Cha Herot kayeiya Cha Jems karai ya Cha Pita kakalabus
12
Ya kopei taim ve King Herota aro ovu vou sios-a kavei ya karao roiy toro.
2 Awirai kupuana va kairai roiy ta kyiaivia Cha Jems,
raꞌai ya Cha Jon ya bainat-a opo va kepiaoro ya karai.
3 Taim Cha Herot kapirikei veka aro Juda ova koroꞌoi row ao en arao ero,
ya kairai roiy kyiaivia Cha Pita.
Ao en karao taim De Pako Vou Bret-a Yis-a Kowaun.
4 Taim kaivia Cha Pita,
kako yaꞌa kareria roki kakei kalabus.
Ya karin Cha Pita kakei eno peꞌe yei soldia grup 4-pla,
ya grup moike moike ero soldia 4-pla keropiropi ta namba yei korao veka 16-pla soldia kyiorepariya.
Cha Herot kairai Cha Pita keta nakei kalabus nonoi nuinyia iu De Pako Vou Bret-a Yis-a Kowaun nonoiki vo,
ya kopei neko yaꞌa nakai upuo ya kot-a narivo roa.
5 Korao veka ta Cha Pita kakei kalabus ya soldia inyia kyiorepariya.
Aro bombiam vou sios-a beten-a kyiavavoki ke God-a nalpim yaꞌa.
Ensel-a kalpim ya Cha Pita ya oꞌro kalabus-a karereo
6 Cha Herot de raꞌa kamompe ke nako ya Cha Pita nanoi kot.
Ya roro ve nonoi nuri keta Cha Pita nanoi kot,
sen riepin-a kepia nopiroki ya kainyia romoiy soldia riepin.
Ta yei soldia ovu kyiorepariya kamoro vou oꞌro kalabus.
7 Bererenki po ensel ya Biapako kakamap,
ta lait-a koviriri oꞌro kalabus aꞌari ta bo va kuri nau.
Ya ensel-a kakai tairi va keiya tureriki Cha Pita ke navariko,
ya kairai roa veka,
“Nama variko bereren!”
Ya sen riepin kyiapo nau eno ero korokoreriu ya raro korei meꞌri.
8 Ya ensel-a kairai roa vova veka,
“Let mema namati ya kanro mema namikokome.”
Ya Cha Pita karao veka ensel-a kairai roa ero.
Ensel-a kairai roa vova veka,
“Saket mema namikokome ya pa va nemenarom.”
9 Ya Cha Pita pa keiyaroi ensel ya kerai nopi upuo.
Ta yaꞌa veku,
ao en ensel-a arao en via ayarau vai.
Karitoro veka bo kayiyo.
10 Kerai ute kerai nopi ya kerai aviaoki bo raꞌa voro soldia inyia ekepi ero,
ya kopei tare kerai nopiki vova ya raꞌa vova kerai aviaoki ya kerai repiki iu revo kamo ain pako vou mataimon em.
Bokamo pako em vou veku koruriki ya kerai nopi upuo.
Kerai ute kerai nopi po rara raꞌa,
ya kopei bererenki ensel-a karereiya.
11 Ya kopei Cha Pita ruru akai-ya kako row ao voro ya kairai veka,
“Mare ya ao en kana yarau revo veka awakai.
Biapako kairai roa ensel yaꞌa kakai ta kako nena varu iu eno ya Cha Herot nau ao mowmow Juda kekinao pow ke nepao pona ero.”
12 Ao en kapirikeo ven ya kanoi oꞌro vou Kwa Maria,
moꞌo ya Cha Jon.
Awoꞌo raꞌa ya keipinaka Cha Mak.
Oꞌro vou Kwa Maria ero,
aro mowmow va kyiopokeo beten-a kepao.
13 Cha Pita kamo kakirikiri upuo ta wokmeri raꞌa awoꞌo vou Kwa Roda,
kokai ke kamo va noruriki.
14 Ya kopei taim poko koiya rivo,
ova korow revo ta via kamo va orurikire roa vai.
Koparara konoi varu aꞌari ya kuirai roiy aro bombiam veka,
“Cha Pita kakai karoi kamo!”
15 Aro ekepi oꞌro aꞌari kyiraikape pow veka,
“Ruru kowaun remu ro?”
Ya kopei kuiraiki roiy veka,
“Baun,
awakai.”
Ya kopei kyirai pow veka,
“Awenari ero ensel ya Cha Pita ero?”
16 Ta Cha Pita baunke karo kamo inyia kakirikiri.
Ya kopei kenopi kamo va kepuriki ya kepirikeiya,
ta keririko toro.
17 Ya Cha Pita eno karaoroiy ke roꞌo nepikim.
Ya kairairoiy row pasin ve Biapako kairairoa ero,
ta kako yaꞌa oꞌro kalabus-a karereo.
Ya tare kairairoiy veka,
“Awirai ve nopiraipoa Cha Jemsb awei aro ovu ebilip.”
A va kairairoiy ven ya karerei kaute kanoi boko raꞌa.
18 Kopei roronai,
soldia kepirikeo veka Cha Pita via akei ta keririko toro,
ya yei veku ketere veka,
“To arape orao roa Cha Pita?”
19 Ya kopei Cha Herot awirai kupuana va kairai roiy soldia kenopi kyiorenanaka Cha Pita,
ta via epirikeiya.
Ya Cha Herot kako yei soldia ve awei kanoi kot,
ya kairai roiy ke nepyei neviri.
Ya Cha Herot karereo distrik Judia ya kararo kakei mataimon Sisaria.
Cha Herot karai
20 Cha Herot ova keiya roro roiy revo aro bombiam vou mataimon Tair awei Saidon.
Korao veka ta kekape kyiopokeo minyiao ya kekope kepirikeiya.
Tija kenopi kepirikeiya Cha Blastus ke naelpim yei,
bia emo ao mowmow vou oꞌro ya King Herot kaorerarire.
Ya kopei kenopi kepirikeiya King Herot ke riꞌi mariri neupoa ke naokoku roiy.
Ku vou korao veka,
aokorom-a ta keko kantri King Herot aorerariu ero.
21 Ya kopei Cha Herot umo raꞌa kamompe,
ya umo ve noreka ine neman yei king-a karikoko ya kakeitaw sia king yaꞌa,
ya awirai ipipo va kairai roiy aro bombiam.
22 Ya aro bombiam-a kyepepi veka,
“Ero poko ya god raꞌa,
via poko ya bio vai.”
23 Cha Herot awirai ve karivo ta via karake awoꞌo ya God-a navoko.
Korao veka ta bererenki po ensel ya God-a kayeiya raro karei pika ya uꞌu mememe romerin-a kepiapa konoi ya karai.
24 Ta awirai ya God-a konoi kopako vova ke ya konoi rorore boko mowmow.
25 Ya kopei Cha Barnabas eri Cha Sol bo ya Biapako keraipao ven ya keraipepeo mataimon pako Jerusalem ya kerai nopi varu Antiok.
Ya Cha Jon keraiko yaꞌa kanoi roiy minyiao,
awoꞌo raꞌa keipinaka veka Cha Mak.