Awirai neman Cha Luk kareꞌe kuinyia iu noelpim memi nemipirike veka, Yesus yaꞌa bia ya nako yei varu Israel ta yei aro bombiam ovu minyiao. Taim Yesus-a boꞌo yaꞌa kastat karao, kairai roiy aro bombiam veka, Holi Spirit-a karao ke awirai neman ya God-a nairirai nonoi roiy aro taipetaipe awei aro mirarai (nemipirike 4.18). Awakai, buk ya Cha Luk awirai mowmow kuirai rova Yesus kaokoku roiy aro bombiam nai mara eko ero ta kalpim yei.

Ao voro Yesus-a kararerare, korao aro yaꞌa ova koroꞌoi rova. Taim Kwa Maria koaivia, aro bombiam-a ova koroꞌoi (nemipirike 1.42-48; 2.10), ya kopei tapo vou buk em, taim Yesus-a kakoi heven ova koroꞌoi revo (nemipirike 24.52).

Ao mowmow vou laip ya Yesus, Cha Luk unake po kairirai row. Awirai vou ao en via uinyia buk ovu vai. Cha Luk po ao mowmow ere kamap taim Yesus-a kakai meꞌri ve kairirai. Kairirai rova Yesus-a aꞌai-ya karariroa Samaria raꞌa kalpim yaꞌa bio raꞌa aro taipo kepyeiya kainyia rara. Aꞌai-ya raꞌa vova karari roa ma karereiya aka. Kanoi boko korarapaki ya ketao koka kataratarao nau. Ta Yesus-a aꞌai ovu karari vova minyiao. Cha Luk kairirai rova Cha Sakias bia takis-a ako ero.

Ao ovu Cha Luk kairirai rore, pasin vou beten, boꞌo ya Holi Spirit, nau pasin voro God-a karao ke sin yei aro bombiam-a napereo. Cha Luk awirai mowmow kuinyia iya row ao voro aro bom-a ererao ero.

Awirai ya Cha Luk baunke kuinyia buk raꞌa vova. Ku vou korao veka, awirai-ya kareꞌe kuinyia buk voro keipinao Aposel. Buk ve kuirai roiy aposel ao eparepare taim Yesus-a karerei ya kakoi heven.