Awirai neman
Cha Luk
Kareꞌe
Cha Luk awirai ve kare roa Cha Tiofilus
1
Bia beiy Cha Tiofilus,a
tora va beiyo prumo awirai-ya ketraim kepepe pore ao prumo God-a karao romomi.
2 Pa va kepikeo awirai yei beiyo ao en kepirike revo ine yei,
kokai revo ku vou ao en okai en.
Beiyo ve kekepi veka aro boꞌo epao pow awirai ve,
ta awirai ve kyirai pomi.
3 Ta nena minyiao,
kanake awirai ve naneꞌe nokai roma Ma Tiofilus.
Boꞌo va kanao ato,
aotere kanao revo ku vou ao en.
Mare ya kaneꞌe revo veka ao en erekare.
4 Namayarau veka,
awirai voro kepiritama ero,
ero awakai.
Ensel-a kairai roa Cha Sekaraia veka Cha Jon keta nakamap
5 Taim Cha Herot b kakei king yei Judia,
pris raꞌa kakei awoꞌo yaꞌa Cha Sekaraia.
Yaꞌa pris yei aro Abiya.c
Om yaꞌa,
vou aro ya Cha Aron,d
awoꞌo vou Kwa Elisabet.
6 Keraikepi keraininiu iu ine ya God.
Ta pa va keraipikeo lo mowmow nau awirai ya Biapako,
ta ao taipo va via eraipao otaipo iu ine ya God.
7 Ta meꞌe va kowaun rei,
ku vou korao veka,
Kwa Elisabet via kuinyia iu ke meꞌe va noavei.
Keraipaovo ven.
8 Roraꞌa aro ya Cha Sekaraia kenopi boꞌo pris-a kepao,e
ta Cha Sekaraia yaꞌa minyiao boꞌo pris-a karao iu ine ya God.
9 Ya kopei pilai satu kepao ke nyiorenao pris bekaipe po nanoi tempel aꞌari ya Biapako,
ke paura eva uya momo naki.
Pasin ve kepao ya kemompe yaꞌa Cha Sekaraia kanoi aꞌari ke paura va naki.
10 Taim paura va kaki,
yei aro bombiam mowmow va kekepi minyiao upuo inyia beten-a kepao.
11 Ya kopei ensel moike ya Biapako va kakamap iya Cha Sekaraia,
ya karoi iya eno awakai iu alta vou paura eva uya momo.
12 Ya kopei Cha Sekaraia kapirikeiya ensel,
ova keiyairuko ta kaririko toro.
13 Kopei ensel-a kairai roa veka,
“Ma Sekaraia,
via namariri,
God-a beten mema karivo ven.
Om mema Kwa Elisabet keta ma biam-a noaivia,
awoꞌo yaꞌa ta naminaka veka Cha Jon.
14 Riꞌi mema keta noneman ya ova noroma revo.
Aro bombiam mowmow keta ova noroꞌoi rova ma biam evo taim nakamap.
15 Bia emo keta awoꞌo pako va nako iu ine ya Biapako.
Via kuinyia iu pii kupuana va nau wain-a naton vai.
Taim baunke karukei rimoꞌo vou moꞌo yaꞌa,
keta rovanare row Holi Spirit.
16 Bia emo keta narao aro bombiam mowmow yei Israel-a nerovoru nekape piya Biapako,
God yei.
17 Keta pasin nau kupuana ya Cha Elaija tija ako ero,
keta nako naute nanoi roa Biapako va cha.
Keta narao aka awei meꞌe nekepi riꞌi moikera.
Keta ruru nareirovoru aro voro rova epiakokao ero.
Ya ruru awakai-ya neko veka aro ekepi eniniu iu ine ya God.
Keta narao beiyo nekepi ova nekinakinao pova Biapako nararo.”
18 Kopei Cha Sekaraia katere roa ensel-a veka,
“To korao vekaipe ke nanayarau veka awirai mema awakai-ya noraonao?
Kanavone ven.
Om nena minyiao koraovore ven.”
19 Ya kopei ensel-a kairaiki veka,
“Nena Cha Gebriel,
inyia karoni iu ine ya God.
God-a veku kairai rona ta kakane nanairai noma,
ta awirai neman ve kanako kanaronoma.
20 Namarivo!
Awirai ve nena via amabilip,
ta mare roꞌo va noremakumo.
Via kuinyia iu awirai-ya namairai vai,
nonoi nuinyia iu taim vou ao en nokai.
Awirai nena keta akai-ya noraonao veka taim voro God-a kamompe ero.”
21 Aro bombiam-a kekepikeiya Cha Sekaraia,
inyia ova kekinakinao pako arape orao roa ta ataraiki tempel aꞌari ya God.
22 Ya kopei taim kakai upuo,
awirai va via kuinyia iu nairai.
Ya keyarau veka Biapako ao ine mara va kariritaka tempel aꞌari,
ao en korao veka kayiyo.
Ya roꞌo va kereakumo ta awirai-ya kairai roiy po eno.
23 Ya taim Cha Sekaraia boꞌo pris yaꞌa karao ven,
ya kopei kanoi varu oꞌro yaꞌa.
24 Ya kopei om ya Cha Sekaraia Kwa Elisabet,
ro va koꞌma ya kokei po oꞌro konoi kuinyia iu veka ura 5-pla,
ya kuirai veka,
25 “Biapako kamarimari roni ta ao en karao roni ke via reka noyonif iu ine yei aro bombiam.”
Ensel-a kairai row Kwa Maria keta Yesus-a noaivia
26 Ura 6-pla vou Kwa Elisabet ma va baunke kakei row,
God-a kairai roa ensel Gebriel kanoi mataimon raꞌa vou distrik Galili awoꞌo vou Nasaret.
The birth of Jesus foretold (Luk 1:26-38)
27 Kanoi iu bia bom raꞌa via uinyia iya bia biam raꞌa vai.
Bia bom ve kemompe poa bia raꞌa yei aro ya King Devit ke noko yaꞌa.
Awoꞌo yaꞌa Cha Yosep.
Kopei awoꞌo vou bia bom ve,
Kwa Maria.
28 Ya ensel Gebriel-a kararo iu oꞌro aꞌari ya kairai row veka,
“Umonai namu revo bia bom.
Biapako kakei imu ta blesin-a karomu ya karao romu revo.”
29 Kwa Maria awirai ve korivo koririko toro ya veku ova kokinakinao veka,
“Awirai evo awirai bekaipe?”
30 Kopei ensel-a kairai row veka,
“Om Maria,
via nonriri.
God-a ova korova romu.
31 Nonrivo,
keta rimoꞌo va nomoma ya ma biam-a raꞌa nomaivia.
Awoꞌo yaꞌa keta noiminaka Yesus.
32 Keta nakei veka biapako ya neipinaka Ma Biam ya God Bia Nake.
God-a keta naraonaka nakei veka king,
raiyau ya Cha Devit.
33 Keta nakei toratora veka king yei aro ya Cha Jekop.
Kingdom yaꞌa viake nowaunki.”
34 Kopei Kwa Maria kotere roa ensel-a veka,
“Ao en ta nokai ini noraka ro?
Am-a via engo vai.”
35 Ya kopei ensel-a kairaiki row veka,
“Holi Spirit,
ta nararo imu ya kupuana ya God Bia Nake ta naririmu.
Kopei ma evo nomaivia,
keta nakei naholi ya neipinaka Ma Biam ya God.
36 Nonrivo.
Naꞌai momu Kwa Elisabet koraovore ven ta rimoꞌo va koꞌma,
keta ma biam-a raꞌa noaivia.
Tija kyirai veka via kuinyia iu ma va noaivia.
Ta mare rimoꞌo koꞌma ya ura 6-pla vou konoi nau ven.
37 God-a kuinyia iu ao prumo nararerare via kuinyia iu ao va raꞌa noapatanaka vai.”
38 Kopei Kwa Maria kuirai veka,
“Namarivo.
Neni bia boꞌo enao noa Biapako,
kuinyia iu ao en narao roni veka kamairai.”
Ya kopei ensel-a karereo ya kakoi varu.
Kwa Maria konoi kopirikeo Kwa Elisabet
39 Taim ve Kwa Maria kovariko kobereren konoi mataimon raꞌa vou distrik Judia kuinyia tao tou mememe.
40 Konoi oꞌro aꞌari ya Cha Sekaraia ya umonai neman-a korao row Kwa Elisabet.
41 Kopei Kwa Elisabet umonai neman-a korivo row Kwa Maria ya ma akei row riꞌi kaupukore.
Ya Kwa Elisabet rovakore row Holi Spirit.
42 Ya kwei pako kuirai,
“God-a blesin-a karomu kotawore aro bom ovu.
Ma voro arumkei riꞌi,
yaꞌa minyiao blesin ya God-a kako.
43 Neni bia nape ta moꞌo ya Biapako neni kokai ini?
44 Nonrivo.
Taim teve neni umonai momu kenrivo,
ma ve arinkei riꞌi,
oꞌto kocha ya kaupukore.
45 Momu komubilip veka Biapako karake narao veka kairai romu ero,
ta kuinyia iu ova noromu revo.”
Monrai vou Kwa Maria
46 Ya kopei Kwa Maria kuirai veka:
“Riꞌi neni awoꞌo ya Biapako koavoko nake.
47 Ya spirit neni ova korow rova God,
Bia yaꞌa nako neni varu.
48 Kapirikeni neni bia kanapon,
neni bia boꞌo enao noa.
Kopei mare to kokai paire,
keta aro bombiam-a nyirirai God-a blesin-a karoni.
49 God-a kupuana kuinyia iya,
ta ao pako awakai-ya karao roni
ta awoꞌo yaꞌa koholi.
50 Inyia kamarimari roiy aro bombiam awirai-ya erivo poa ta pa va epikeiya.
Ao en ta narao roiy aro bombiam mare awei aro apoti ekape paire.
51 Eno yaꞌa boꞌo kupuana va korarerare.
Aro voro kepitoro yei veku keneman revo ta awoꞌo yei kyiavoko,
karirikei kenopi tin.
52 King kuprapana kaveiyo pika ya sia king yei kepepere,
ya kopei aro awoꞌo owaun rei kaveiko.
53 Ao prumo neman-a inyia kariy aro oraiyoe ya ro va koꞌmoi.
Kopei aro ao prumo uinyia iꞌiy ero,
karirikei kenopi kanapon.
54-55 Kalpim yei wokboi yaꞌa Israel,
ta baunke ova kakinao row promis yaꞌa arao roa Cha Abraham awei aro raiyau memi,
ke toratora inyia namarimari roiy aro ekape pa ere.”g
56 Kwa Maria kokei iu Kwa Elisabet konoi kuinyia iu veka ura riepin raꞌa moike,
ya kopei konoi varu oꞌro vou.
Kwa Elisabet Cha Jon koaivia
57 Taim vou Kwa Elisabet korereka iu korake ma va noaivia ya ma biam-a koaivia.
58 Aro boko vou awei aro noꞌo vou Kwa Elisabet kerivo veka Biapako kamarimari row,
ta ova koroꞌoi iu minyiao.
59 Ya kekepi konoi umo 8-pla ya ma Kwa Elisabet oaivia ero,
ya aro bombiam-a kekape ke tao va nepeiyauro.
Ta kepake awoꞌo Sekaraia neupoa,
veka awoꞌo ya aka.
60 Kopei moꞌo ya ma ve kuirai veka,
“Boun.
Keta awoꞌo neiminaka Cha Jon.”
61 Kopei kyirai pow veka,
“Bio raꞌa mopu awoꞌo veka via ako.”h
62 Ya eno po kepao poa aka awoꞌo bekaipe karake naoroa ma.
63 Cha Sekaraia roꞌo va baunke kereakumo,
ta eno po karao roiy ke aꞌai to peri koraꞌa nekokape poa.
Ya awirai-ya kareꞌe tao veka,
“Awoꞌo ya Cha Jon.”
Ao en kepirikeo ya keririko toro.
64 Bererenki po Cha Sekaraia rovakeiya rara ya awirai-ya kairai varu.
Ya a va kairai awoꞌo ya God-a kavoko.
65 Ya aro mowmow oꞌro ya Cha Sekaraia ao ine mara va kepirikeo kokamap ta keriri.
Ya awirai vou ao en konoi rorore boko mowmow erinyia tao tou mememe vou Judia.
66 Beiyo mowmow awirai ve kerivo,
inyia ova kekinakinao pako ya aotere kepao veka,
“Kopei ma evo napako keta narao vekaipe” Keyarau veka,
kupuana ya Biapako kuinyia iya.
Cha Sekaraia awirai profet-a kairai
67 Ya kopei Cha Sekaraia,
aka ya ma ve rovakare row Holi Spirit ya awirai profet-a kairai veka,
68 “Awoꞌo ya Biapako nemavoko,
God yei Israel.
Ku vou korao veka,
kakai ta kalpim memi aro bombiam yaꞌa ta kako memi varu.
69 Ta aro ya Cha Devit bia boꞌo arao roa God,
Biapako bia kupuana raꞌa yei karaonaka ke nako memi varu,
70 veka tija kairai ven row roꞌo yei holi profet yaꞌa.
71 Kairai keta nako memi varu iu eno yei aro ine epemi torotororu awei
aro voro kyioniy pemi revo ero.
72 Kamarimari roiy aro apo memi,
ta baunke ova kakinao row holi kontrak tija yaꞌa veku karao ero.
73 God-a promis-a karao iya raiyau memi Cha Abraham.
Ta mare karake narao romi veka tija kairai ero.
74 Karake nako memi varu iꞌiy eno yei aro ine epemi torotoropu,
ya kuinyia iu boꞌo yaꞌa nemao ya via nemiriri.
75 Korao veka ta umumo baunke nekemi tare,
keta nemute mow rara vou pasin holi nau pasin niniu iu ine ya God.
76 Ta mema,
ma nena,
kokai pa ere keta neipinama profet ya God Bia Nake.
Keta nanomi moa Biapako va cha rara va nemiamere.
77-78 Keta namiritai aro bombiam yaꞌa,
ke neyarau marimari pako ya God.
Karake sin yei napereoki ya nako yei varu.
Ya bo uri vou heven-a narao noraro imi,
79 ke bo nuri roiy beiyo ekepi bo rorokeu
ta keriri revo ke neviri,
ya kopei nariritami rara vou riꞌi mariri.”
80 Kopei ma ve napako ya spirit ya nokupuana,
keta nanoi nakei bo ramata kanapon beiyo ewaun nonoi nuinyia iu taim nakai vatiron iꞌiy ine yei Israel.