Gavana Cha Feliks kot ya Cha Pol karivo
24
Taim umo 5-pla konoiki ven,
hetpris vou tempel awoꞌo yaꞌa Cha Ananaias awei aro beiy ovu,
ta saveman vou lo awoꞌo yaꞌa Cha Tertulus.
Kepepeo mataimon pako Jerusalem ya keparo mataimon Sisaria.
Beiyo ve kenopi ke nepirikeiya gavana ke kot-a nepiapao Cha Pol.
2 Kopei taim kipia Cha Pol kanoi aꞌari,
Cha Tertulus kavariko karoi ya kairai roa Gavana veka,
“Biapako,
mema inyia kanom momi cha ta ao prumo va kamao koneman romi revo kokai kuinyia iu mare.
Ya kemi yarau veka ao prumo inyia amao ero,
ao taipere tija via ere neman imi revo ero,
kama rovoru kere neman varu ta riꞌi memi komariri.
3 Ao emo kemi yarare ta oto va kotemi revo,
rore boko mowmow ta pasin mowmow maramara,
kemake oti pako nemoma.
4 Ta via kuinyia iu nanavema nakemiki revo vai.
Ta kanake nanatere noma riꞌi mariri mema namomi ya awirai korama memi namarivo.
5 “Bia emo kemi yaraka ven veka nai prumo inyia kararerare.
Ya inyia roma va karao wararoiy aro Juda vou boko prumo vou meꞌri.
Ta memi ao emo kemi yarau ven.
Bia emo yaꞌa inyia kanoi roiy cha aro pa va inyia epikeiya bia Nasaret.
6-8 Ya kopei tempel-a karake narao notaipo iu ine ya God,
tapara ve kemaivia evo.a
Kopei mare moma veku kuinyia iu namatere moa Cha Pol row awirai rere ao prumo kararerare.
Ya kopei awirai yaꞌa nairai roma,
ya kopei ku vou awirai emo kot-a emiamao mow emo nama yarau.”
9 Aro Juda awirai koraꞌa ya Cha Tertulus keko ta kyirai veka,
“Awirai ya airai ero,
ero awakai.”
Cha Pol awirai-ya kairai roa Cha Feliks
10 Kopei taim namba wan Gavman eno kairere ke noriritaka Cha Pol veka kuinyia iu awirai yaꞌa nairai,
ya Cha Pol kairai veka,
“Kana yarau veka ainini mowmow kerenori ven,
kakemi veka jas yei aro bombiam vou kantri em.
Korao veka ta riꞌi nena koneman revo ke awirai nena nanairaikine noma.
11 Bo namatere moiy aro ovu,
keta nama yarau veka,
umo 12-pla konoi ven,
kakone mataimon pako Jerusalem ke lotu nanao.
12 Aro voro kevitikena ero,
via epirikena awirai-ya raꞌa anairai wararoa bio raꞌa tempel aꞌari vai,
ta via epirikena aro bombiam-a anaopokei oꞌro lotu aꞌari,
o boko ovu vou mataimon pako evo.
Baun ben!
13 Ta via kuinyia iu ku vou kot-a epinapao pow ero nepiritama vai.
14 Nena keta nanairai revo veka,
nena inyia lotu kanao noa God yei aro apo memi lotu ta kepao pova ero.
Ya kakeni veka bia yaꞌa inyia pa va arikeo Rarab ya Biapako.
Ta Juda emo kyirai veka ao en komaramara revo.
Nena kanabilip now awirai mowmow vou lo ta awirai yei profet-a epeo ero minyiao.
15 Ta nena inyia kana bilip minyiao veka God-a keta beiyo eviri ven ero nairiy nevereko varu.
Kopei taim ve,
beiyo God-a kayarai veka keniniu iu ine yaꞌa ta yei beiyo voro kayarai veka ketaipei ero,
keta nevereko minyiao.
Aro kot-a epinapao ero,
yei minyiao kebilip ta kekepi keiya God-a keta narao veka.
16 Korao veka ta umumoka inyia karoni kupuana ke ao va nanao nere neman revo iu ine ya God.
Kopei iu ine yei aro bombiam minyiao keta neyarau veka ao va inyia kanarenare kere neman.
17 “Kopei ainini ovu konoiki ven mataimon pako Jerusalem-a kaneneo ya kanoni boko ovu.
Korao veka ta mare akai kakane varu ke ketao ovu va nanawani noiy aro ao va owaunrei ero.
Ta kanake ofa nena ovu va nanao minyiao.
18 Ya kopei kakeni tempel aꞌari ofa kanao pa kanikeo pasin niniu iu ine ya God.
Ya taim ofa kanao ven,
kekape kevakakena.
Ta aro bombiam prumo via ekepi pina ero,
via ere epu vai.
19 Ta ovu yei Juda vou provins Esia kekape kyiavena kyiaororona.
Korao veka ta,
yei veku keta nekape neropi iu ine moma ya kot-a nepenapao,
bo awirai-ya nuinyia iꞌiy.
20 Bo nowaun,
aro ekepi evo kuinyia iu nyirai revo arape aro yei kot pako yei Juda kepirike pina,
taim karoni niy ine yei ta awirai nena kanairirai.
21 Era ku vou korao veka,
ao vou moikera kanapon po kanao taim karoni niy ine yei ya awirai nena kanairirai.
Taim ve,
kain pako kanairai veka,
‘Kana bilip revo veka God-a keta narao beiyo eviri ven ero keta nevereko varu.
Korao veka ta karoni revo iu ine mopu ta mare kot-a kepenapao em.’ ”
22 Kopei Cha Feliks kayarau revo row bilip nau pasin yei aro bombiam pa va epikeo Rara ya Biapako.
Ya kopei kairai roiy veka,
“Awirai emo keta nuinyia keiya Cha Lisias nararo vo,
ya kopei awirai nena nanairai nopu.”
23 Ya kopei awirai kupuana kairai roa opisa anoi cha ke narao roa revo Cha Pol.
Ta via narao nakei veka kalabus vai,
raꞌa vou minyiao via naraorariy aro ya Cha Pol nekape nepirikeiya ke ao ipin-a nelpim yaꞌa.
Kyiorepariya revo Cha Pol oꞌro kalabus
24 Umo ovu kerenori ven ya kopei Cha Feliks eri om yaꞌa Kwa Drusila keraikape kere pirikeiya Cha Pol.
Kwa Drusila vou Juda.
Ya keraikape ya Cha Feliks kairia Cha Pol kakai ya a va kairai roiy row rara vou pa va nepekeiya Krais Yesus.
25 Kopei taim Cha Pol kakei a va inyia kairirai roiy row pasin neman ke nyiorepariy yei veku iu ine ya God,
ta awirai ya God-a keta kot-a nareirao beiyo minyiao kairai roiy.
Kopei awirai emo korao Cha Feliks kariri toro ya kairai roa Cha Pol veka,
“Yauke.
Taim raꞌa keta nana mompe vo ya kopei nainima varu.
Mare nanomi vo.”
26 Kopei taim Cha Feliks eri om yaꞌa keraikape kerai pirikeiya Cha Pol,
ta Cha Feliks karitoro veka Cha Pol ketao va keta nabaim yaꞌa ke narokoreriya nanoi.
Korao veka ta umumoka inyia kairia ya a va kere irai.
27 Taim ainini riepin-a konoiki ven,
Cha Porsius Festus popo va kako vova Cha Feliks.
Korao veka ta Cha Feliks karake narao riꞌi yei Juda noneman,
ta via ao va raꞌa araoroa Cha Pol vai.
Karin Cha Pol kakei po oꞌro kalabus.