2 Ya katere roiy veka,

“Taim kopubilip,

Holi Spirit-a kopuko o bauni?”

Ya kyiraikipe poa veka,

“Baun ben!

Holi Spirit-a via emi yarau vai.”

3 Ya kopei Cha Pol katere roiy vova veka,

“Baptais bekaipe kopuko?”

Ya kyiraikipe poa veka,

“Memi baptais ya Cha Jon kemiko.”

4 Ya kopei Cha Pol kairai roiy veka,

“Tija Cha Jon kabaptaisim yei aro bombiam ya kairai,

riꞌi va nopu rovoru ya baptais-a nopuko.

Ya kairai roiy nebilip pova bia ero keta nakai vova pa ero,

yaꞌa Yesus.”

5 Taim awirai ve kerivo ya baptais-a keko pow awoꞌo ya Biapako Yesus.

6 Kopei taim Cha Pol eno va kareretai,

ya Holi Spirit-a kararo iꞌiy ya poko maramara kyirirai,

ya awirai-ya kyirirai veka God-a veku karoiy ero.

7 Ya kopei namba yei beiyo ve kuinyia iu veka 12-pla.

8 Kopei Cha Pol kanoi oꞌro lotu yei Juda awirai kupuana va kairirai row kingdom ya God,

konoi kuinyia iu veka ura 3-pla.

Ta awirai ve korao ruru kokokonai.

9 Ta ovu yei riꞌi va kerei kupuana ta via ebilip.

Kopei ine yei aro bombiam,

poko taipo va kyirai pow Rara ya Biapako.

Korao veka ta Cha Pol awei aro ebilip pova Yesus via enopi vova oꞌro lotu yei Juda.

Ya kopei umumoka,

Cha Pol inyia kanoi aꞌari awirai-ya kairirai oꞌro skul ya Cha Tiranus.

10 Karao po veka konoi kuinyia iu ainini riepin.

Korao veka ta,

Juda mowmow awei Grik inyia ekepi boko mowmow vou provins Esia awirai ya Biapako kerivo.

11 God-a karao Cha Pol mirakol ipipo maramara aro bombiam via epirikere tija kararerare.

12 Korao veka ta aro bombiam taul-a nau no to kora Cha Pol awetatao ero,

keko kenopi keperetai aro a va oraie ero,

ya keneman varu.

Ya spirit taipo kepepei minyiao.

13-14 Kopei bikpris^a raꞌa yei Juda awoꞌo yaꞌa Cha Skeva awei meꞌe biam 7-pla yaꞌa.

Meꞌe biam ve ta inyia kenopi popore boko mowmow ya spirit taipetaipe keririkei rei beiyo.

Kopei taim bo ve kepao,

kyirai poiy spirit taipo va veka,

“Awoꞌo ya Yesus,

bia ero Cha Pol inyia awirai-ya kairirai rova ero,

kemi ririkepu.”

15 Kopei umo raꞌa,

spirit taipo raꞌa a va kairaikire roiy veka,

“Yesus voro kana yaraka ven ta Cha Pol minyiao kana yaraka.

To mopu aro bekaipe?”

16 Kopei bia ero spirit taipo akei iya ero,

kaupukore tai ya kayei ta reka yei noꞌo va kekapekape.

No va karororu rei ya parara kenopi arikororo upuo.

17 Kopei taim Juda awei Grik mowmow ekepi Efesus awirai vou ao en kerivo,

keriri toro.

Ya awoꞌo ya Biapako Yesus-a kyiavoko.

18 Aro bombiam mowmow ebilip ven ero kekape revo koroumo ya pasin taipetaipe yei epao tija ero kyirirai nau.

19 Kopei aro bombiam mowmow inyia awoi-ya nau marela epao ero,

buk-a nau ao ovu kepuna kekape kyiopokeo minyiao ya kekipari aiyerao iꞌiy ine yei aro bombiam mowmow evo.

Kopei aro bombiam mowmow kekepi taim ve,

kepirikei ao mowmow kekipari aiyerao.

Ya ketao vou buk-a nau ao mowmow kekauntem konoi kuinyia iu veka 50,000 silva ketao.

20 Ya pasin ve awirai ya Biapako kokupuana revo ya koawetari konoi rorore boko mowmow.

21 Ya ao mowmow ve konoi ven,

ya Holi Spirit-a karaonaka Cha Pol kairai nanoi mataimon pako Jerusalem.

Ya Cha Pol kanoi provins Masedonia ya kopei kanoi provins Akaia ke nanoi nareiki Jerusalem.

Ya kopei kairai roiy veka,

“Taim nanoni nakeni Jerusalem,

keta nanoni minyiao mataimon pako Rom.”

22 Ya kopei kasalim yei bia riepin inyia helpim yaꞌa ero,

kerai nopi provins Masedonia.

Bia riepin ve awoꞌo yei Cha Timoti eri Cha Erastus.

Kopei yaꞌa veku kakeiki mentan mentan provins Esia.

23 Kopei taim ve,

ao taipo akai-ya kere kamap mataimon Efesus.

Aro voro Rara ya Biapako via eperepow ero,

nai-ya kepao kopakoki vova ke.

24 Beiyo raꞌa kakei,

awoꞌo yaꞌa Cha Demitrius,

bia emo silva inyia kako ya ao maramara kararerare.

Bo bisinis yaꞌa ta piksa mememe vou oꞌro lotu vou god bom Kwa Artemis kararerare.

Bo pako karoiy aro inyia ao va keparepare pow silva ero,

ta ketao pako keko.

25 Kopei Cha Demitrius kairiy aro inyia bo epao ero kekape kyiopokeo awei aro ovu inyia ao mara epao ero,

ya kairai roiy veka,

“Aro raꞌai,

mopu kopu yarau ven veka bo ve inyia emao ero,

inyia ketao pako kemiko mow.

26 Ta mopu kopurivo ta kopu pirikeo ven veka,

Cha Pol karaipai aro bombiam mowmow vou mataimon Efesus ta ruru karei rovoru.

Ya kairai roiy veka god voro beiyo eparepare eno yei ero,

via god awakai vai.

Kopei ao ve inyia kararao koraipai ta ruru karei rovoru ero,

inyia konoi ya korake noririre boko mowmow vou provins Esia.

27 Awirai ya Cha Pol kuinyia iu norao awoꞌo vou bo bisinis memi notaipo.

Ta ao raꞌa minyiao,

awirai yaꞌa ero kuinyia iu norao tempel vou god bom pako Artemis norao veka ao kanapon iꞌiy ruru yei aro bombiam.

Tija akai kokai kuinyia iu mare voꞌo,

aro bombiam mowmow vou provins Esia ta boko mowmow vou meꞌri ve inyia lotu kepao po god bom ve.

Ta awirai ya Cha Pol,

awoꞌo pako vou god bom ve kobagarapim.”

28 Taim awirai ve kerivo,

ova koreiroro revo.

Ya kyepi pako veka,

“Kwa Artemis vou god memi Efesus koneman revo.”

29 Korao veka ta aro mowmow vou mataimon ve kyepepi ta riri va keko.

Ya praprara kenopi bo voro kyiopokeo ero ya kyiaivia chaororova Cha Gaius eri Cha Aristarkus.

Cha Aristarkus eri Cha Gaius ero,

yei aro provins Masedonia inyia kerai ute popova Cha Pol.

30 Cha Pol karake nanoi napirikei aro bombiam koka evo,

ta yei Kristen-a kepaopariya.

31 Kopei kura ovu ya Cha Pol kekepi veka opisa vou provins Esia,

awirai kupuana va kesalim konoi roa kepaopariya via nanoi bo voro yiopokekeo ero.

32 Aro bombiam koka kekape kekepi bo kuriri evo ruru kerei paul.

Korao veka ta ovu kyepi pow ao raꞌa,

ta yei ovu kyepi pow ao raꞌa.

Ta ku vou kekape kyiopokeke emo via eyarau revo vai.

33 Ya Juda keturaka Cha Aleksander kakai karoi cha iꞌiy ine yei aro bombiam.

Ya beiyo ovu kepirikeiya ta kepitoro veka yaꞌa ku vou nai em.

Ya Kopei Cha Aleksander eno va karao roiy ke rova nyeto ya a va nairai roiy.

34 Ya kopei taim keyarau veka yaꞌa Juda,

ya aro bombiam mowmow va kyepi pako ya kyirai minyiao veka,

“Kwa Artemis god memi Efesus koneman revo.”

Ya inyia kyepepi po veka konoi kuinyia iu aua riepin.

35 Ya kopei kuskus vou mataimon ve karao aro bombiam prumo ekepi evo,

roꞌo va kyetoko ya kairai roiy veka,

“Mopu aro mataimon Efesus keta awirai ve nopurivo revo.

Aro boko mowmow keyarau ven veka,

memi aro emoremariu revo tempel vou god bom Artemis.

Ya inyia kemoremariu revo topa inyia lotu epao pow ero ta korei koraro uteno.

36 Awirai em awakai,

bia raꞌa via namairai veka kana roponepu.

Korao veka ta roꞌo va nopeto ya via nopu bikhet.

37 Mopu bia riepin ve kopavei kekape ero,

via ao aokakana raꞌa va eraipao tempel ta poko taipo raꞌa kerai yirai pow god bom Artemis vai.

38 Bo Cha Demitrius awei aro yaꞌa kepake kot-a nepiapao bia raꞌa,

taim vou kot,

jas-a keta kot-a narivo.

Awirai bekaipe nuinyia iꞌiy kuinyia iu nyirirai.

39 Bo awirai ovu vova nuinyia ipu,

keta nopirai revo bo vou kot.

40 Korao veka ta kemiriri moiy opisa yei gavman keta kot-a nepeipao pow awarape emao em.

Konimi via nai vou ao en nemiko vai.

Korao veka ta ao en emao ero ku vou kowaun.”

41 Taim kuskus-a awirai ve kairai ven,

ya kasalim yei aro bombiam koka kenopi tintin.