Pa sesen inik takatilme ta'ishpa kitenewiliske in WeTatsDyos
13
In WeTatsDyos otahto inak Moshé wan kili:
2 “Shinishonanilik moshte inik anmopilwam takamito' takatilme ta'ishpa pa inik isra'elita' wan moshte inik anmoyolikilme takatilme ta'ishpa nimokawilis newal.”
3 Moshé kinmili inik masewalme:
“Shikilnamiktiyak in tonat yewal ankisak pa Egipto,
in Wepweblo kaha ankatkaloya kina tatsakwalme wan kampa in WeTatsDyos okineshti nichikawaliste.
Amo shikwak pan yewal kipiyas taposhawalti.
4 Anmehwante ankisaske ashka nika,
pa in meste abib,
5 kimani in WeTatsDyos mishwikas pa inintalme kananeyo',
heteteko',
amoreteko',
heweteko' wan yebuseyo',
yok kina okintenewil anmowichalme kampa kinmakaskya se tal yewal timak miyak lech wan nekti!
Yok pa kimani monamikis in meste ta'ishpa pa yankwik shiwit monek pa kichiwaske in mitotiliste.
6 Pa chikome tonatim amo kikwaske pan amo kipiyas taposhawalti,
wan pa in tonat chikome monek pa kichiwaske mitotiliste ka ni'itokaliste in WeTatsDyos.
7 Pa inik chikome tonatim amo kikwaske pan yewal kipiyas taposhawalti wan pa amo kaha pa ni se anmopweblo' amo yes in ten kipiyas taposhawalti.
8 ’Pa in tonat anmehwante ankinmiliske anmopilwam:
‘Tikchiwal in mitotiliste pa tikilnamiktiyaske in WeTatsDyos pa kimani otishkisti pa in tal Egipto.’
9 In tonat yes kina se taneshtiliste pa momahwa wan pa mofrente yewal kichi pa ki'ilnamikis ten,
kampa monek pa antaketstiyaske nitahtolme in WeTatsDyos,
kampa anmishkistis ka niwe chikawaliste in WeTatsDyos ompa pa Egipto.
10 Shikilnamiktiyak kampa pa moshte inik shiwim monek pa ankichiwaske in mitotiliste pa in se tonat.
11 ’Pa kimani in WeTatsDyos anmishashilti pa nital kananeyo' wan anmishmakas,
yok kina anmishtenewil tewal wan inik anmowichalme.
12 Monek pa ankintenewiliske moshte ininpilwam takamito' takatilme ta'ishpa pa in WeTatsDyos wan moshte inik takatilme ta'ishpa pa anmoyolikilme in toro,
kampa yewal ininyashka yes in WeTatsDyos.
13 Pa sesen burro yewal takatilme ta'ishpa,
kwal pa yes takistiliste ta otemak se chibit kina tatamakaliste.
Ma yok ta amo oye takistiliste,
yok kitapaniliske nikich.
Anmehwante niyok ankinkistiske moshte anmopilwam takatito' yehwante inintakatiliste ta'ishpa.
14 ’Pa mosta wipta,
kimani anmopilwam anmishtahtaniliske:
“Wan in ten kinek kitos?
ankinmiliske:
‘Ka niwe chikawaliste in WeTatsDyos otishkisti pa Egipto wan otishmaka ka in tekipanoliste yewal tikatkaloya kina tatsakwalme.’
15 Kimani in para'ó amo kinekiya tishkawaskya pa tikisaloskya,
in WeTatsDyos okinmikti moshte ininpilwam inintakatiliste ta'ishpa yehwante ompa katkaloya pa in tal Egipto,
yok kina masewalme,
wan kina yolikilme.
Tehwante tihmiktiliske in WeTatsDyos in takatil ta'ishpa yolikilme se toro wan nikinpalewis pa nikinkistis inik takatilme ta'ishpa nopilwam.”
16 Ina yes pa anmehwante kina se taneshtiliste pa momahwa wan pa mofrente,
kampa in WeTatsDyos otishkisti pa in tal Egipto ka niwe chikawaliste.’”
Ka in surko ayawit wan in teshoshte
17 Kimani in para'ó okinka pa kisaloskya inik isra'elita',
Dyos amo okinwik pa in ot yewal pano pa nital peleshteko' yewal katka amo wehkA,
kampa Dyos tamat:
“Ta ompa panoloskya,
monekiya pa panoloskya se momiktiliste,
kampa yok kinekiloskya walmokwepaloskya pa Egipto.”
18 Ma yok okichi Dyos pa kiyawaloloskya in ot pa se tal kaha tawak,
kaha in wehwe'atim chichiltik.
Inik isra'elita' kisak pa Egipto yaloya kina inik gwacho.
19 Moshé okiwik niweso' Yosé,
kampa Yosé kitowaya ka se tahtol melawak ka inik isra'elita' kinmiliyaya:
“Melawak,
in Dyos walas anmishpalewis pa kimani in panos shikinwikak noweso'.”
20 Inik isra'elita' okisak pa Sukot wan omosewik pa Etam kaha mopewalti in se tal kaha tawak
21 In WeTatsDyos kinwikaya pa tahka ka se surko ka ayawit wan niyok pa tayo kintawiliyaya ka se tawiliste nesiyaya kina se surko ka teshoshte.
Yok kwal nehnemiloskya pa tahka wan pa tayo.
22 Amo'ik kinkawaya in surko ka ayawit pa kinwikaskya pa se ot,
wan niyok in surko ka teshoshte pa mochi yowal.