2 Yehshwa okinmit ome barkito' pa itenko in we'atTemtik,

inik ta'asyanilme temok pa kipakaloskya ininmataraya.

3 Yehshwa otakis pa se barkit,

yewal katka nibarkit Shimón,

wan kitahtani pa kiwikaskya wehkit ka itenko.

Kwakin omotal pa barkit,

wan ompa kinmashtiyaya masewalme.

4 Kwah otam otahto,

kili Shimón:

―Shihwik in barkit kaha wehkat,

wan shikintasak ompa anmomataraya' pa ankinkishtiske michim.

5 Shimón kili:

―Tamashtini,

pa mochi yowal titikipanotiyak wan amoten tihkitskik;

kampa yok tewal tishtahtani,

niktasas in mataraya.

6 Yok okichiwak,

wan okinkishtik myak michim kampa ininmataraya' tsayaniyaya.

7 Kwakin okinnotsak ka taneshtiliste ininnihniwan yehwante katkaloya pa in okse barkit,

pa walaloskya kinpalewiloskya.

Kimani yehwante asik kintemiltik moshte omente barkito' hanwel tipit pa polakiloskya.

8 Kwah Shimón Petros okit in,

omotankwakets i'ishpa Yehshwa wan kili:

―Shikis ka newal,

TATS,

kampa newal nikatsawak pa noyol.

9 Wan yok kina yewal wan in moshte ininnihniwan motapololtiloya,

ka ininta'asil michim yewal kinkishtiloya.

10 Niyok motapololtiloya Yakobo wan Yuhanes,

ininpilwam SebadYah,

yewal katkaloya ininnihniwan Shimón.

Wan Yehshwa kili Shimón:

―Amo shimomapti;

kampa ashka tiyes ta'asiyan pa takam.

11 Kinwikak in barkito' kaha tawak,

wan kikawak mochiten tapiyaloya pa kitokaloskya Yehshwa.

12 Se tonat katka Yehshwa pa se in Wehwepweblo,

o'as se takat kipiyaya kokoliste itok lepra,^a

kwah okit Yehshwa,

omotankwakets wan nishayak ki'asilti talpa kitahtaniyaya:

―Tats,

ta tihnek,

shinishpohpo ka notakokoliste.

13 Kwakin Yehshwa kimela nimahwa,

kikitski wan kili:

―Newal nihnek,

timoka tapohpowal!

Wan haniman okikis nikokoliste lepra.

14 Amo'ak shikil amoten.

Kili:

―Hanwel shi shimoneshti ka totats,

wan shitemak mochipawaliste yewal kina tatake Moshé,

pa yes taneshtiliste ka in tachiwaliste kampa tewal timoka tapohpowal motakokoliste.

15 Yok moshte kitaketsaloya yewal ten kichiwaya Yehshwa,

wan myak masewalme monichikoloya pa kikakiloskya wan pa kinpahtiskya inintakokoliste.

16 Wan Yehshwa yawiya kaha amo'ak katka pa tahtoskya inak Dyos.

17 Pa se tonat,

kimani Yehshwa tamashtiyaya,

yowatikatkaloya in parisheyo' wan Tamashtinilme NitanawatilMoshé walaloya moshte pa inik ranchito Galileya,

Yudaya wan Yerushalém;

wan nichikawaliste in TATS katka pa Yehshwa pa tapahtiskya.

18 Kwakin asik sek takam kiwalikaloya pa tapeshte,

se yewal amo nehnemiyaya,

kinekiloya kiwikililoskya pa kalitik wan kitaliloskya i'ishpa Yehshwa.

19 Yok amokwal kina kikalaktiloskya,

kampa katkaloya myak masewalme.

Wan takisak ikpak takalchiwal kikoyonak,

kitemowik ka nitapech in amo nehnemiyaya yok kitalik ipanta masewalme,

wan i'ishpa Yehshwa.

20 Yehshwa okit kina taneltokaloya yehwante,

kili in kokoshke:

―Takat,

ashka mota'ihtakoliste moka ka ta'ihniliste.

21 Inik Tamashtinilme NitanawatilMoshé wan inik parisheyo' tamatiloya:

“Ak tamat kampa yewal,

yok kina kitotik amoTamawishtili pa Dyos?

Akyewal ta'ihnili ta'ihtakoliste?

Amo hanwel Dyos ta'ihnili.”

22 Yehshwa kimat kina tamatitikatkaloya yehwante,

kwakin kinmili:

―Pates yok antamatitikat anmehwante pa anmoyol?

23 Kina aso kwal?

Ta nikil in amo nehnem:

“Mo'ihtakoliste onka tapohpowali”,

ma yok ta nikil:

“Shimokets,

wan shiyapti”?

24 Shihmatik anmehwante kampa NitakaTakpakIlwikak^b kipi tatakewaliste pa tal pa ta'ihnilis katsawiliste.

Kwakin Yehshwa kili in takat yewal amo nehnemiyaya:

―Shimokets,

shikonan motapech wan shiyapti kaha timochanti.

25 Kwakin haniman,

in takat omokets i'ishpa yehwante,

okonan nitapech yewal wistotikatka wan panoti kaha mochanti kitotiyaya tahtolme wehwe pa Dyos.

26 Moshte motapololtiloya wan kililoya wehwe tahtolme Dyos,

wan ka miyak tamaptiliste kitoloya:

―Aska tikitak tachiwaliste tapololti.

27 Kwah opan in Yehshwa okis,

wan okit se yewal tahtanil miyak tapishkalisteTomi^c itok Lewí,

yowatikatka pa in kal kaha tashtawaloya tapishkalisteTomi,

Yehshwa kili:

―Shinishtok.

28 Kwakin Lewí omokets,

okika mochi,

okitok Yehshwa.

29 Pa tyotak,

Lewí okichi se we mitotiliste pa ika Yehshwa,

wan ompa katkaloya miyak tapishkalisteTomi inak oksek masewalme yowatikatkaloya kaha takwal.

30 Inik parisheyo' wan inik Tamashtinilme NitanawatilMoshé kinwaltaketsak nimoneshtililme Yehshwa,

wan kinmilik:

―Pates antakwatikat wan antakontikat anmehwante inak yehwante tahtaniloya miyak tapishkalisteTomi wan ta'ihtakolilme?

31 Yehshwa kinnankili:

―Amo moteshmonekil tapahtinilme nahyehwante amo kokoshkim,

hanwel moteshmonekil ka in kokoshkim.

32 Newal amo niwal nikinnots in kwahkwalme,

hanwel nikinnotsas in ta'ihtakolme,

pa kichiwaske ten kwal pa kineshtiske kampa kikweptikat ininta’ilnamikiliste wan kineshtiske kampa kikweptikat ininmoyolme ka Dyos ka inintachiwaliste kwahkwalme.

33 Kilik Yehshwa:

―Pates ininmoneshtililme Yuhanes wan in parisheyo',

hyero miyak mosawal wan kichiwal myak tahtolme pa Dyos wan tewal anmomoneshtililme hanwel takwal wan takonil?

34 Yehshwa kinnankili:

―Aso anmehwante kwal ankichiwaske pa mosawaske ininnihniwan ka in mitotiliste kwah monamiktil,

kimani yewal monamikti onka ka yehwante?

35 Ma yok,

asi in tonat yewal monamikti yahmo yes ka yehwante;

kimani asi in tonat kwakin han mosawaske.

36 Kwakin kinmashti se tapowaliste:

―Amo'ak kiteki se nawa yankwik pa kitsomilis se nawa shashal.

Ta yok okichi,

hanwel ki'ihtakos nawa yankwik;

han in tatsomal amokwal mokawas pa nawa shashal.

37 Niyok amo'ak kitali nihugoUbaBino yankwik pa'itik pa in tekomat tachiwal ka kwero yewal kipi miyak tonatim;

kampa nihugoUbaBino yankwik kitsayanas in kwero kweponis,

kwakin nihugoUbaBino monokis wan in kwero mo'ihtakos.

38 NihugoUbaBino yankwik monek kiteka pa se tekomat tachiwal ka kwero yankwik,

yok in nihugoUbaBino kina in tekomat tachiwal ka kwero mo'ahkokis.

39 Wan ta ak kipal nihugoUbaBino yewal kipi miyak shiwim,

yahmo kinekis kones nihugoUbaBino yankwik,

kampa kitos:

“In nihugoUbaBino yewal kipi miyak shiwim kwal welek.”