Isra'elita' kisak pa Egipto
Ininyokokoliste isra'elita' pa tal Egipto
1
1 Ina yewal ni'itokalme ininpilwam Isra'El yehwante yaloya ka sesen ininfamilya' pa tal Egipto:
2 Rubén,
Shime'ón,
Lewí,
Yehudá,
3 Isakar,
Sabulón,
Benyamín,
4 Dan,
Neptalí,
Gad wan Asher.
5 Wan moshte ininkolinchim wan ininpilwam katkaloya 70 masewalme wan Yosé ompa katkaya pa Egipto.
6 Omik Yosé wan ninohniwan wan moshte inik masewalme yehwante ompa asiloya.
7 Ma yok nimasewalme Isra'El okinpiyak myak nipilwam wan momiyaptik hyero myak wan ka chikawaliste wan tentikatkaloya yehwante pa in tal Egipto.
8 Ma yok o'as se yankwik rey ipa in tal Egipto yewal amo ki'ishmat Yosé,
9 wan kinmili in egiptiyo':
“Shikitak in masewalme isra'elita',
hyero myak wan miyak chikawaliste kipiyal amoyok kina tehwante!
10 Ma tikchiwak se taketsaliste pa yahmo momiyaptitiyaske.
Ta amo tikchiwak,
ta oye se momiktiliste pa in tal kwal pa monichikoske ka inik tishkokolil,
pa yok momiktiske ika tehwante tishtaniliske wan yaske nika kaha kat.”
11 Yok oye kina okintalik inik egiptiyo' inik tatakewaloya ipa inik isra'elita' kampa hyero kintekipanoltiloya.
Yok inik isra'elita' kinchikawaltik pa kikalchiwililoskya Wehwepweblo para'ó kaha ki'ahkokiloskya takwal,
in Piton wan Ramsés.
12 Ma yok pa kishki hyero kintakokoltiloya,
ma hyero myak momiyaptitiyaloya wan inik egiptiyo' kinmakasiloya inik isra'elita' kampa hyero myak katkaloya;
13 kwakin in egiptiyo' hyero miyak kintekipanoltiloya isra'elita'.
14 Miyak kinkokoltiloya pa niyoliliste,
kinchiwaltiloya pa kishakwaloloskya tal wan kichiwaloskya ladriyo' wan mochiten tekipanoliste pa kwahmilme.
In mochi inik isra'elita' katkaloya hyero takokolilme.
15 Katkaloya omente siwam hebreteka' yehwante tapahtiloya ka yehwante kinpiyal ininpilwam,
itokalme Siprá wan Pu'á,
inik yewal in rey pa Egipto okintake:
16 ―Kimani kinpalewiske inik siwam hebreteka' pa kimani kintakatiltil ininpilwam shikinmitak ta takatonte shihmiktik ma yok ta siwatonte shihkawak ma yol.
17 Ma yok inik tapahtilme kimawishtililoya Dyos,
ma yok amo kichiwak kina kinmiliyaya in rey pa Egipto,
yok okinkawak ka yoliliste inik takatito'.
18 Kwakin in rey pa Egipto otatake pa kinnotsaloskya in omente siwam tapahtilme wan okintahtanil:
―Pates ankichiwak in?
Pates amo ankinmiktik inik takatito'?
19 Inik tapahtilme tanankilik:
―Inik hebreteka' siwam amoyok kat kina inik siwam Egiptiya',
hanwel yehwante kat ka miyak yoliliste wan kintakatiltil ininpilwam kwah ayamo'ok tehwante ti'asil.
20 Dyos kinmashti inik tapahtilme yehwante kintakatiltil piltontim,
inik isra'elita' mochiwak ka miyak chikawaliste wan hyero momiyaptik
21 ma yok Dyos kinmashti in omente siwam tapahtilme kampa yehwante kimawishtililoya Dyos,
okinmakawalti pa kinpiyaloskya myak nipilwam.
22 Kwakin in rey pa Egipto okintake moshte masewalme pa nipweblo:
―Shikintasak pa atenko moshte inik piltontim isra'elita' kishki takatil!
Inik siwatito shikinkawak ka yoliliste.