Nitakatiliste Moshé
2
Se takat wan se siwat omonamiktik.
Moshte omente katkaloya pa in tanichikol Lewí.
2 In siwat o'osti ta'apa wan okipi se nikon takat.
Kwah okit kampa kwal nesiya okitat pa yey meste.
3 Kwah yahmo kwal kina kitatiskya,
okonan se kakashte,
okishawil chapopote pa mo'ahkokiskya pa amo polakiskya wan okikalakti piltonte,
oy okika kakashte itsala akam pa itenko atenko Nilo.
4 NinohniSiwat in piltonte omoka kitati wehkit pa kitaskya ten kipanoskya in piltonte.
5 NikonSiwat in para'ó oyaya maltiya pa atenko.
Inintekipanolme siwam nehnemiloya pa itenko atenko,
okit yewal in kakashte itsala akam wan okitetan se nitekipanolSiwat pa kwalikaloskya.
6 Kwah okitap in kakashte wan okit in piltonte yewal chokatikatkaya,
oki'ihnil wan kito:
―Ina piltonte hebreteko!
7 NinohniSiwat in piltonte okitahtanil in nikonSiwat para'ó:
―Tihnek pa niyas niktemos se siwat hebreteka pa kichichiltis wan kikwitawis in piltonte?
8 Kinankili nikonSiwat para'ó:
―Shi shihnots.
Kwakin in siwatPiltonte oy wan okwalik ninantsi in piltonte,
9 wan nikonSiwat para'ó kili:
―Shihwik in piltonte wan shikchichilti,
newal nimishtashtawilis.
Yok oye kina ninantsi in piltonte okiwik wan oki'apa.
10 Kimani in piltonte omo'apa,
okiwik nikonSiwat para'ó wan yewal oki'apa kina nikon,
yewal okitokayolti Moshé kampa kito:
“Newal nihkisti pa at!”
Moshé cholo pa in tal Madyan
11 Se tonat,
kimani Moshé katkaya we,
oy okinmit ninohniwan niyEste wan okinmit kampa hyero kintekipanoltiloya.
Niyok okit se egiptiyo' kiwachilitikatkaya se hebreteko,
se ka inik ninohniwan.
12 Kwakin tachiyaya pa kaha han,
wan amo'ak kitaya,
wan okimikti in egiptiyo' wan okitapach pa shal.
13 Pa mostatik Moshé okis wan okinmit omente hebreteko' momiktitikatkaloya.
Okitahtanil in yewal kitehtewiyaya nokse:
―Pates tiktehteptik monihni?
14 In takat kinankili:
―Ak mishtal tewal kina se wetatakewan wan hwes ipa tehwante?
Hanwel tishmiktis newal kina tihmikti in egiptiyo'?
Kwakin Moshé omomapti wan tamat:
“Melawak ya okimatik in ten onikchi!”
15 Kimani in para'ó okimat,
okinek okimikti Moshé,
ma yok Moshé ochol ka in para'ó wan oy omochanti pa in tal Midyán.
16 In totats pa in tal Midyán kinpiyaya chikome ininpilwam siwam,
yehwante yaloya kikistiloya at pa kintemiltiloskya kaha kintakoniltiloya niborrego' nitats.
17 Pa kimani inik takwitawilme borrego' asiloya wan kintohtokaloya ompa.
Se tonat Moshé okinpale yehwante,
wan okinmak at ininborrego'.
18 Kimani walmokwepaloya ininicha kaha katkaya RehuEl inintats,
yewal okintahtanil:
―Pates anwalmokwepak ashka kwalka?
19 Yehwante tanankilik:
―Se egiptiyo' otishpale ka inik takwitawilme borrego'.
Niyok otishpale okikisti at wan okinahmak borrego'!
20 Kwakin RehuEl okintahtanil ininpilwaSiwam:
―Kaha onka in takat?
Pates ankikawak isel?
Shiyak shiknotsak ma wal takwa tonawak!
21 Moshé omoka mochantiti ompa.
Panok myak tonatim RehuEl okimak nikon siwat Shépora pa yeskya nisiwa Moshé.
22 Shépora okipi se nikon wan Moshé okitokayolti Gershón in kinek kitos:
“Ninewal se yewal wal pa okse tal nika amo notal.”
23 Moshé ompa omoka myak tonatim wan pa inik tonatim omik in rey pa Egipto.
Ma yok inik isra'elita' hyero kintekipanoltiloya.
Yehwante chokaloya pa in tayolkokoliste yok kitahtaniloya Dyos pa kinpalewiskya,
24 Dyos okinkak inintakokoliste wan oki'ilnamik in taketsaliste melawak yewal okichi ka AbRaham,
Itsak wan Yakob.
25 Yok oye kina Dyos okinmit inik isra'elita' wan okimat kina mochantitikatkaloya.