NitamashtilisteKwal Yehshwa-Kristo yewal kikwihkwilo Markus
Yuhanes takwateki ka miyak takam pa se tal kaha tawak amo'ak mochanti
1
Yok okipewaltik nitamashtilisteKwal ipa Yehshwa-Kristo,
nikonDyos.
2 Yok kina kikwihkwilo YeshaYah niTaketsal nitahtolDyos:
Newal niktake notanawatil ta'ishpa pa tewal,
pa tikchiwas ni'otim pa ininyoliliste masewalme.
3 Mokaki tsatsiliste ompa pa se tal kaha tawak:
“Shikchiwak ni'otim pa ininyoliliste masewalme pa kwah walas TATS.a
Shiktapolik ot.”
4 Takwatekiyaya Yuhanes pa se tal kaha tawak,
kinmiliyaya masewalme pa yeloskya takwatekilme,
pa kichiwaloskya ten kwal pa kineshtiloskya kampa kikweptikatkaloya ininta’ilnamikiliste wan kineshtiloskya kampa kikweptikatkaloya ininyolme ka Dyos ka inintachiwaliste kwahkwalme,
yok yeloskya ta'ihnililme ininta'ihtakoliste.
5 Walaloya pa kishki tal Yudaya pa kikakiloskya,
wan niyok pa in Wepweblo Yerushalém;
kinkwatekiyaya Yuhanes pa in atenko itok Yordán,
kinpakaloya ininta'ihtakoliste ka Dyos.
6 Yuhanes kipiyaya nishashalme tachiwalme ka nitohmi kameyo,
mokwehtiyaya ka kwero,
kikwaya chapolme wan nekti ta'onanal pa kwawim.
7 Kinmiliyaya,
nitanawatilisteDyos inik masewalme:
―Walas se yewal kipiyas miyak chikawaliste yewal newal amo nikpi,
amo nimonots pa nimopachos niktomilis nikorreya niwarach wan pa niktikipanolili nihan tipit.
8 Newal annimishkwatekiyaya ka at;
yewal anmishkwatekis ka in EspirituSanto.
Yuhanes kikwatek Yehshwa
(Mt. 3:13-17; Lk. 3:21-22)
9 Pa inik tonatim Yehshwa katka pa pweblo itok Nasaret,
yewal onka pa in tal Galileya,
wan Yuhanes kikwatekiyaya Yehshwa pa atenko itok Yordán.
10 Okis Yehshwa pa at,
haniman okit motap in takpakIlwikak,
okit kampa in ilwikak motapowaya wan in EspirituSanto temowaya ipa yewal kina se wilot.
11 Mokak Dyos nitahtol pa ilwikak kiliyaya:
―Tewal nokon niktasot;
nikpi miyak pakiliste pa tewal.
Satán kinek kitilanas niyol Yehshwa
(Mt. 4:1-11; Lk. 4:1-13)
12 Kwakin niEspirituDyos okichiwalti pa yaskya Yehshwa pa se tal kaha tawak.
13 Wan ompa omoka 40 tonatim ompa katka Satán,
kinekiya kitaniliskya Yehshwa niyol pa kichiwaskya ten kitsakwili ka Dyos.
Ompa katkaloya inik tekwanim yewal yolil pa kwawim,
walak nitanawatilanhelme wan kitikipanoliloya.
Nitikipanoliste Yehshwa
(Mt. 4:12-17; Lk. 4:14-15)
14 Se tonat kitsakwak Yuhanes,
Yehshwa oy pa Galileya,
kinnawatiyaya masewalme nitamashtilisteKwal kina reynaro Dyos.
15 Kinmiliyaya:
―Ashka o'as in tonat,
amo wehkawas tonat kwah Dyos reynaro.
Shihkwepak anmoyol pa Dyos kina kinek,
shihneltokak Dyos nitamashtilisteKwal.
Yehshwa kinnots nawi ta'asyanilme michim
(Mt. 4:18-22; Lk. 5:1-11)
16 Ompa panowaya Yehshwa itenko in we'atTemtik pa Galileya,
ompa okinmit Shimón wan ninohni André'as.
Katkaloya ta'asyanilme michim,
kintastikatkaloya mataraya ipanta we'atTemtik.
17 Yehshwa kinmili:
―Shinishtokak newal,
annimishnishtili kina ankinpihpiloske takam.
18 Kinkawak ininmataraya' ka ta'asiloya wan haniman kitokak Yehshwa.
19 Onehnem amo wEhka okit Yakobo,
wan ninohni Yuhanes,
yehwante ininpilwam SebadYah,
ka oksek katkaloya yehwante pa in barkit tatsomtikatkaloya kaha katkaya tsayanki ininmataraya ka ta'asiloya.
20 Haniman okinnots Yehshwa;
yehwante kinkawak pa in barkit nitats SebadYah niyok yehwante tapalewilme hani kitokak Yehshwa.
Se takat kipiyaya yehyekat katsak
21 Asik pa tal itok KaparNahum;
pa in tonatmosewilyudiyo okalak Yehshwa pa in tyopYudiyo ompa taneshtiliyaya.
22 Inik masewalme kintaneshtiliyaya ka chikawaliste kina se wetatakewan,
amo taneshtiliyaya kina yehwante Tamashtinilme NitanawatilMoshé.
23 Wan ompa katka pa in tyopYudiyo se takat kipiyaya yehyekat katsak,
kipewalti tsatsiliste:
24 ―Yehshwa tewal otikis pa in pweblo Nasaret!
Ten tikpi ka tehwante?
Otiwal pa titishtamis?
Nihmat ak tewal,
niChipawak Dyos.
25 Kwakin Yehshwa oki'ahwa chikawak yehyekat,
wan kili:
―Amo shinawatiti,
wan shikis pa yewal!
26 Kwakin in yehyekat katsak kitsehsel chikawak takat,
wan tsatsi chikawak,
okis pa takat.
27 Wan ompa moshte momaptitikatkaloya,
motahtanililoya sek ka oksek:
―Ten yewal in?
Se tamashtiliste yankwik kichi kina se wetatakewaliste!
Yewal kintake yehyekatim kahkatsak,
wan kineltokal!
28 Haniman moshte kimatiloya pa tal Galileya yewal kichiwaya Yehshwa.
Yehshwa kipahti nimonantsi Petros
(Mt. 8:14-15; Lk. 4:38-39)
29 Kwah okisak pa in tyopYudiyo,
ompa Yehshwa oy inak Yakobo wan Yuhanes pa nikal Shimón wan André'as.
30 Nimonantsi Shimón tastikatka pa nitapeshte kipiyaya atonawiste;
wan kinawatik Yehshwa kampa katka kokoshke.
31 Kwakin mo'ashilti Yehshwa,
okikitski nimahwa okital pa nitapeshte;
opahti siwat yahmo kipiyaya atonawiste,
kwakin kintamakaya.
Yehshwa okinpahti myak pa in tonat
(Mt. 8:16-17; Lk. 4:40-41)
32 Kwah otamalin tonat wan tapohpoyapti,
kinwalikilik Yehshwa moshte kokoshkim wan yehwante kipiyaloya niyehyekatim tawalilom;
33 wan moshte pa in Wepweblo monichikoloya pa nitatapoli kaha kalakil.
34 Okinpahti Yehshwa myak kokoshkim ka myak takokoliste,
ma yok amo kinmakawalti Yehshwa niyehyekatim tawalilom pa tahtoloskya,
kampa kimatiloya akyewal.
Yehshwa kintakichilitinem pa Galileya
35 Tahtanesti,
kwah ayamo'ok tanesiyaya kwal,
omokets Yehshwa okis pa in Wepweblo,
oy kaha amo'ak katka,
ompa Dyos kitahtaniyaya.
36 Shimón wan in oksek ninihniwan katkaloya inak yewal wan oyak kitemok,
37 kwah kitak kilik:
―Moshte mishtemotikat.
38 Yehshwa kinmili:
―Ma tiyak pa oksek pweblo',
ma tikintakichilik ompa niyok nitanawatilisteDyos:
Kampa ka yewal niwal.
39 Yok kintakichiliyaya nitanawatilisteDyos pa in tyopalmeYudiyo',
pa kishki Galileya,
wan niyok kinkishtiliyaya ininyehyekatim tawalilom.
Yehshwa kipahti se yewal palantikatka inakayo
(Mt. 8:1-4; Lk. 5:12-16)
40 O'as se takat ka Yehshwa kipiyaya kokoliste itok lepra,b
yewal mokahkashkarotikatka nikwero inakayo.
Motankwakets ka Yehshwa wan kili:
―Ta hanwel tihnek,
shinishpohpo shinishpahti.
41 Yehshwa ki'ihnil,
wan kitalil nimahwa,
wan kili:
―Nihnek.
Nimishpohpowas pa tipahti shipahti.
42 Kwah kito in tahtolme,
yahmo ones ninaka palanki itok lepra,
wan yok moka tapohpowali opahti.
43 Haniman Yehshwa okitake pa mokwepaskya,
ma yok ka miyak chikawaliste,
kili:
44 ―Shikit,
amo'ak shikil amoten;
shi shimoneshti ka totats,
wan shitemak mochipawaliste,
yewal kina tatake Moshé pa yes taneshtiliste,
ka in tachiwaliste kampa tewal otipahti.
45 Ma yok kwah okis in takat,
taketstinem wan tanawatitinem kaha han kina okipan.
Kwakin Yehshwa amokwal kalakiskya inik Wehwepweblo',
kampa takam kimatiloya kaha katka yewal.
Yok omoka kiyawak kaha amo'ak mochantiyaya;
walaloya takam kitaloya pa mochi inik pweblo'.