Sios-a kyiopokeo mataimon pako Jerusalem
15
Beiyo ovu kekape Judia ya keparo Antiok skul-a kepoiy Kristen ya kyirai poiy veka,
“Mopu keta tao va noporo veka lo ya Cha Moses kuirai,
bo ao en via nopao,
God-a via kuinyia iu nako mopu varu.”
2 Awirai ve korao ta Cha Pol eri Cha Barnabas awirai pako kyirai konoi kokai wararoiy.
Korao veka ta Kristen-a kemompe yaꞌa Cha Pol eri Cha Barnabas kerai kope poiy disaipel ovu,
kekope mataimon pako Jerusalem ke nepirikei aposel ovu awei aro hetman row awirai em.
3 Aro bombiam vou sios-a kesalim yei kyiute kenopi distrik Fonisia nau Samaria.
Taim kyiute kenopi distrik riepin ve,
awirai yei aro via yiave Juda kebilip pova Yesus ero umumoka inyia kyirai poiy disaipel.
Ta disaipel awirai ve kerivo ova koroꞌoi revo.
4 Ya kopei taim kerairepiki mataimon pako Jerusalem,
aro bombiam vou sios ta yei aposel awei hetman ova koroꞌoi revo roiy.
Ta ao mowmow God-a karao roiy eno yei kyirai poiy.
5 Ta ovu yei Farisi inyia ebilip ero,
kevereko kyirai veka,
“Aro via yiave Juda,
keta pa va nepikeo lo ya Cha Moses ya tao va nyioro veka lo va kuirai.”
6 Ya aposel-a awei hetman-a kekape kyiopokeo minyiao ke awirai ve nyirai pow.
7 Awirai-ya kyirai konoi kokai ven,
ya Cha Pita kavariko kairai roiy veka,
“Aro raꞌai,
tija akai,
mopu kopu yarau ven veka God-a kamompe nena ven tija,
ke awirai neman yaꞌa nanairirai nonoi roiy aro via yiave Juda nerivo ya nebilip.
8 God-a riꞌi yei aro bombiam koka kayarau iꞌiy ven.
Kariritami veka karereroiy revo korao veka ta God-a Holi Spirit-a karoiy veka karomi evo.
9 Via pasin raꞌa tirin arao romi ta yei tirin vai.
Rara vevo po,
kebilip pova God ta ao taipo kapereoki rei ya kekepi keniniu iu ine yaꞌa.
10 To korakaro ta kopake nopu traim ya God?
Mopu inyia nai-ya koperetai disaipel toꞌom veka aro apo memi tija,
ta memi minyiao viake nai ve nemipoiy.
11 Ta memi kemibilip veka Biapako Yesus-a kamarimari romi ya kako memi varu,
ta yei aro via yiave Juda minyiao kako yei.”
12 Ya kopei aro mowmow kyiopokeo emo,
roꞌo kyetoko ta teve keteteiya Cha Pol eri Cha Barnabas a va kerai irai.
A va kerai yirai poiy rore mirakol ipipo God-a kupuana karoiy ta keraipao romoiy aro via yiave Juda.
13 Taim a va kerai yirai ven,
Cha Jems kavariko kairai veka,
“Aro raꞌai nena,
nopurivo pona.
14 Cha Saimon kairai romi veka,
tija God-a kanoi iꞌiy aro via yiave Juda ke nariritai veka ovu yei karereroiy revo.
Ya ovu kako yei ta karao kekepi veka aro yaꞌa veku.
15 Awirai yei profet-a korao iu minyiao veka kepeꞌe kuirai veka,
16 ‘Nena Biapako,
kokai paire keta nakane varu nanaonai aro noꞌo ya Cha Devit nevereko varu.
Kepao veka oꞌro tora kovoruru ta kokorari ven.
Nena keta nakane varu oꞌro ve nanao noneman ya notare varu.
17 Aro mowmow vou meꞌri ve,
keta nyiorenana
ta yei aro mowmow via yiave Juda kana mompe yei ven veka aro nena.
Biapako awirai ve kairai ya mare ao em awakai-ya inyia koraonao.’a
18 Kopei ao en aro keyarau ven atoke.
19 “Korao veka ta ruru nena Cha Jems,
kanairai veka,
‘Via nai-ya nemoiy aro voro via yiave Juda ebilip ta pa epikeiya God.
20 Kopei po pas-a nemeꞌe nemirai moiy veka,
aokorom voro ofa inyia kepao poiy god roporere ero via nepa,
pasin pamuk-a via nepao,
aomeꞌe poko epeivove ta aomeꞌe bei noꞌo va uinyia ero via nepa.’
21 Tija akai awirai ya Cha Moses inyia kyirirai popore mataimon mowmow kokai kuinyia iu mare vo,
kopei de mowmow vou Sabat,
awirai ve ta inyia kyirirai poiy oꞌro lotu yei Juda.”
Kansol-a pas-a kepeꞌe konoi roiy aro via yiave Juda
22 Korao veka ta aposel awei aro beiy ta yei aro bombiam mowmow vou sios to va kyirai minyiao ke ovu yei veku nesalim yei nenopi pova Cha Pol eri Cha Barnabas nenopi mataimon Antiok.
Ta kemompe yaꞌa Cha Judas awoꞌo raꞌa keipinaka veka Cha Barsabas ta ya Cha Sailas.
Bia riepin ve inyia kerai nopi poiy cha aro ebilip.
23 Ya pas ve kepoiy keraiko kerai nopi.
Awirai-ya kuinyia pas kuirai veka,
“Memi aposel ta yei aro beiy,
memi aro raꞌai mopu.
Pas ve kemeꞌe mopu aro via opaove Juda kopu bilip pova God ta kokepi mataimon Antiok,
ta boko mowmow vou provins Siria awei Silisia.
24 Kemirivo ven veka ovu memi kenopi kepao kopu ririko row awirai yei ta ruru kepepu rovoru.
Aro voro memi via emirai moiy ta enopi to voro yirai vai.
25 Korao veka ta a va kemirai minyiao ya beiyo ovu kemimompe ya kemisalim yei kenopipoiy aro kura memi kemeremoiy revo ero,
Cha Pol eri Cha Barnabas ke nenopipipu.
26 Bia riepin ve kerai ropi kupuana row awoꞌo yaꞌa Biapako Yesus Krais ta via erai riri row nerai rapi vai.
27 Ya kopei kemi mompe ya Cha Judas eri Cha Sailas nerai nopi pova Cha Pol eri Cha Barnabas ke awirai-ya nerai yirai poiy revo roꞌo yei veka kemeꞌe kuinyia pas.
28 Ero korao veka,
Holi Spirit-a kakei imi ta to va kemirai minyiao veka,
via nai koka va nemopu nopu poiy vai.
Korao veka ta pasin evo po pa nopikeo
29 Mopu aokorom voro ofa kepaopoiy god roporere ero via nopa,
pasin pamuk-a via nopao,
aomeꞌe poko epeivove ta aomeꞌe bei noꞌo va uinyia ero via nopa.
Pasin neman po nopao ya pasin taipo nopaviare ya nokepi revo.”
Awirai vou yauke.
30 Ya kopei kesalim yei keparo mataimon Antiok,
ya kyepi poiy aro bombiam vou sios-a kekape kyiopokeo minyiao ya pas ve kepoiy.
31 Aro vou sios-a pas-a keritim ta ova koroꞌoi veka awirai ve kupuana koroiy.
32 Cha Judas eri Cha Sailas yei profet-a,
ta awirai mowmow kerai irai ta korao riꞌi kokokorenai ta kere helpim yei ke neropi kupuana.
33-34 Cha Judas eri Cha Sailas kerai kepiki piy mataimon Antiok mentan mentan ya kopei kesalim yei keraikape varu nau riꞌi mariri ta kerai nopi piy varu aro voro kesalim yei kekape ero.b
35 Cha Pol eri Cha Barnabas via eraipepeo mataimon Antiok vai,
bo va keraipao piy aro ovu skul-a kepoiy aro bombiam ta awirai ya Biapako kyirirai.
Cha Pol eri Cha Barnabas keraitovetove ya via bo va erepao minyiao
36 Kerai kepiki mentan mentan ya Cha Pol kairai roa Cha Barnabas veka,
“Nepinopi varu nepi pirikei aro raꞌai ekepi popore mataimon mowmow voro tija awirai ya Biapako kepi irirai poiy ero.
Kekepi revo o baun.”
37 Ya Cha Barnabas karake nako yaꞌa Cha Jon Mak nanoi roiy.
38 Ta Cha Pol koinyia via Cha Jon Mak nanoi roiy vai.
Ero korao veka,
tija Cha Jon Mak karerei taim kekepi provins Pamfilia bo va kepao minyiao.
39 Kerai tovetove pow awirai en konoi ya kerai awetari ya bo va via eraipao minyiao.
Ya Cha Barnabas kako yaꞌa Cha Jon Mak kanoi rova ya wua keraiko kerai nopi ailan Saiprus.
40 Kopei Cha Pol kako yaꞌa Cha Sailas kanoi rova ta aro bombiam vou oꞌro lotu eno keperetai ya ketere poa Biapako naorerariy revo ya kepin kerai nopi.
41 Cha Pol eri Cha Sailas kerai nopi provins Siria ya kopei kerai nopi provins Silisia ke Cha Pol kupuana naroiy aro bombiam vou oꞌro lotu,
ke neropi kupuana ya bo ya Biapako nepao.