Cha Pol karereo mataimon Atens ya kanoi mataimon Korin
18
Ya kopei Cha Pol karereo mataimon Atens ya kanoi mataimon Korin.
2 Kopei boko ve,
kavakakeiya Juda raꞌa awoꞌo yaꞌa Cha Akwila.
Bia emo Cha Akwila,
yaꞌa provins Pontus.
Umo ovu kerenori ven,
yaꞌa eri om ya Kwa Prisila kerai kepi kantri Itali ya keraipepeo keraikape kerai kepi mataimon Korin.
Ero korao veka,
Cha Sisar Klodius awirai kupuana kairai roiy Juda mowmow nepepeo mataimon pako Rom ya nenopi boko raꞌa.
Ya kopei Cha Pol kanoi kapirikei.
3 Bia ve Cha Akwila eri om ya Kwa Prisila,
oꞌro sel-a keraipao revo veka Cha Pol inyia arao ero.
Korao veka ta Cha Pol kakei iꞌiy ya bo va karao iꞌiy minyiao.
4 Kopei de mowmow vou Sabat,
Cha Pol inyia kanoi oꞌro lotu yei Juda a va kairai iꞌiy.
Cha Pol karake narao riꞌi va nokokonai Juda awei Grik,
ke nebilip pova Yesus.
5 Kopei Cha Sailas eri Cha Timoti keraipepeo provins Masedonia ya keraikape nerai pirikeiya Cha Pol.
Kopei taim ve,
Cha Pol karoi row bo moikera emo po ta awirai-ya kairai roiy Juda veka Yesus ya Krais.
6 Ta yei Juda emo awirai ya Cha Pol kyioniy ta keteriaka.
Korao veka ta Cha Pol aomo erinyia noreka yaꞌa kairereki nare.
Ao en karao ke noriritao pasin yei epao ero,
God-a via arererow vai.
Ta kairai roiy veka,
“Bo ao taipo norereka ipu paire,
nai voro ero mopu veku via nena vai.
Mare keta nanenepu ya nanoni niy aro via yiave Juda.”
7 Ya kopei Cha Pol oꞌro lotu yei Juda karereo ya kanoi kakei iya Cha Titius Jastus.
Oꞌro ya bia emo kuinyia kakuke iu oꞌro lotu.
Yaꞌa via Juda,
lotu po ta karao roa God.
8 Hetman vou oꞌro lotu yei Juda,
awoꞌo yaꞌa Cha Krispus.
Ya kopei taim ve,
yaꞌa awei aro mowmow ekepi piya oꞌro yaꞌa ero,
kebilip pova Biapako.
Ya aro bombiam prumo kekepi mataimon Korin awirai ya Cha Pol kerivo ya kebilip ya baptais-a keko.
9 Kopei roro raꞌa,
Biapako kakai a va kairai iya Cha Pol veka kayiyo.
Taim ve,
Biapako va kairai roa veka,
“Via nama riri,
awirai-ya ta namairirai nonoi,
via ke roꞌo va namapikim.
10 Ero korao veka,
keta nakeni nima ta via kuinyia iu bia raꞌa nareroma ya narao roma toro vai.
Aro bombiam prumo kekepi mataimon ve God-a kamompe yei ven kyiave aro bilip.”
11 Korao veka ta Cha Pol kakeiki mataimon Korin konoi kuinyia iu veka ainini moikera ura 6-pla,
ya awirai ya God-a kairirai roiy.
12 Kopei taim ve,
Cha Galio kakei veka gavana vou provins Akaia.
Ta Juda kyiopoke piy minyiao kyiaivia Cha Pol ya keko yaꞌa kanoi kot.
13 Ya kyirai veka,
“Bia emo inyia karoporei aro mowmow ke via pa va nepikeo lo memi Juda vai.
Ta inyia pa kepikeo pasin mara taim lotu nepao poa God.”
14 Kopei taim Cha Pol karake awirai yaꞌa nairai,
Cha Galio kairairoiy Juda veka,
“Bo mopu Juda kot-a nepiapao bio raꞌa nabikhet o ao taipo raꞌa narao,
kuinyiaiu kot mopu nanarivo.
15 Ta kokape kopu okoku pore awirai,
awoꞌo ta lo mopu veku vai.
Mopu veku nopokeo ya nopu stretim.
Nena via anainyia niu ke kot rere ao veka nanarivo vai.”
16 Korao veka ta Cha Galio karirikei kenopi upuo.
17 Ya kyiaivia Cha Sostenes,
hetman vou oꞌro lotu yei Juda.
Ya kepyeiya upuo iu oꞌro kot.
Ta Cha Galio via ao va raꞌa arao row ao en epao emo vai.
Cha Apolos kanoi kakei iya Cha Akwila eri Kwa Prisila
18 Cha Pol baunke kakei Korin umo mowmow.
Ya kopei Kristen yei mataimon Korin karerei ya kanoi kakei mataimon Senkria ke wua nako nanoi distrik Siria.
Ya taim kakei mataimon Senkria,
chapeꞌe va kepeiyaoro.
Ero korao veka,
tija promis-a raꞌa karao roa God.
Ya chapeꞌe va kepeiyaoro ke noriritao veka taim vou promis ya kowaunki.
Ya kopei wua raꞌa kako ya kanoi distrik Siria.
Kwa Prisila eri Cha Akwila minyiao kerai nopi pova.
19 Ya keparara kenopi mataimon Efesus,
ya Cha Pol karereiya Cha Akwila eri Kwa Prisila boko ve.
Ya kanoi oꞌro lotu aꞌari yei Juda awei a va kairai konoi kokai.
20 Ya kopei kyirai poa nakeiki iꞌiy popoꞌpo ta kairai baun.
21 Kopei taim karake nanoi,
ya kairai roiy veka,
“Nena keta nakane varu bo God-a narererona nakane.”
Ya kopei karereo mataimon Efesus ya wua kako kanoi.
22 Taim kanoi kareiki mataimon Sisaria,
kakoi nake ya kanoi mataimon pako Jerusalem ya ova korova roiy Kristen ya kopei kararo mataimon Antiok.
23 Cha Pol kakeiki mentan mentan mataimon Antiok ya kopei mataimon ve karereo ya kararo boko mememe vou provins Galesia ta provins Frigia,
ke nalpim yei Kristen-a nebilip ya neropi kupuana.
Cha Apolos awirai-ya kairirai Efesus
24 Taim Cha Pol kakei mataimon pako Jerusalem ta Antiok,
Juda raꞌa awoꞌo yaꞌa Cha Apolos kakai kakei mataimon Efesus.
Boko yaꞌa Aleksandria,
kuinyia kantri Isip.
Bia emo kasave revo awirai uinyia Buk ya God.
Ya taim a va inyia kairirai,
aro mowmow ta inyia keperepow revo awirai yaꞌa nerivo.
25 Cha Apolos,
skul-a kako row awirai ya Biapako ta inyia ova korova revo taim a va nairai roiy aro bombiam koka row ao mowmow Yesus-a arao ero.
Ya kopei taim awirai ya Yesus-a inyia nairirai roiy,
ta awakai-ya kairai roiy.
Ta bia emo skul vou baptais po kako iya Cha Jon Baptais.
26 Ya kopei kanoi oꞌro lotu yei Juda to va kairirai ta via ariri.
Kopei taim Cha Akwila eri Kwa Prisila awirai-ya kerai rivo poa,
ya keraiyepi poa kanoi roiy oꞌro yei ya kerai yirai poa revo row awirai vou Rara ya God.
27 Kopei taim Cha Apolos karake nanoi provins Akaia,
ya kopei Kristen yei mataimon Efesus-a ruru neman-a keupoa ya kanoi.
Ya pas-a raꞌa kepeꞌe poiy Kristen yei provins Akaia kyirai poiy ke neko yaꞌa nyiorepariya.
Ya taim Cha Apolos kareiki provins Akaia,
kalpim yei revo aro ve.
God-a kamarimari roiy ya kebilip pova Yesus.
28 Kopei awei Juda ketovetove iꞌiy ine yei aro bombiam koka.
Ao en karao en,
ero korao veka,
ao en Juda epao emo,
via pa orikeiya God.
Ya kopei awirai uinyia Buk ya God kairai roiy,
ke noriritai veka,
Yesus yaꞌa Krais,
bia emo God-a kamompe ke nako yei varu aro bombiam yaꞌa.