Cha Barnabas eri Cha Sol awirai-ya kerai irai Aikoniam
14
Cha Pol eri Cha Barnabas keraikepi mataimon Aikoniam ya kerainopi oꞌro lotu yei Juda veka keraipao mataimon Antiok.
Awirai ya Biapako kyirirai ta awirai ve korao riꞌi va kokokonai aro prumo yei Juda awei aro via yiave Juda kebilip.
2 Kopei Juda ovu via ebilip,
ruru kepei rovoru aro bombiam via yiave Juda ta ova koreirororoiy aro bombiam ebilip evo.
3 Korao veka ta Cha Pol eri Cha Barnabas via erai riri row awirai ya Biapako nerai irirai vai,
ya kerai kepiki mentan mentan mataimon Aikoniam.
Ta Biapako kupuana karoiy ta mirakol maramara va keparepare.
Biapako ao en karao koriritai aro bombiam veka,
awirai ve ero awakai.
4 Ta aro bombiam mowmow vou mataimon pako evo kyiawetari koraꞌa riepin.
Ovu keropi piy Juda,
kopei ovu keropi piy aposel.
5 Ya kopei Juda awei aro via yiave Juda to va kyirai minyiao roki iꞌiy aro beiy yei ke nepao poiy toro Cha Pol eri Cha Barnabas.
Kepake topa va nepurupi nepyeiya Cha Pol eri Cha Barnabas neviri.
6 Ta Cha Pol eri Cha Barnabas awirai ve kerai rivo ya kerai nopi mataimon riepin vou distrik Likonia.
Kerai nopi mataimon Listra ta mataimon Derbe,
awere boko ovu erinyia kakuke iu mataimon riepin ve,
7 ta awirai neman ya God-a inyia kerai irai boko ve.
Cha Pol eri Cha Barnabas kerai kepi mataimon Listra ta mataimon Derbe
8 Kopei mataimon Listra,
bia kom taipo raꞌa kakei.
Bia emo,
tare mare moꞌo va oaivia,
kom-a keiya taipo.
Ta via autute.
9 Kakei teve kateteiya Cha Pol a va kairai.
Ya kopei Cha Pol katororu keiya ya kapirikeo veka,
bia kom taipo evo,
kabilip ke kuinyia iu naneman varu.
10 Ya Cha Pol kairia kairai roa veka,
“Nama variko narom mow kom riepin mema!”
Ya bia emo kaupuko karoi ya kaute.
11 Taim aro bombiam mowmow kekepi ao en Cha Pol karao kepirikeo ya kyepi poko yei Likonia kyirai veka,
“Bo god-a keparo pimi veka beiyo!”
12 Ta Cha Barnabas keipinaka veka god Sus,
kopei Cha Pol keipinaka veka god Hermes.a
Ku vou korao veka,
Cha Pol bia yaꞌa awirai-ya kanoi roiy cha.
13 Oꞌro lotu ya god Sus ve kuinyia upuo kakuke iu kamo roꞌo vou reiy vou mataimon pako evo.
Ya pris vou oꞌro lotu ya god Sus evo,
kanoi bulmakau aka ovu va kako yei nau plaua ovu etaikekere,
karuna kakai.
Ya kakai iu kamo vou reiy vou mataimon evo ke awei aro bombiam mowmow va ofa nepao poa Cha Pol eri Cha Barnabas.
14 Ya kopei taim Cha Pol eri Cha Barnabas awirai vou ao en kepake nepao ero kerairivo,
ya kerai aupuko ya noreka yei keroropub ya parara kerai nopi romoiy aro bombiam mowmow ya keraiyepi veka,
15 “Aro raꞌai,
to korao vekaipe ta ao en kopao?
Mepi beiyo kanapo veka mopu.
Awirai neman ya God-a kepiko kepikape popu,
ya kemirai mopu ao taipetaipe ve nopepere ya nopu rovoru nokape piya God ve kakei tare,
ya lotu nopao poa.
God ve yaꞌa unake nao va karao,
uteno,
meꞌri ta ao mowmow erinyia ero.
16 Tija,
God-a karin aro bombiam mowmow va kyiute pow pasin yei veku.
17 Ta yaꞌa veku via akei rokire rei beiyo vai.
Kariritai veka karereroiy revo,
ta karao aꞌ va koai koraro uteno korao aokorom prumo kerekore kereneman.
Aokorom koka karopu ta riꞌi va oꞌto kotepu.”
18 Aro bombiam mowmow keperepow revo ofa nepao poiy.
Ta kerai revapana row revo neraiyirai poiy via ofa nepao vai.
19 Ya kopei Juda ovu kekape mataimon Antiok ta Aikoniam ruru va kepei rovoru aro bombiam.
Ya topa kepuna kepurupi kepyeiya Cha Pol ya kyiaivia kerin kenopinaka upuo vou mataimon ve,
kepitoro veka karai ven.
20 Kopei taim aro ebilip pova Yesus kekape keropi iri kyiapepariya,
ya kavariko kanoi varu mataimon voro epyeiya ero.
Kopei uri vou,
Cha Pol eri Cha Barnabas mataimon ve keraipepeo ya kerai nopi mataimon Derbe.
Cha Pol eri Cha Barnabas awirai kupuana kerai yirai poiy aro bombiam ke nebilip pova Yesus
21 Ya awirai neman ya Biapako kerai irai mataimon Derbe ta awirai ve korao aro bombiam mowmow kebilip.
Ya kerai nopi varu mataimon Listra,
Aikoniam ta Antiok.c
22 Ya awirai kupuana va kerai yirai poiy disaipel-a veka,
“Nopu bilip,
noropi kupuana.
Bo kemake nenomi kingdom ya God,
keta nemute mow rara voro nai koka erinyia ero voꞌo.”
23 Cha Pol eri Cha Barnabas beiyo ovu kerai mompe yei ke nenopi poiy cha,
nenopi popore oꞌro lotu moike moike vou boko moike moike.
Ya aokorom-a kekepiyao ta beten-a awei kepao ya kerai pereikipe poa eno yaꞌa Biapako,
bia ero inyia ebilip pova ero.
Cha Pol eri Cha Barnabas kerai nopi varu mataimon Antiok kuinyia provins Siria
24 Ya kerai nopi romore boko mowmow vou provins Pisidia ya kerai nopi kerairepiki iu provins Pamfilia.
25 Taim awirai ya Biapako kerai irai ven mataimon Perga,
ya kopei kerai paro mataimon Atalia.
26 Ya kopei mataimon Atalia keraipepeo ya wua keraiko kerai nopi varu mataimon Antiok.
Mataimon ve tija Kristen-a beten-a kepao ta God-a kamarimari roiy,
ke bo ve neraipao.
Ya mare keraipao ven,
ya kerai nopi varu Antiok.
27 Taim kerairepiki ven,
ya keipiy aro bombiam vou sios-a kekape kyiopokeo minyiao.
Ya kerai yirai poiy row ao mowmow God-a kareirao eno peꞌe yei,
kerai yirai poiy veka,
“God-a kamo karuriki roiy aro bombiam via yiave Juda ta kebilip.”
28 Ya kerai kepiki piy aro ebilip umo kere mowmow riy.