Cha Timoti kanoi rova Cha Pol eri Cha Sailas
16
Cha Pol eri Cha Sailas keraiparo varu mataimon Derbe ya kopei kerai nopi mataimon Listra.
Kopei mataimon ve,
disaipel raꞌa kakei,
awoꞌo yaꞌa Cha Timoti.
Moꞌo yaꞌa vou Juda,
ta kobilip rova Yesus.
Kopei aka ya Cha Timoti yaꞌa Grik.
2 Aro inyia ebilip pow awirai ya God ta kekepi mataimon Listra ta Aikoniam inyia awoꞌo ya Cha Timoti kyiavoko revo nake.
3 Cha Pol karererova Cha Timoti nanoi rova.
Korao veka ta Cha Pol tao va keiyaoro Cha Timoti.a
Ero korao veka,
aro Juda via kuinyia iu nepin bio via tao va aoro ero nanoi tempel aꞌari.
Ta Juda mowmow ekepi bo vere keyarau veka,
aka ya Cha Timoti yaꞌa Grik.
4 Ya inyia kyiute kenopi popore mataimon ta kyirai poiy Kristen.
Kyirai poiy pa nepikeo awirai aposel-a awei aro beiy yei mataimon pako Jerusalem-a kyirai minyiao ven ero.
5 Korao veka ta aro bombiam mowmow vou sios-a keropi kupuana row bilip ta pa va kepikeo awirai ya Biapako.
Umumoka namba yei inyia kokoi kopakoki vovake.
God-a ine keiya rovoru Cha Pol ta bia raꞌa yei Masedonia kapirikeiya veka kayiyo
6 Cha Pol eri Cha Sailas ta Cha Timoti kyiute kenopi romore distrik Frigia ta Galesia.
Ta Holi Spirit veku karao rariy via awirai ya God-a nyirirai poiy aro provins Esia vai.
7 Taim kenopi kerepiki iu distrik Misia ya kepake nenopi provins Bitinia,
ta Spirit ya Yesus-a rara katirerariy via nenopi boko voro vai.
8 Korao veka ta distrik Misia kepepeo ya keparo Troas.
9 Kopei roro,
Cha Pol ao va raꞌa kapirikeo veka kayiyo.
Kapirikeiya bia raꞌa vou provins Masedonia karoi inyia a va katere naka veka,
“Keta nao va namawetari nakame provins Masedonia ya namalpim memi.”
10 Taim Cha Pol ao en kapirikeo ven,
ya kopei bererenki po memib rara kemorenanao ke nenomi Masedonia.
Kemi yarau ven veka God-a yaꞌa veku kairimi keta awirai neman ya nemirirai moiy.
Mataimon Filipai Kwa Lidia riꞌi va korovoru ya kobilip
11 Ya kopei wua kemiko Mataimon Troas ya kenomi ailan Samotres.
Ya kopei umo raꞌa vova parara kenomi mataimon Neapolis.
12 Ya boko ve kememeo ya kenomi Filipai ya kekemi miy umo ovu.
Mataimon ve,
evo mataimon pako vou provins Masedonia ta inyia pa kepikeo lo mowmow ya gavman vou Rom.
13 Kopei de Sabat,
kenomi upuo vou reiy kamo vou mataimon pako evo,
ya bo raꞌa yei aro inyia beten-a epao ero kemorenao kakuke iu pii ke beten-a nemao.
Ya bo ve kemi vakakere aro bom ovu ya kekemi a va kemirai mire.
14 Ta raꞌa rere aro bom ve kerekeri a va kererivo romi ero,
awoꞌo vou Kwa Lidia.
Bia em no biriri korarerare ta aro bombiam mowmow keperepore ta kebaim.
Bia emo kokei Filipai ta oꞌro ku vou Taiataira,
ta inyia lotu koraoroa God.
Biapako riꞌi va karu rovoru ya teve koteteo revo row awirai Cha Pol airai em.
15 Taim Kwa Lidia awere aro vou inyia kerekeri iu minyiao baptais-a kereko ven,
ya kuirai romi veka,
“Bo nopu yarau veka kenbilip nova Biapako,
kuinyia iu nokape nokepi pin oꞌro nen.”
Kokei inyia kuirai korami ya pa va kemikeo awirai vou ya kenomi mow oꞌro vou.
Cha Pol eri Cha Sailas kerai kepi kalabus
16 Roraꞌa kemute kenom bo vou beten-a inyia emamao ero ta wokmeri kanapon raꞌa bo va korao roiy aro ovu kovakakemi rara.
Bia ve spirit taipo kakei iu.
Ta awirai-ya inyia kuirai rore ao voro keta nerekare pa ero.
Ya taim bo ve inyia korao,
aro mowmow ketao koka inyia kebaim vou ya ketao ve konoi roiy varu aro bo orao roiy ero.
The Conversion of the Jailer (Aposel 16:16-40)
17 Ya bia bom ve pa va korikemi aro enomi mova Cha Pol,
ya inyia kwei kuirai veka,
“Aro ve yei wokman ya God Bia Nake.
Rara vou God-a nako mopu varu inyia kyirirai popu.”
18 Umo mowmow ao en inyia korarao ta Cha Pol koinyia row revo,
ya karovoruka iu bia emo ya kairai roa spirit taipo va veka,
“Mare kanairai noma,
row awoꞌo ya Yesus Krais,
namemeoki ya nanomi.”
Ya bererenki po spirit taipo ve karereo.
19 Ya kopei taim bos vou bia bom ve kepirikeo veka rara yei ketao va neko pow ero ya kowaunrei,
ya kyiaivia Cha Pol eri Cha Sailas ya keraipai kerai nopi kerekepi maket,
ke kot-a nepeipao piy aro beiy vou lo.
20 Ya keko ya Cha Pol eri Cha Sailas kenopi piy ine yei mejistret ya kot-a kepeipao veka,
“Bia riepin ve yei aro Juda ta nai-ya kepomi.
Ta ao va keraipao via oneman iu ine yei aro bombiam vou mataimon memi vai.
21 Ta pasin voro ere taipere iu kastam memi Rom ero,
kerepiritai aro bombiam.”
22 Aro bombiam koka minyiao keroropoiy ta kevitikei bia riepin ve.
Ya jas-a kyirai poiy soldia noreka ketaitaipei ya titi va kepyei.
23 Ya taim inyia kepyei kepao poiy toro,
ya jas-a kyiavei keparai roki kalabus.
Ya awirai kupuana kyirai poa bia ero aorerariu oꞌro kalabus ke naorerariy revo.
24 Bia emo oꞌro kalabus-a kaorerariu ero,
awirai yei jas-a karivo ya kako yei karerei roki kekepi rum raꞌa kuinyia revo aꞌari kuro vou oꞌro kalabus ve.
Ya kom-a karei arow revo kupuana nau palang.
25 Kopei nyeko kopanaki,
Cha Pol eri Cha Sailas beten-a nau monrai-ya keraipao poa God,
ta kalabus ovu teve ketetei.
26 Ya kopei bererenki po,
maiyeni pako koirereki ta oꞌro kalabus-a koirere ta kamo mowmow vou oꞌro kalabus em kere ruriki.
Ya sen yei kalabus mowmow em kere rarito.
27 Taim bia emo oꞌro kalabus-a kaorerariu kavariko kapirikeo veka kamo mowmow vou oꞌro kalabus-a kere ruriki,
ta karitoro veka kalabus mowmow kepepe ven.
Korao veka ta bainat ya veku kakoka karake reka yaꞌa veku neiyarira varu ya narai.
28 Ta Cha Pol kaiyki roa veka,
“Via bainat-a namarira mema veku vai!
Baunke ve ekem em.”
29 Ya bia emo oꞌro kalabus-a kaorerariu ero kairiy lait-a konekape poa.
Ya kavariko bereren kaparara kakai aꞌari ya karei karerere kakuke iu kompe ya Cha Pol eri Cha Sailas.
30 Ya kopei kako yei kekape upuo ya katere roiy veka,
“Bia beiy riepin,
to keta arape nanao ke God-a nako nena varu?”
31 Ya kerai yiraikipe poa veka,
“Namabilip mova Biapako Yesus awei aro ekepi pima ero,
ya God-a keta nako mopu varu.”
32 Ya awirai ya Biapako va kerai yirai poa awei aro ekepi oꞌro yaꞌa.
33 Ya kopei roro ve,
bia emo oꞌro kalabus-a kaorerariu ero,
kakoi yei kanoi aoka voro kepyeiya ero karei niri.
Ya bererenki po yaꞌa awei aro yaꞌa baptais-a keko.
34 Ya kakoi ya Cha Pol eri Cha Sailas kerai nopi pova oꞌro yaꞌa ta aokorom-a karao roiy.
Ya ova korova revo,
ku vou korao veka,
yaꞌa veku ta om-a awei mevova yaꞌa kebilip pova God.
35 Ya kopei roronai,
mejistret-a kesalim yei manro va kekape kyirai poa bia ero oꞌro kalabus-a aorerariu ero,
narokoreria Cha Pol eri Cha Sailas nerai nopi.
36 Ya kopei bia emo oꞌro kalabus-a aorerariu ero kanoi kairai roa Cha Pol veka,
“Mejistret-a kyirai pona kuinyia iu nana rokoneripu noru nopi.
Korao veka ta noru nopi nau riꞌi mariri.”
37 Ta Cha Pol kairai roiy manro va veka,
“Mepi via ao taipo raꞌa va epipao ta kepyemi iꞌiy ine yei aro bombiam vai.
Ta kot mepi minyiao via erivo popi vai.
Mepi bia kantri Rom.c
Kyiavepi kepere roki ven kalabus ta mare kepake nerokoperiki nepi nopi kakana vai?
Keta nowaun!
Nonopi nopirai poiy yei veku nekape neko mepi nepi nopi upuo.”
38 Ya opisa awirai ve keko kenopi kyirai poiy mejistret.
Ya taim mejistret-a kerivo veka Cha Pol eri Cha Sailas yei Rom,
ya keriri toro.
39 Kopei mejistret-a keko yei kenopi ke a va nyirai minyiao,
ya kerainyai kenopi upuo ya kyirai poiy mataimon ve nerai pepeo ya nerai nopi.
40 Kopei taim Cha Pol eri Cha Sailas keraipepeo oꞌro kalabus ya keraikape upuo,
ya kerai nopi oꞌro vou Kwa Lidia.
Ya oꞌro ve,
kerai vakakei Kristen ovu ya awirai kupuana kerai yirai poiy ke neropi kupuana.
Ya keraipepei kerai nopi.