2 Kwah asik,

okitak in tet ka tatsakwal kahakoyonkeTeshkal katka tamihmilwil;

3 okalakik,

amo kitak nimihki in TATS Yehshwa.

4 Kwah yehwante motahtanililoya,

ten aso opan,

omente takam ka inintakemtel tipitakalme omoketsak inak yehwante.

5 Ka miyak tamaptiliste mokwalpachok talpa,

wan yehwante kitol:

―Pates ankitemol ika mihmihki yewal yoltik?

6 Amo nika onka,

owalyol oksep.

Shikilnamikik kina anmichili kwah katka pa Galileya,

7 in monek yewal in NitakaTakpakIlwikak yes tatemakal pa nimahwam in takam ta'ihtakolme,

wan yes pa ta'ilpil pa kruskwawit,

ma yok pa in yey tonatim walyolis oksep.

8 Wan yehwante ki'ilnamikik ten kinmili Yehshwa,

9 wan kimani walmokwepak kahakoyonkeTeshkal kintakichilik mochi in 11,

wan moshte in oksek.

10 In yehwante kinmilik in tatitanilme katka Marya in siwat takati pa Magdala,

Yohana,

Marya ninantsi Yakob,

wan in oksek siwam.

11 In ten taketsaloya in siwam kintamashti in tatitanilme kampa amo kimatiloya ten kitotikatkaloya,

yok amo kinneltokaloya.

12 Ma yok,

Petros motaloti pa in kahakoyonkeTeshkal;

omokwalpach,

otachi pa kalitik,

wan okit in shashal kwakin omokwep icha motapololtitiyaya in ten panowaya.

13 Pa in se tonat,

omente ka yehwante yaloya pa in ot pa se ranchit itok Ema'ús,

katka kina pa 11 kilometro' pa Yerushalém.

14 Taketstiyaloya mochi in yewal ten panowaya;

15 wan kimani taketsaloya wan mokwalantitiyaloya ika iselte,

Yehshwa kinas wan yawiya inak yehwante.

16 Ma yok yehwante amo ki'ishmatiloya,

wan nesiloya kina kipiyaloya tapacholme nishtololwam.

17 Nesiloya ka miyak yolkokoliste yewal Yehshwa kintahtanili:

―Ten antaketstiwalal anmehwante?

18 Se ka yehwante,

yewal itoka Kelópas,

kinankili:

―Tewal han in se pa Yerushalém yewal amo kimat in ten opan pa in tonatim?

19 Kwakin Yehshwa kito:

―Ten opan?

Wan yehwante kinankilik:

―In ka Yehshwa in nasareteko,

yewal ni'ishpa Dyos wan ni'ishpa in masewalme katka se niTaketsal nitahtolDyos kipiyaya miyak poderoliste ka tachiwaliste wan ka tahtolme;

20 In TotatsimWehwe wan in towetatakewalme kitemakak pa kiteshpawililoskya pa kimiktiloskya wan ki'ilpiloskya pa kruskwawit.

21 Tehwante tikchishtikatkaloya yewal yeskya in se pa kinkishtiskya moshte Isra'El pa in topolewiliste.

Ma yok,

in opan pa yey tonatim.

22 Niyok sek siwam yewal katkaloya ka tehwante otishmaptik,

kampa oyak pa in kahakoyonkeTeshkal tahtanesti,

23 kina amo okitak nimihki,

owalak tichilik kampa tachiyaloya kina tatimiktiyaloskya yewal sek nitanawatilanhelme kinmilik yewal yoltik.

24 Sek ka tehwante oyak pa in kahakoyonkeTeshkal wan okitak yok kina kitol siwam,

ma yok yewal amo kitak.

25 Kwakin Yehshwa kinmili:

―Amo ankimatil antakakil kina anwehkawal pa antaneltokaske mochi kina kitol,

in Taketsalme nitahtolmeDyos!

26 Hanwel amo monekiya yewal in Kristo pa panoskya in takokoliste pa kimani yaskya pa in ilwikak pa reynaroskya pa nimahwakwalDyos ka nitawiliste?

27 Kwakin kintakechiliyaya pa mochi kaha tapahwilme pa in takwihkwiloliste pa kishki taketsaloya ka yewal,

okipewalti ka ni'amam Moshé wan pa moshte nitapahwilme pa in Taketsalme nitahtolmeDyos.

28 Kimani asik pa in ranchit kaha yaloya,

Yehshwa omochi kina hanse panoskya.

29 ma yok yehwante kichikawaltik pa mokawaskya,

kilik:

―Shimoka ka tehwante,

kampa ya tyotak,

wan tayopti.

Wan Yehshwa okalak wan omoka inak yehwante.

30 Kimani yowatikatkaloya kaha takwal inak yehwante,

okonan pan,

wan okimak tashtawiliste Dyos,

wan okishel ipanta wan okinmak yehwante.

31 Pa haniman mo'ishtapok nishtololwam,

wan ki'ishmatik;

hani yahmo kitak Yehshwa.

32 Kwakin mo'ililoya se ka okse:

―Amo tatatiyaya toyolme,

kwah tishmashtitiwalaya pa ot nitakwihkwilolisteDyos?

33 Haniman,

moketsak wan walmokwepak pa Yerushalém,

kaha kinmitak in 11 ompa nichikotikatkaloya wan niyok ompa katkaloya in oksek ninihniwam.

34 Yehwante kitoloya:

―Melak in TATS yoltik,

wan moneshti ka Shimón.

35 Kwakin in omente kintakichililoya ten kinpanowaya pa in ot,

wan kina ki'ishmatik Yehshwa kwah kishel in pan.

36 Kwah taketstikatkaloya ka in mochiten,

kwakin Yehshwa moneshti ipanta kaha katkaloya wan kinmili:

―Sewiliste ka anmehwante.

37 Kwakin momaptik hyero wan moyoyokatikatkaloya,

tamatiloya kampa kitatikatkaloya se espiritu.

38 Wan Yehshwa kinmili:

―Pates anmomaptitikat?

Wan pates yok antamatitikat pa anmoyol?

39 Shikitak nomahwam wan nokshiwam.

Newal ninewal.

Shinishkitskik wan shinichitak;

se espiritu amo kipi nakat wan weso kina ankital newal nikpi.

40 Wan kinmili in,

kinnishtili ininmahwam wan nikshiwim.

41 Wan kina yehwante kipiyaloya pakiliste wan in tapololtiliste amo kineltokaloya,

wan Yehshwa kinmili:

―Ankipiyal nika ten pa nikwas?

42 Kwakin yehwante kimakak tahko mich tawatsal,

43 wan yewal okonan wan okikwa pa ininishpa yehwante.

44 Hani kinmili:

―In ten opan ka newal in yewal newal annimishtakichil kimani nikatka ka anmehwante:

monekiya yewal mo'asiskya mochi in ten onka tapahwil pa in amam ipa newal pa NitanawatilMoshé,

pa in niTaketsal nitahtolDyos wan pa in Salmos.

45 Kwakin kinishtapol ininta'ilnamikiliste pa kimatiloskya kikakiloskya ten kinekiloya kitoloskya in tahtolme pa in nitakwihkwilolisteDyos,

46 wan kinmili:

―Yok onka takwihkwilolme,

wan yok monekiya pa kipanoskya in Kristo,

wan yoliskya oksep pa in mihmihki kwah panoskya yey tonatim;

47 wan ka ni'itokaliste yeskya taketsaliste pa kichiwaloskya ten kwal pa kineshtiloskya kampa kikweptikatkaloya ininta’ilnamikiliste wan kineshtiloskya kampa kikweptikatkaloya ininyolme ka Dyos ka inintachiwaliste kwahkwalme,

ka ta'ihniliste ininta'ihtakoliste moshte inik tanichikolme pa mochital,

omopewalti pa Yerushalém.

48 Pa in anmehwante ankital mochi in yewal ten panotik.

49 Newal niktitanis ipa anmehwante in nitateniwiliste notats;

anmehwante shimokawak pa in Wepweblo pa Yerushalém kimani kinamikiske nichikawaliste in yewal wal pa in takpakIlwikak.

50 Kwakin Yehshwa okinwik ompa pa BetAnya,

wan kinahkoki nimahwam kinmashtiyaya.

51 Kwah kinmashtiyaya,

omokishtil ka yehwante wan mo'ahkoktiyaya pa in takpakIlwikak.

52 Yehwante,

kililoya tahtolme wehwe pa Dyos,

wan walmokwepak ka miyak pakiliste pa Yerushalém,

53 wan hanse tonatim katkaloya pa in tyopWe kililoya tahtolme wehwe pa Dyos wan kimashtiloya Dyos.

Yok ma ye.