Cha Pol eri Cha Sailas kerai kepi mataimon Tesalonaika
17
Taim Cha Pol awei aro kura yaꞌa kenopi kerepiki mataimon Amfipolis ya kopei mataimon ve kepepeo ya kenopi mataimon Apolonia.
Ya kopei mataimon ve minyiao kepepeo ya kenopi revo mataimon Tesalonaika.
Bo ve,
oꞌro lotu yei Juda raꞌa koroi.
2 Ya Cha Pol pasin ve inyia kararao,
kanoi oꞌro lotu yei Juda ya kopei de Sabat 3-pla,
awirai uinyia buk ya God-a inyia kairirai roiy.
3 Awirai ya God-a kairirai roiy ya kariritai veka Krais-a keta nai-ya napoi ya narai ya kopei navariko varu.
Ya kairai roiy veka,
“Yesus ve kanairai nopu ero,
yaꞌa Krais.”
4 Ovu yei Juda awirai ve kerivo kebilip ta pa kepikeiya Cha Pol eri Cha Sailas.
Ta yei Grik mowmow lotu kepao poa God awere aro bom mowmow awoꞌo pako ereko ero,
kerenori roiy.
5 Ta yei Juda emo riꞌi yei kotaipo revo,
ero korao veka,
kepirikei aro mowmow pa kepekeiya Cha Pol eri Cha Sailas.
Korao veka ta kenopi kyepi poiy aro ovu pasin taipo epao ero ta inyia ketowa kyiararao kanapon maket.
Ya kyiopokei aro bombiam ya keprumoki vovake,
ya ao ororo kepapao poiy aro bombiam vou mataimon ve.
Kepraprara kenopi bokamo vou oꞌro ya Cha Jeson kepopu kyiorenaka Cha Sailas eri Cha Pol,
ke nerainyai nenopi piy eno yei aro bombiam ke kot-a nepeipao.
6 Ta via yiorenai,
korao veka ta kyiaivia Cha Jeson awei aro ovu ebilip ero keraipai kenopi poiy aro beiy voro mataimon-a kyiorepariu ero.
Ya kyepi veka,
“Aro ve pasin taipetaipe akai-ya kepapao boko mowmow vou meꞌri ve,
ta mare kekape keropi em.
7 Ya Cha Jeson kako yei kenopi kekepi oꞌro yaꞌa.
Aro ve via pa epikeo lo ya Cha Sisar vai.
Kyirai veka king raꞌa yei kakei,
awoꞌo yaꞌa Yesus.”
8 Taim aro bombiam koka awei aro beiy yei mataimon ve awirai ve kerivo,
keririko toro ta inyia kyepi pako.
9 Korao veka ta aro beiy-a kyirai poa Cha Jeson awei aro ovu inyia ebilip ero kot-a kebaim ya kerokoperiki kenopi.
Cha Pol eri Cha Sailas kerai nopi kerai kepi mataimon Beria
10 Kopei kororo ya Kristen-a kyirai poa Cha Pol eri Cha Sailas kerai nopi mataimon Beria.
Taim kerairepiki mataimon Beria,
ya kerai nopi oꞌro lotu aꞌari yei Juda.
11 Yauke Juda ekepi mataimon Beria ero,
pasin yei koneman rei Juda ekepi mataimon Tesalonaika.
Aro ekepi oꞌro lotu yei Beria awirai ya God-a kerivo ta teve ketete revo ta kepake nerivo.
Ya umumoka buk ya God-a inyia kepirikeo bo awirai ya Cha Pol norao iu minyiao o bauni.
12 Korao veka ta aro bombiam mowmow yei Juda kebilip,
ta aro bom mowmow Grik awoꞌo pako ereko ero minyiao kerebilip,
awei aro biam mowmow yei Grik minyiao.
13 Taim Juda ekepi mataimon Tesalonaika kerivo veka Cha Pol inyia awirai ya God-a kairirai mataimon Beria,
ya kenopi mataimon vere ruru kepei rovoru aro bombiam ta kepao keririko.
14 Ya kopei bererenki Kristen-a kyirai poa Cha Pol kararo yin,
ta Cha Sailas eri Cha Timoti po kerai kepi mataimon Beria.
15 Aro keko yaꞌa Cha Pol keparo ero,
keperiaki revo mataimon Atens.
Ya kopei kepake nekope varu ya Cha Pol awirai kupuana va kairai roiy ke nekope nyirai poa Cha Sailas eri Cha Timoti neraiparo piya bereren.
Cha Pol kakei mataimon Atens
16 Taim Cha Pol kakei mataimon Atens,
kakei keiya Cha Sailas eri Cha Timoti ta riꞌi kotaiponaka revo taim kapirike mataimon ve god roporere kere prumo.
17 Korao veka ta kanoi oꞌro lotu yei Juda a va kairai iꞌiy awei aro via yiave Juda inyia lotu kepao poa God.
Umumoka inyia kanoi maket awirai ya God-a kairirai roiy aro ekape maket.
18 Saveman ovu yei Epikurian awei Stoika to va kyirai piya konoi kokai ya ovu yei ketere veka,
“Bia ero a va kairai tintin row awarape?”
Ta ovu yei kyirai veka,
“Awirai yei god roporere yei boko raꞌa kairirai rore ere.”
Awirai ve kyirai ku vou korao veka,
Cha Pol awirai neman ya Yesus-a kairirai ta pasin yei beiyo nevereko varu matmat kairai minyiao.
19 Ya kerainyaka Cha Pol kenopi poiy kansol inyia kyiopokeo tou Areopagus.b
Ya ketere poa veka,
“Era skul tare inyia kamairirai moiy aro bombiam kuinyia iu namairai momi nemirivo vai?
20 Awirai mara kamako kakame kemirivo teve memi ta kokokore nami,
ta ku vou awirai ve kemake nemi save.”
21 Aro Atens awei aro yei boko raꞌa kekape kekepi mataimon Atens evo,
ao va raꞌa via epao.
Kekepi veku to va kyirirai ta teve ketete row awirai tare.
22 Ya kopei Cha Pol kavariko karoi romoiy kansol yei tou Areopagus ya kairai roiy veka,
“Mopu aro Atens,
ao voro inyia opao ero,
koriritana veka kopu kupuana revo lotu nopao.
23 Kopei taim kanautute kana pirikeo revo ao voro lotu opaopore ero,
ta alta raꞌa kana pirikeo kopao ya awirai koraꞌa kopeꞌe veka,
‘Alta ya God voro memi via em i save yaꞌa.’
Korao veka ta God voro mopu via opu save yaꞌa ta lotu opao poa ero,
mare kanake awirai yaꞌa nanairai nopu.
24 “God voro meꞌri va nau uteno va arao ero,
ta ao mowmow erinyia ero,
yaꞌa Biapako vou heven nau meꞌri.
Ya via akei roki oꞌro lotu beiyo epao eno yei veku ro vai.
25 Ya via kuinyia iu ao yei beiyo eparepare eno yei veku raꞌa noelpim yaꞌa vai.
Ku vou korao veka,
via ao va raꞌa arererow vai,
awakai,
yaꞌa veku kupuana karoiy beiyo ke nekepi tare ya puꞌu va karoiy ta ao ovu vova minyiao.
26 Tija akai God-a bia moikera po karaonaka,
ta raiyau moikera ve God-a aro bombiam mowmow karaonai ta kekepikepi boko mowmow vou meꞌri ve.
Aro bombiam ve God-a yaꞌa veku taim yei nekepi kamompe.
Ya boko mowmow vou meꞌri buꞌu va kaoro roiy ke nekepikepi.
27 God-a ao en kararerare ke kuinyia iu nyiorenanaka,
to yauke kakei imi ven revo kakuke.
28 “ ‘Laip memi kuinyia enope yaꞌa ta kekemi kemitare.
Ya kupuana karomi ta kuinyia iu nemute meꞌri ve.’
“Korao minyiao saveman mopu ovu awirai-ya kepeꞌe veka,
‘Memi minyiao kekemi veka meꞌe yaꞌa.’
29 “Ya memi aro meꞌe ya God,
via nemitoro God-a karao iu minyiao veka topa,
gol o silva.
God-a via arao veka ao voro beiyo kepao enope yei ta ruru yei veku vai.
30 Tija aro bombiam-a via ruru akai-ya eko vai,
ta God-a kairai via kot-a nareirao bereren vai.
Kopei mare awirai kupuana kairai roiy ke riꞌi va nerovoru ya pasin taipetaipe inyia epao ero nepepere.
31 Ku vou korao veka,
yaꞌa veku umo raꞌa kamompe ven ke kot-a nareirao aro bombiam.
Kopei pasin niniu yaꞌa,
keta kot-a narivo roiy aro bombiam mowmow vou meꞌri ve.
Ao en karao,
awakai-ya koraonao ven ta kuinyia iu nemi bilip taim karai ya kopei God-a karaonaka kavariko varu matmat.”
32 Ya taim awirai yei beiyo neviri kopei nevereko varu kerivo,
ya ovu yei keteriaka.
Ta ovu yei kyirai poa veka,
“Awirai voro kemeremow namairai momi vova.”
33 Korao veka ta Cha Pol karerei ya kanoi.
34 Aro ovu po awirai ya Cha Pol kerivo ta kebilip ya pa kepikeiya.
Raꞌa yei pa arikeiya ero awoꞌo yaꞌa Cha Dionisius.
Yaꞌa raꞌa yei kansol inyia kanoi kaopoke iꞌiy tou Areopagus.
Ta bia bom raꞌa awoꞌo vou Kwa Damaris,
vou minyiao kokei iꞌiy ta ovu yei aro ebilip kekepi minyiao.