak pa kinamikiloskya Dyos wan yehwante moketsaloya kaha katka in talTepet.
18 In talTepet Sinay popokatikatkaya kampa in WeTatsDyos temowaya ipanta in teshoshte.
In pokte popokaya kina se horno wan pa mochi in talTepet moliniyaya.
19 In tatsoyonaliste ka trompeta mokakiyaya hyero wehwe.
Kwakin otahto Moshé,
wan Dyos kinankili ka takomonaliste.
20 In WeTatsDyos otem ipa in tepetLom Sinay pa ni'ipunta in tepetLom wan ompa okinots Moshé pa takisaskya.
Pa kimani Moshé o'as ompa takpak,
21 in WeTatsDyos kili Moshé:
―Shitem wan shikinmil inik masewalme pa amo mo'asiltiske wan amo panoske in tatsakwal pa ankitaske in WeTatsDyos,
ta yok okichiwak miyak ka yehwante mikiske.
22 Niyok ma mo'alistarok inik totatsim yehwante mo'asiltiske ka in WeTatsDyos kampa yewal in WeTatsDyos pa amo kinkokoltis.
23 Moshé kili in WeTatsDyos:
―Inik isra'elita' amokwal pa takisaske pa in talTepet Sinay,
kampa tewal otishtake,
tikitowaya:
“Shikchi se tatsakwal pa amokwal panoske pa in talTepet wan ma ye tatasotal.”
24 Kwakin kili in WeTatsDyos:
―Shitem kaha kat inik masewalme,
shiktem Arón wan shihwalik monak ma yok amo'ak shihka ka inik totatsim,
pa mo'asilti ka in WeTatsDyos,
newal nihkokoltis yewal aki panos in tatsakwal.
25 Kwakin Moshé otem wan kintakichiliyaya mochi.