Cha Festus awirai ya Cha Pol karivo
25
Ya Cha Festus kakai ven ya kave gavana vou distrik Judia.
Ya kopei umo 3-pla konoiki ven,
mataimon Sisaria karereo ya kakoi mataimon pako Jerusalem.
2 Ya bikpris awei aro beiy yei Juda kenopi piya ta awirai-ya kevitikeiya Cha Pol.
Kyirai kemomonaka veka,
3 “Kemeremow revo namairai moa Cha Pol nakoi Jerusalem.”
Ya ketere poa Cha Festus veka,
ku vou korao veka,
kyirai poiy beiyo veka,
taim Cha Pol naute nanoi keta neropi roki rara ya nepyeiya narai.
4 Ya Cha Festus kaoroiy veka,
“Cha Pol kakalabus mataimon Sisaria ya mentan mentanki keta nena veku nanoni Sisaria.
5 Korao veka ta aro kenopi popu cha ero,
kuinyia iu neparo pona.
Bo bio ve nai-ya raꞌa narao,
kuinyia iu kot-a nepiapao vere.”
6 Cha Festus kakei iꞌiy veka umo 8-pla o umo 10-pla ya kopei kararo varu Sisaria.
Kopei uri vou,
kanoi kakeiyo bo ya jas ya kairai roiy nerainyaka Cha Pol nakai iya.
7 Taim Cha Pol kakai ven aꞌari,
ya Juda ekepi Jerusalem keparo ven bariri ta keropi iri kyiapepariya ta awirai mowmow kevitikeiya,
kyirai veka yaꞌa veku pasin taipetaipe akai-ya karao.
Ta via kuinyia iu nepiritaka Cha Festus veka,
awirai ve yei ero awakai.
8 Ya taim awirai kyirai ven ya kopei Cha Pol kairaiki roiy veka,
“Ao taipo va via raꞌa anao wararow lo yei Juda o wararow tempel o wararoa Cha Sisar vai.”
9 Cha Festus karake narao Juda ova noroi rova ta katere roa Cha Pol veka,
“Era kamake nakome Jerusalem ke kot-a nenema rivo vai?”
10 Ya kopei Cha Pol kairaiki roa veka,
“Baun ben!
Oꞌro kot mare aron evo,
ero ya Cha Sisar.
Mema kama yarau ven veka rong-a via raꞌa anao niy Juda.
Oꞌro em po keta kot nena narivo
11 Bo ao taipo raꞌa nanao ke kuinyia iu narani,
kuinyia iu narani.
To kopei bo awirai voro kot-a epenapao ero via awakai,
bia raꞌa via kuinyia iu narerenaki iꞌiy eno yei vai.
Kanerenow revo Cha Sisar veku kot-a nerena rivo.”
12 Taim Cha Festus awei beiyo inyia ruru eupoa ero awirai-ya kyirai ven,
ya kopei kairai roa Cha Pol veka,
“Mema veku kameremow revo Cha Sisar kot-a nerema rivo,
korao veka ta nanom miya Cha Sisar.”
Cha Festus eri King Agripa awirai ya Cha Pol kerai yirai minyiao
13 Umo ovu kerenori ven,
King Agripaa eri rou yaꞌa Kwa Bernaisi keraikape Sisaria ke umonai neman-a neraipao poa Cha Festus.
14 Kerai kepi Sisaria umo kere mowmowki naiy,
ya Cha Festus kairai roa King Agripa row awirai ya Cha Pol.
Kairai roa veka,
“Cha Feliks bia raꞌa kareria baunke kakei kalabus.
15 Taim kanaute kakone mataimon pako Jerusalem,
yei bikpris vou tempel awei aro enopi poiy Juda va cha,
kot-a kepiapao ta kepake nanairai noiy veka,
nai-ya karao keta soldia nepao poa toro.
16 “Ta kanairai noiy veka,
‘Gavman vou Rom via kuinyia iu ao taipo narao roiy bia kanakanapon vai.
Beiyo kot-a uinyia iya ero,
keta naroi revo iꞌiy ine yei aro kot-a epiapao ero vo.
Ya taim-a neumoa a va nairai roiy rore ao voro arao otaipo iꞌiy ero.’
17 Korao veka ta kakane varu mataimon Sisaria ta aro ve kekape pona minyiao.
Konina via minanuru vai,
kopei uri vou,
kanairai noiy kerainyaka kakai ke kot-a nenia rivo.
18 Ta yei aro voro kot-a epiapao ero kevereko ta kanitoro veka kot-a keta nepiapao pow ao taipo arao ero.
Ta via epiapao veka.
19 Awirai ovu kyirirai wararoa row pasin vou lotu yei.
Raꞌa vou awirai ve,
Cha Pol kairai veka bia raꞌa karai ven awoꞌo yaꞌa Yesus,
kavariko varu ya kakei tare.
20 Ku vou awirai ve nena via anaorenao vai,
korao veka ta kanatere noa nakoi Jerusalem ke kot-a nenia rivo.
21 Ta Cha Pol koinyia ta kairai nakei kalabus ke Cha Sisar kot-a neiya rivo.
Korao veka ta awirai kupuana va kanairai noa nakei kalabus ya nana salim yaꞌa nanoi iya Cha Sisar.”
22 Ya kopei King Agripa kairai roa Cha Festus veka,
“Nena veku kanake awirai ya bia ero nanarivo revo.”
Ya Cha Festus kairaiki roa veka,
“Uri keta namarivo moa.”
King Agripa kot-a karivo roa Cha Pol
23 Kopei uri vou,
King Agripa eri rou yaꞌa Kwa Bernaisi noreka ine neman-a kerai pikokope ya keraikape kerai nopi oꞌro aꞌari bo vou yiopokekeo ero.
Kerai nopi poiy opisa enopi cha awei aro beiy yei mataimon ve.
Ya Cha Festus awirai kupuana kairai roiy ya keko yaꞌa Cha Pol kakai aꞌari.
24 Ya kopei Cha Festus kavariko ya kairai veka,
“King Agripa awei aro mowmow kekepi pimi evo,
bia emo nopu pirikeiya,
aro bombiam mowmow yei Juda kekepi mataimon pako Jerusalem ta boko ve minyiao,
kevitikeiya.
Kyepi pako ke nainyeiya narai.
25 Ao taipo raꞌa via anapirikeo arao ke kuinyia iu nainyeiya narai vai.
Ta yaꞌa veku kairai keta nanoi iya Cha Sisar ya kot-a neiyarivo.
Korao veka ta,
kanake nanin nanoi iya Cha Sisar kakei Rom.
26 Ta nena via ao va raꞌa ana yarau ke naneo noa bia beiy memi Cha Sisar vai.
Korao veka ta kana rainyaka kakai ima King Agripa awei aro mowmow minyiao,
ke kuinyia iu awirai yaꞌa nana yarau ya kopei pas-a naneo.
27 Ta nena kana yarau veka via oneman ke bia kalabus raꞌa nana salim yaꞌa nanoi kanapon vai.
Keta awirai ovu naneo ke noriritao ku vou kot-a epiapao ero.”