TakokolistePlaga ika inik takatilme ta'ishpa
11
In WeTatsDyos kili Moshé:
“Nihwalikas se hanya kokoliste ipa para'ó wan ipa egiptiyo'.
Kwah panos in,
anmishkawas pa anyaske wan anmishkistis nika.
2 Shitahto inak isra'elita',
wan shikinmil kampa moshte yehwante,
takam wan siwam,
monek pa yaske kintahtaniske inik ninihniwan takam wan ninihniwan siwam mochantilme pa oksek kalme inik tachiwalme ka plata wan oro.”
3 In WeTatsDyos okichi kampa inik egiptiyo',
pa kwal kinchiwililoskya inik isra'elita'.
Niyok Moshé katka se takat ka miyak tamawishtiliste ka inik nitekipanolme para'ó wan pa moshte inik egiptiyo'.
4 Moshé kito:
“Yok kito in WeTatsDyos:
‘Pa ipanta yowal newal nipanos pa kishki Egipto,
5 wan moshte mikiske inik takatilme ta'ishpa pa Egipto,
ka in yewal nitakatiliste ta'ishpa ka para'ó yewal isel motali pa nisiyaTats,
niyok ina yewal nitakatiliste ta'ishpa ka in tekipanolSiwat yewal tesi,
niyok inik nitakatilme ta'ishpa ka yolikilme.
6 Pa kishki Egipto moshte chokaske wehwe,
in yewal amo'ik ankitaloya wan amo'ik oksep ankitaske.
7 Ma yok pa amo'ak ka isra'elita' kiwahwatsa chich wan ika niyolikilme,
yok ankimatiske kampa in WeTatsDyos kichi pa nesis kati yehwante nimasewalme ika Egipto wan isra'elita'.
8 Moshte inik motekipanolme walaske nichitaske ka tankwaketsaliste nishtahtaniske:
‘Ya shi nika pa Egipto wan shikinwik momasewalme!’
Pa kimani panos in,
kwakin nipanotiyas.’”
Moshé okis ka kwalaniliste pa ni'ishpa ka para'ó,
9 in WeTatsDyos kili Moshé kampa in para'ó amo anmishkakis,
kampa yok monek pa motachiwaskya in,
kampa notapololtiliste momiyaptiloskya pa in tal Egipto.
10 Moshé wan Arón okichiwak inik tapololtiliste i'ishpa para'ó,
ma yok in WeTatsDyos okichikawalti niyol para'ó wan yewal amo okinka pa kisaloskya inik isra'elita' pa in tal Egipto.