Kemompe yaꞌa Cha Barnabas eri Cha Sol kerai nopi
13
Sios yei mataimon Antiok ero,
profet ovu awei tikse ovu kekepi.
Awoꞌo yei,
Cha Barnabas eri Cha Simeon,
Cha Simeon awoꞌo raꞌa ya Cha Niga,a
ta Cha Lusius yaꞌa Sairini ta Cha Sol ta Cha Manain.
(Cha Manain,
bia emo eri Cha Herot keraiave revo kura akai.)
2 Umo raꞌa,
aro bombiam vou sios-a aokorom-a kekepiyao ya lotu kepao poa Biapako.
Ya kopei Holi Spirit-a kairai roiy veka,
“Nopirai poa Cha Barnabas eri Cha Sol nerai nopi bo voro ainiy ero neraipao.”
3 Korao veka ta aokorom-a kekepiyao ta beten po kepao ya eno keperetai ya kesalim yei kenopi.
Cha Barnabas eri Cha Sol awirai neman ya God-a kerai irai ailan Saiprus.
4 Bia riepin evo,
Holi Spirit-a kasalim yei keraiparo wua keraiko mataimon Selusia ya parara kerai nopi ailan Saiprus.
5 Taim kerepiki iu mataimon Salamis,
ya kerai nopi oꞌro lotu yei Juda awirai ya God-a kerai irai.
Cha Jon Mak kanoi roiy minyiao ke nalpim yei.
6 Kenopi popore boko mowmow vou ailan Saiprus ya kenopi kerepiki iu mataimon Pafos.
Ya kopei boko ve Pafos,
Juda raꞌa kevakakeiya,
awoꞌo yaꞌa Cha Baryesus.
Bia emo,
yaꞌa profet roporere ta inyia marela maramara inyia kararao.
7 Bia emo inyia kanoi kakekei iya namba wan gavana awoꞌo yaꞌa Cha Sergius Paulus.
Cha Sergius Paulus save pako nau ruru neman-a kuinyia iya.
Ya kairia Cha Barnabas eri Cha Sol neraikape nerai pirikeiya.
Ku vou korao veka,
karake awirai ya God-a narivo.
8 Ta Cha Baryesus karake bo ya Cha Barnabas eri Cha Sol nayeuvore,
ke via Cha Sergius Paulus nabilip rova Yesus vai.
Baryesus (poko Grik,
keipinaka veka Cha Elimas.
Ku vou korao veka,
bia yaꞌa awoi-ya ararao)
9 Ta Cha Sol,
awoꞌo raꞌa keipinaka Cha Pol,
ro va kare row Holi Spirit ya katororu keiya Cha Elimas ya kairai roa veka,
10 “Mema ma ya Satan,
ine kama trotromu mamire pasin mowmow ere niniu.
Ro va kamemore pasin mowmow ere taipetaipe ta kamaropomei aro bombiam.
Ta rara mowmow niniu ya Biapako inyia kamao kotaipo.
Era pasin ve ta namemeo o bauni?
11 Mare akai eno ya Biapako keta nayema,
ine keta norema rorokeki ya nakemiki mentan mentan,
via kuinyia iu umo va nama pirikeiya vai.”
Ya taim Cha Pol kairai veka,
bererenki po ao veka uteno roroke kokai kopoporariya Cha Elimas ine.
Korao veka ta kanoi kakai beiyo va kaorenanai ke eno va nyiaivia nenopi.
12 Taim Cha Sergius Paulus ao en kepirikeo,
kabilip,
ta riꞌi kokokoreꞌnaka toro row awirai ya Biapako.
Cha Barnabas eri Cha Pol kerai kepi Antiok kuinyia provins Pisidia
13 Cha Pol awei aro inyia kyiutute popova ero,
kepepeo mataimon Pafos ya wua keko kenopi mataimon Perga kuinyia distrik Pamfilia.
Taim ve kenopi mataimon Perga,
Cha Jon Mak karerei,
ya kanoi varu mataimon pako Jerusalem.
14 Ya mataimon Perga kepepeo ya kyiute kenopi kerepiki mataimon Antiok kuinyia distrik Pisidia.
Ya kopei de Sabat,
kenopi oꞌro lotu yei Juda ya kekepiyo.
15 Kopei taim hetman yei oꞌro lotu awirai vou lo nau awirai yei profet-a keritim ven,
ya bio raꞌa kyirai poa kanoi kairai roa Cha Pol eri Cha Barnabas veka,
“Aro raꞌai,
bo awirai ovu nuinyia ipu ke norao aro bombiam-a neropi kupuana,
kuinyia iu mare nopirai.”
16 Ta Cha Pol kavariko eno karao roiy ke roꞌo nyeto ya kairai veka,
“Mopu aro Israel awepu aro via opaove Juda lotu kopao poa God,
nopurivo.
17 God yei Israel,
kamompe yei aro apo memi ta karaonai aro bombiam-a kemowmow revo taim kekepi kantri Isip.
God em,
kupuana ya kopako vova ke.
Row kupuana yaꞌa veku ta karin Israel-a kepepeo kantri Isip.
18 Ya kopei taim kekepi bo ramata kanapon beiyo ewaun,
nai yei kapoi konoi kuinyia iu veka 40-pla ainini.”
19 Ya kopei kantri 7-pla vou Kenan God-a kabagarapim,
ya karoiy Israel kyiave aka vou meꞌri ve.
20 God-a ao koka kararerare roiy Israel taim kekepi kantri Isip,
kokai kuinyia iu revo taim meꞌri ve keko,
ero korao veka 450 ainini.
“Ya kopei God-a hetman ovu karoiy Israel ke nenopi poiy cha,
konoi kuinyia iu taim ya profet Samuel.
21 Ya kopei taim ve aotere kepao ke king-a raꞌa nemompe.
Ya God-a kamompe yaꞌa Cha Sol ma biam ya Cha Kis,
yaꞌa aro noꞌo ya Cha Benjamin.
Kakei veka king yei Israel konoi kuinyia iu 40-pla ainini.
22 Ya kopei God-a kapuruveriaki Cha Sol,
ya kamompe yaꞌa Cha Devit kave king yei Israel.
Awirai ya Cha Devit kairirai roiy beiyo va veka,
‘Kana pirikeiya ven Cha Devit ma biam ya Cha Jesi.
Bia emo riꞌi nena korere rova,
ao mowmow kanere nore ero,
keta nararerare.’
23 “Tija God-a promis-a karao ven veka keta bia raꞌa naromi,
bia emo keta nako yei varu aro bombiam yaꞌa.
Bia emo keta nakai iꞌiy aro noꞌo ya king Devit.
Yesus,
bia emo inyia kanairirai nova ero.
24 Taim Yesus-a baunke bo ya via arao,
Cha Jon kairirai roiy aro bombiam mowmow yei Israel-a riꞌi va nerovoru ya baptais-a neko.
25 Taim Cha Jon bo yaꞌa karake narao nau,
ya kairai roiy veka,
‘To mopu kopitoro nena bia nape?
Nena via bia voro kokepi keiya ero vai.
Nopurivo!
Bia ero keta nakaiwona pa,
nena via ananeman ke sandel-a neniatainuki vai.’b
26 “Aro raꞌai,
mopu mevova ya Cha Abraham awei aro via opaove Juda inyia lotu kopao poa God,
nopurivo.
Memi aro bombiam ve,
tapara awirai ya God-a noko yei varu aro bombiam-a kokai em.
27 Aro bombiam vou Jerusalem awei hetman yei keroivinaka Yesus veka yaꞌa via kuinyia iu sin memi Israel-a napereo vai.
Ya kot-a kepiapao ya kepyeiya karai.
Ao en akai-ya koraonao veka awirai yei profet-a kyirirai de Sabat.
28 Ku ya Yesus-a nepyeiya narai ero via yiorenao,
korao veka ta kyirai kemomo naka Cha Pailat nairai roiy soldia nepyeiya narai.
29 Taim ao mowmow en kepao veka awirai yei profet-a kepeꞌe kuinyia buk,
ya kyiaiviaꞌo pika ya keko yaꞌa kenopi kepere topa kamo.
30 Ta kopei God-a karaonaka kavariko varu matmat.
31 Kopei umo mowmow aro ve inyia kyiutute popova kenopi distrik Galili ya kopei kenopi mataimon pako Jerusalem ero,
inyia kepirikeiya.
Ya kyirirai poiy aro bombiam veka Yesus-a kepirikeiya.
32 “Awirai neman ya God-a kemirai mopu.
Ao voro God-a promis-a karao roiy aro apo memi.
33 God-a karaonaka Yesus-a kavariko varu matmat ya mare promis ve akai-ya koraonao romi iu mevova yei.
Awirai ve kepeꞌe kuinyia Buk Sam sapta 2 kuirai veka:
‘Mema ma nena,
mare kanave aka mema.’c
34 God-a karaonaka Yesus-a kavariko varu ta via kuinyia iu narai vova ya napiroto vova matmat vai.
Ao en koraonao ven,
tija God-a kairai row awirai ve,
‘Keta promis anao noa Cha Devit nanoma,
promis em,
promis ero nena God veku,
ya promis ve anao ero keta noraonao revo veka kanairai ero.’
35 Ta awirai koraꞌa kuinyia Buk Song kuirai veka,
‘Via namin Bia Holi mema napiroto meꞌri vai.’ ”d
36 “Taim Cha Devit baunke kakei meꞌri ve,
bo va karao pa karikeo awirai God-a airai roa ero.
Ya kopei karai ya kepere kainyia iꞌiy aro apo yaꞌa,
ya reka kapiroto.
37 Kopei bia God-a karaonaka kavariko varu matmat,
reka yaꞌa via opiroto.
38 “Korao veka ta aro raꞌai nena,
kanerenopu ao en kana irirai nopu yarau pina revo.
Yesus-a karai kopei kavariko varu,
ta ao en sin yei aro bombiam-a kopereoki.
Ya mare pasin vou sin-a nopereoki kokai ipu revo ta ve kana irirai nopu.
39 Yesus unake po sin yei aro bombiam mowmow kapereoki taim kebilip pova,
ya karao keniniu iu ine ya God.
Kopei lo ya Cha Moses via kuinyia iu sin yei beiyo nopereo vai.
Baun ben.
40 Nopu yarau ke,
awenari ao voro tija profet-a kyirai pow ero keta nokai ipu.
Kyirai veka,
41 ‘Pirike,
mopu aro piava opari,
keta nopu ririko row ao taipo akai en,
keta nanao nopu.
Awakai keta nopu viri nau.
Nena keta ao taipo pako en nanao romopu,
bo bia raꞌa nairai ropu row ao voro keta nanao,
via kuinyia iu nopubilip.’ ”e
42 Kopei taim Cha Pol eri Cha Barnabas oꞌro lotu yei Juda keraipepeo ya keraipake nerai nopi upuo,
ta yei aro bombiam-a inyia ketere poiy ke kopei Sabat raꞌa neraikape varu awirai vou ao en nyirai poiy vova.
43 Taim aro lotu kevereka upuo,
ya yei Juda awei aro via yiave Juda pa kepikeo pasin vou lotu yei Juda,
mowmow yei pa kepikeiya Cha Pol eri Cha Barnabas.
Ya awirai kupuana kerai yirai poiy ke neropi kupuana row marimari ya God.
44 Kopei Sabat raꞌa vova,
korao veka aro bombiam koka kekepi mataimon pako evo kekape kyiopokeo minyiao ke awirai ya Biapako nerivo.
45 Ya taim hetman yei Juda kepirikei aro bombiam mowmow kyiopokeo,
riꞌi yei kotaipo revo ta keteriaka Cha Pol row awirai airai roiy ero.
46 Ta Cha Pol eri Cha Barnabas via erai riri ta to kupuana kerai yirai kipe poiy veka,
“Awakai,
memi keta awirai ya God-a nemirai mopu Juda vo.
Ta mopu via operepow vai,
kopei po oreva kopow ta kopirai veka,
‘Memi keta via laip voro uinyia toratora nemiko vai.’
Korao veka ta nemi rovoru nenomi miy varu aro via yiave Juda.
47 Ku vou korao veka,
Biapako to kupuana va karopi kairai ropi veka,
‘Kanao napu veka lait yei aro via yiave Juda,
ta aro bombiam mowmow vou meꞌri ve keta nanako yei varu.’ ”f
48 Taim aro via yiave Juda awirai ve kerivo,
ova koroꞌoi revo ta awoꞌo ya Biapako kyiavoko.
Ta yei aro God-a kamompe yei ke laip-a neko toratora,
awirai ve kerivo ya kebilip.
49 Ya awirai ya Biapako koawetari konoi rorore boko mowmow vou distrik em.
50 Ta hetman yei Juda kepao riꞌi kokokore nare aro bom awoꞌo pako ereko ero,
ta inyia kereriri roa God.
Ta kepao hetman vou mataimon ve minyiao riꞌi va kokokorenai,
ya keko yei aro ovu vova ya kepao poiy toro Cha Pol eri Cha Barnabas ya keririkei ya distrik ve kepepeo.
51 Ya kopei Cha Pol eri Cha Barnabas meꞌri mo oporoporo kanro yei keraipurarao ke aro bombiam-a neyarau veka pasin ve kepao kotaipo.
Ya keraipepei ya kerai nopi mataimon Aikoniam.
52 Aro bombiam-a kebilip ta ova koroꞌoi revo ya ro va kepe pow Holi Spirit.