23
Ya kopei Cha Pol kaoreki katrorukei kansol,
ta kairai veka,
“Aro raꞌai,
nena kanautute iu ine ya God,
ta riꞌi moꞌo nena koneman rore pasin voro inyia kanao ero,
kokai kuinyia iu revo mare.
Kana pirikeo veka via ao va raꞌa anao otaipo vai.”
2 Awirai ve kairai ta hetpris Cha Ananaias awirai kupuana kairai roiy beiyo eropi piya kakuke iya Cha Pol roꞌo va kepiakuku.
3 Kopei Cha Pol kairai roa veka,
“God-a keta nayema,
ku vou korao veka,
kamaka reiy raꞌa,
maka wuto keperete,
ke beiyo via kuinyia iu ao taipo uinyia kuro neyarau vai.
Mema kamitoro veka pa va kamikeo lo ta kakame kakemi ke kot-a nemenamao.
Ta mema veku,
lo va via pa va amikeo vai,
ta kamairai moiy kepyena.”
4 Beiyo ve keropi piya Cha Pol kakuke emo awirai-ya kerivo ya ketere poa veka,
“To korao vekaipe,
era mema kamake poko taipo namairai moa hetpris ya God vai?”
5 Kopei Cha Pol kairai veka,
“Aro raꞌai,
via ana save veka bia emo yaꞌa hetpris vai.
Pasin taipo kanao,
ku vou korao veka,
buk ya God-a kuirai veka,
‘Via poko taipo raꞌa va nopirai poa hetman mopu vai.’ ”a
6 Cha Pol kayarau veka ovu yei kansol evo,
yei Sadyusi ta ovu yei Farisi.
Korao veka ta kaiy roiy kansol kairai veka,
“Aro raꞌai,
nena Farisi,
ta nena ma yei Farisi.
Kana bilip veka,
beiyo eviri ven keta nevereko varu.
Ero ku vou,
tapara mare kot-a kepenapao em.”
7 Cha Pol awirai ve kairaiki romoiy aro Sadyusi awei Farisi,
ya ketovetove varuvaru ya aro ve kot-a erivo ero,
kyiawetari koraꞌa riepin.
8 Aro Sadyusi,
kyirai veka aro eviri ven ero via kuinyia iu nevereko varu matmat vai,
ta yei ensel awei spirit via ekepi vai.
Ta yei Farisi,
kebilip pore ao en.
9 Awirai ve kyirai ta poko va kyiaraipari pakoki vova ke.
Kopei saveman ovu vou lo yei Farisi,
kevereko ya kyirai pako veka,
“Bia emo via emi pirikeiya rong-a arao vai.
Awenari awakai-ya kairai,
spirit raꞌa o ensel raꞌa a va kairai roa ke.”
10 Kopei opisa anoi roiy soldia cha kapirikei veka ketovetove konoi kopako,
ta kariri.
Awenari inyia neraipaka Cha Pol ke reka ya noawetari ya narai.
Korao veka ta kairai roiy soldia keta neparo ya Cha Pol neko yaꞌa pei aro Juda,
ya neko yaꞌa nenopi bo yei ekepi ero.
11 Ya kopei roro,
Biapako kararo karoi iya Cha Pol kakuke ya kairai roa veka,
“Mema keta naromi kupuana,
via nama riri vai.
Mema bo pako kamao,
awirai nena kamairirai Jerusalem,
ta nanomi awirai nena namairirai moiy minyiao mataimon Rom.”
Aro Juda awirai-ya kyirai minyiao keta Cha Pol nepyeiya narai
12 Kopei roronai,
Juda ovu awirai-ya kyirai minyiao ke nepyeiya Cha Pol narai.
Ya promis kupuana kepao veka,
via kuinyia iu aokorom-a nepa ya pii va neton vai,
nonoi nuinyia iu revo taim Cha Pol nepyeiya narai vo.
13 Namba yei aro promis-a kepao ke nepyeiya Cha Pol narai ero,
kotawoki 40.
14 Aro ve kenopi piy aro hetman awei bikpris ya kyirai poiy veka,
“Memi promis kupuana va kemao veka,
via aokorom-a raꞌa va nema vai,
nonoi nuinyia iu revo taim Cha Pol nemyeiya narai.
15 Korao veka ta,
mopu bikpris awepu kansol keta awirai-ya kononopi nopirai poa opisa anoi cha,
ke Cha Pol nako yaꞌa nararo ipu.
Kuinyia iu nopu ropopeiya nopirai veka,
‘Kemake aotere nemao moa ke ku vou awirai yaꞌa nemorenao revo.
Ya taim baunke via nakai nakamap ipu,
keta nemyeiya narai.’ ”
16 Kopei ma biam vou rou ya Cha Pol awirai ve karivo.
Ya kanoi iu bo voro soldia ekepi ero ya kanoi aꞌari kairai roa Cha Pol.
17 Ya kopei Cha Pol kairia kepten raꞌa kakai kairai roa veka,
“Bia yangpla em nopuko yaꞌa nanoi iya opisa anoi cha,
awirai raꞌa kuinyia iya ke nairai roa.”
18 Ya kepten-a kako yaꞌa kanoi iya opisa anoi cha ya kairai roa veka,
“Bia kalabus awoꞌo ya Cha Pol kairina kanoni niya,
ya kairai rona bia yanpla emo nanako yaꞌa nakai ima.
Awirai raꞌa kuinyia iya karake nairai roma.”
19 Korao veka ta,
namba wan opisa eno va keriavo ya kerainopi kerairopi ikaki.
Ya katere roa bia yangpla veka,
“To awirai arape kamake namairai mona?”
20 Kopei bia yangpla kairai veka,
“Yei Juda awirai-ya kyirai minyiao veka,
uri keta netere poma Cha Pol nama rainyaka nararo iꞌiy kansol.
Keta neropopema veka kepake nyiorenao revo ku vou awirai yaꞌa.
21 Ta mema viake awirai yei namarivo moiy vai.
Ovu yei namba yei kotawo 40,
promis kupuana va kepao via kuinyia iu aokorom-a nepa ta pii va neton vai,
nonoi nuinyia iu revo taim nepyeiya Cha Pol narai vo.
Mare kekepikema po,
bo awirai-ya namarivo moiy.”
22 Ya kopei namba wan opisa kairai roa bia yangpla kanoi varu ya awirai kupuana kairai roa veka,
“Via namairai moa bia raꞌa veka kakame ina ta awirai em kamairai mona.”
Kerainyaka Cha Pol kanoi iya namba wan gavana Cha Feliks
23 Kopei opisa anoi cha kairiy kepten riepin yei soldia kekape ya kairai roiy veka,
“Mopu keta 200 soldia norupuko yei awei 70 soldia ekepi taw hos,
ta yei 200 soldia eura yiavo ero,
nopuko yei minyiao.
Ya kopei 9 kilok roro keta nonopi Sisaria.
24 Hos ya Cha Pol minyiao keta nepia redim,
ya noporepariya nanoi iya revo gavana Feliks.”
25 Ya kopei opisa anoi cha,
pas-a raꞌa kareꞌe veka,
26 “Umonai neman.
Nena Cha Klodius Lisias,
pas ve kaneꞌe noa biapako,
namba wan gavana Cha Feliks.
27 Bia ve Juda kyiaivia ta kepake nepyeiya narai.
Ta kanarivo veka bia emo yaꞌa kantri Rom,
ta soldia nena awei kenomi kemiko yaꞌa varu iꞌiy eno yei Juda.
28 Kanake ku vou awirai ve evitikeiya bia emo nana yarau vo,
ya kopei nana rainyaka nararo iꞌiy kansol yei.
29 Kanatere noiy ya awirai ovu kyirai pona row lo yei,
ya to ve kevitikeiya.
Ta nena kana pirikeo veka via kot-a epiapao pow ao raꞌa vai,
ke kuinyia iu nemyeiya narai o nemeria roki kalabus.
30 Kopei mare kanarivo awirai raꞌa kyirai rokipe veka bia emo keta nepyeiya narai.
Ta ve kana bereren kaneriaka kakai ima evo.
Ya awirai kupuana kanairai noiy aro ve kevitikeiya emo,
keta nenopi awirai-ya nyirai poma revo ine mema,
ke kuinyia iu nama yarau revo arape kot-a kepiapao pow.”
31 Ya kopei soldia kepao veka opisa anoi cha kairai ero,
ya roro keko yaꞌa Cha Pol kenopi keperiaki mataimon Antipatris.
32 Kopei uri roronai,
yei soldia inyia kekepi taw hos ero,
keko yaꞌa Cha Pol kenopi keperiaki mataimon Sisaria.
Ya soldia ovu kenopi varu bo yei ekepi Jerusalem ero.
33 Ya soldia ve kekepi tatare hos ero,
taim kerepiki Sisaria,
ya pas-a keupoa namba wan gavana,
Cha Feliks.
Ya Cha Pol minyiao keko yaꞌa kakai karoi iu ine yaꞌa.
34 Ya kopei namba wan gavana pas-a kapirikeo ya katere roa Cha Pol veka,
“To kakame provins bekaipe?”
Ya kopei Cha Pol kaorova veka,
“Nena kakane provins Silisia”
35 Kopei namba wan gavana kairai roa veka,
“Taim beiyo voro awirai-ya kevitikem ero,
nekape ve,
keta kot mema nanarivo.”
Ya awirai kupuana kairai roiy soldia nenopi Cha Pol neperia roki oꞌro gavman tija Cha Herot karao ero.